عبدالرحمن نصرالدين -Abd Elrahman Nasreddin

02/05/2026

فيه مشهد بيتكرر في شغل كتير…
بس قليل اللي بيسميه باسمه الحقيقي:
استنزاف متغلف بكلام حلو.

لو بصيت كويس في الصورة…👇
هتلاقي الشعارات على الحيطة بتتكلم عن الرؤية والأهداف 🏢
لكن اللي على الأرض… بيتكلم عن واقع تاني خالص.

ناس تعبانة، مضغوطة، مكسورة…
ومفيش حد سامع غير صوت النتائج 📉

والشخص اللي بيقول: “أنا معاكم والله”؟
مش كداب بالضرورة…
بس اختار يبقى حلقة في السلسلة بدل ما يوقفها.

المشكلة إن النوع ده من البيئات
بيكافئ اللي يستحمل أكتر… مش اللي يفكر أحسن.

فتلاقي الشاطر بيزهق ويمشي،
واللي بيقول “حاضر” على طول… هو اللي يكمل.

وهنا الكارثة:
المكان بيفضل شغال…
بس بيفقد روحه واحدة واحدة.

لحد ما يبقى كله شبه بعضه:
تعبانين… ساكتين… ومستنيين فرصة يهربوا.


#منقول

16/11/2025

الموظف الشاطر مش بيتغير فجأة…
بس في حاجات بتخليه يتغير بالتدريج:
1️⃣ مدير بيقلل من تعبه.
2️⃣ نظام مفيهوش عدل بين الزملاء.
3️⃣ كل مجهوده بيضيع من غير تقدير.
4️⃣ زميل كسول بياخد نفس امتيازاته .
5️⃣ أفكاره بتترفض عشان مش وقتها.
6️⃣ كل حاجة عاجلة جدًا حتى لو مالهاش لازمة.
7️⃣ بيفقد أمل في الشركة.
الحماس مش بينطفي مرة واحدة… ببساطة في أسباب بتفضل تكتم فيه لحد ما يختفي تماما

14/10/2025

المدير الشاطر مش لازم يكون عارف كل تفصيلة في الشغل…

بس لازم يكون المرجع للموظفين وقت الزنقات. 💪

مش مطلوب منك تحفظ كل جدول وتاسك،
لكن مطلوب إن فريقك يحس إن فيه ظهر يتسندوا عليه لما الدنيا تعطل منهم.

المدير مش موسوعة، هو بوصلة بتوجه الموظفين وتساعدهم يلاقوا الطريق لما يضيعوا. 👋

ساعتها الموظفين هيشتغلوا براحة…
لأنهم عارفين إن فيه حد بيفهم، يسمع، ويدعمهم وقت الجد. 🙌

07/10/2025

4 حاجات المدير بيشوفك بتعملها وبيقول في سره الواد ده غبي 😂

1️⃣ تشتغل بعد الشيفت ببلاش

أنت فاكر إنك كده مخلص للشغل؟
هو شايفك مجرد مغفل بيديله وقت ببلاش… ومبسوط إنك بتوفرله أوفر تايم! 😬

2️⃣ تاخد شغل مش بتاعك وتقول حاضر

فاكر نفسك بطل خارق؟
هو بيقول تمام… نشيله كمان شوية مدام مبسوط 😅

3️⃣ تفتخر إنك آخر واحد سايب المكتب

حاسس إنك عملت إنجاز عظيم؟
هو شايفك مش عارف تدير وقتك… وبيضحك عليك كل ما يشوفك. 🙆

4️⃣ تسكت على حقك في زيادة أو ترقية

بتقول: أكيد هيشوفوا تعبي ويقدروني؟
هو شايفك ساذج… وهيفضل يركبك لحد ما تقول بس! 🙆

مش كل حاجة تعملها بحسن نية… بتخليك تبان قدام مديرك إنك مخلص للشغل.

أوقات كتير بتخليك تبان إنك الموظف اللقطة اللي نقدر نستغله وندوس عليه. 😁

05/09/2025

القائد الناجح:
اللي يعرف الفرق بين (الموظف ال🐟) و(الموظف ال🐔) و(الموظف 🐓) و(الموظف 🐦)..!

- السمكة: بتبيض مليون بيضه تحت المايه لا حد سامع ولا حد شايف ولا فارق معاها كلام الناس شغاله في صمت، وبتحقق أعلي معدلات الإنتاج🐟 🥺

- الفرخة: بتبيض بيضه واحده بس بتقعد توكوك وتكاكي لكل اللي رايح واللي جاي علشان تلفت الإنتباه والأنظار "ويشوفوها وهي بتبيض" 🐔😕

- الديك: مش بيبيض اصلاً بس يصدعك طول اليوم صياح على الفاضي ويفضل يتعارك مع الفراخ اللي حواليه - لا منه ولا كفاية شرة 🐓😒

- العصفوره: كلنا عارفينه وهو عارف اننا عارفينه وصاحبه عارف اننا عارفينه بس دي عاده فيه - بدل ما يشتغل وينتج بيشتغل لإفساد روح الفريق

تحياتي لكل الاسماك اللي في حياتنا🐟 😂😂

16/08/2025

مش كل الموظفين بيدوروا على فلوس أكتر… بعضهم بيدور على مكان مستقر ومدير داعم، ومكان مناسب
✨للإبداع.

15/08/2025

✨ من المتعة أن تحاول فعل المستحيل ✨

المستحيل مش كلمة بتوقفك، المستحيل هو التحدي اللي بيخليك تكتشف قدراتك الحقيقية.
كل خطوة في طريقك، حتى لو كانت صغيرة، هي انتصار على الخوف والكسل والشك.
جرب، حاول، وغامر … لأن المتعة مش بس في الوصول، المتعة الحقيقية في الرحلة نفسها. 🚀

31/07/2025

يا مدير تعمل إيه لو فريقك كله بنات ؟؟ وبيعيطوا ؟؟

أيوة يا باشا، متستغربش، في يوم من الأيام كنت منسق لفريق بيتكون من عدد لا بأس به من البنات جوا وبرا المكتب، بمعنى إن مش كلهم شغلهم داخل المكتب لأ، فيه منهم شغلهم متوزع على أماكن outdoor خاصة بالمكتب ، أخدت فترة طويلة لحد ما قدرت أهندل الفريق ده بالكامل، والنهارده هقولك تعمل إيه لو عندك نفس المشكلة.

لو أنت مثلا بتدير فريق كله بنات،
هتلاقي نفسك في مواقف مش موجودة في كورسات الإدارة!

ومن أبرزها العياط!

✅ واحدة بتعيط من ضغط الشغل
✅ واحدة من كلمة فُهمت غلط
✅ واحدة عشان شايفة إنك ظلمتها
✅ واحدة عشان ماما زعلتها الصبح
✅ واحدة فركشت
✅ واحدة افتكرت حاجة من عيد ميلادها الخامس

طيب تعمل إيه؟

7 قواعد تحافظ بيهم على هيبتك، وتفضل إنسان في نفس الوقت:

1️⃣ افهم إن العياط ده مش ضعف

الدموع مش معناها إن الموظفة دراما كوين أو بتعمل سين في المكتب، ساعات بتكون وسيلة لتفريغ الضغط والطاقة مش أكتر. 😥

2️⃣ افصل المشاعر عن الشغل

ما تسيبش قرارك يتأثر بالدموع، يعني لو قالتلك أنا تعبانة من ضغط الشغل 😢

متردش تقول خلاص خدي أجازة وبونص، افهم الأول فين الضغط واعرف تحله ازاي لو لقيته.

3️⃣ متتكلمش عن العياط وسط الفريق

لو عيطت في اجتماع أو موقف عام، ما تلمحش بعدها ولا تهزر بشكل سخيف، متفضلش تقول كل ما تشوفها حد معاه مناديل؟

أنت المفروض قدوة، خلي شكلك يفضل محترم.

4️⃣ اتكلم على انفراد

دايمًا خصص وقت للكلام الخاص
راجع اللي حصل بهدوء، افهم المشاكل وحلها.

5️⃣ اسأل بدل ما تحكم غلط

بدل ما تقول: هو في إيه؟ أنتي كده ليه؟ روحي عيطي في البيت...

قول: حابب أفهم اللي مضايقك علشان نشوف حل سوا

6️⃣ ما تطنش

لو تكرر موضوع العياط من نفس الشخص
ماينفعش تقول دي بتعيط عالفاضي.

اسأل نفسك:

في مشكلة حقيقية؟
ولا محتاجة تدريب مثلا علشان تتعامل مع ضغط الشغل؟

7️⃣ حافظ على اتزانك

متبقاش متعاطف قوي فيتلعب بيك، ولا ناشف قوي فتبقى متبلد.

خليك دايما قائد، اسمع وحلل وقرر، لأن الموظف اللي بيحترمك علشان إنسانيتك، هيشتغل معاك بضمير.

إدارة البنات مش صعبة…
بس محتاجة ذكاء إداري وعاطفي وحكمة وتحكم بالنفس مش شفقة، وليونة وميوعة.

اسمع بقلبك، وخد قرارك بعقلك. 😎☝️

منقووووووووووول

25/07/2025

“أنت صاحب القرار”
تذكر دائمًا أن حياتك هي انعكاس لقراراتك، أنت الشخص الوحيد الذي يمكنه اختيار الطريق الذي تريد السير فيه.
“إن أعظم قوة يمتلكها الإنسان هي قدرته على اختيار اتجاه تفكيره.”
قد تواجه تحديات وآراء مختلفة، ولكن في النهاية القرار قرارك، والنجاح يعتمد على شجاعتك في اتخاذ الخطوة الأولى.
“بين المحفز والاستجابة، هناك مساحة، في تلك المساحة تكمن حريتنا في اختيار ردود أفعالنا.”
لا تسمح للخوف أو التردد بأن يمنعك من الوصول إلى أحلامك.
خذ وقتك لتفكر، استمع لنفسك، ولا تخف من الوقوع في الخطأ. الأخطاء جزء من التعلم والنضج، المهم أن تتعلم منها وتستمر.
كن شجاعًا بما يكفي لتقول “لا” لما لا يتناسب مع قيمك وأهدافك ومبادئك.. و”نعم” لما ينسجم مع رؤيتك للحياة التي تريدها.
الحياة ليست عن كونك مثاليًا … بل عن اتخاذ قراراتك بوعي وثقة والسعي نحو الأفضل كل يوم.
تذكر دائمًا: أنت قائد سفينتك، وأنت من يختار الاتجاه.
كـن صاحب قرارك.

23/02/2023

"الكلمة السيئة تؤذي ولو ألبستها وشاح المزاح، والكلمة الطيبة تسُرّ ولو كانت مجاملة."⁣

التنمر : هو أحد أشكال العنف الذي يمارسه شخص أو مجموعة من الأشخاص ضد شخص أخر أو إزعاجه بطريقة
متعمدة ومتكررة.

وقد يأخذ التنمر أنواعاً متعددة .

أنواع التنمر 🎯

•بدني مثل : الضرب أو سرقة وإتلاف الاغراض.
•لفظي مثل: الشتائم ،و السخريه،و التهديد.
•اجتماعي مثل: تجاهل ،و إهمال الشخص.
•نفسي مثل : النظرات السيئة،والتلاعب.

الآثار التي يتركها التنمر 🎯

•فقدان الثقة بالنفس.
•فقدان التركيز وتراجع الأداء.
•الخجل الاجتماعي والخوف من مواجهة المجتمعات الجديدة.
•حدوث مشاكل في الصحة النفسية
مثل : الاكتئاب ،والقلق،وحدوث حالات انتحار.

تخيل ممكن كل دا يحصل علشان حضرتك بس بتتنمر .🙂
أكيد كل حد فينا أتعرض للتنمر ولو مرة واحدة علي الأقل في حياته .🤦
لو شايف انك استفدت ولو معلومة صغيرة نشير ده مع المجتمع اللي بنعيش فية و يا ريت نحاول نساعد إن العالم يكون خالي من التنمر ❤️
❣️

04/12/2022

كده ٩ سنوات 😍
بمناسبة اليوم العالمي للتطوع ❤️
ولو البوست ده عدي قدامك قولي عرفتني في اي كيان يا صديقي 😉
❤️

خليني اقولكم ان انا التطوع ليه فضل عليا كبير بعد ربنا وأهلي 🙏

انا بدأت العمل المجتمعي والخدمي من 8 سنوات الي ان اصبح العمل الإنساني في مجال التنمية هو مجال عملي الحالي والمستقبل
اشتغلت خلال الفترة دي مع عدد كبير من فرق العمل والمؤسسات والهيئات والجمعيات والافراد 🌏
بكتب البوست ده عشان اعبر عن شكري وامتناني لكل كيان كنت جزء منه في يوم من الايام، كل مكان ساعدني في رسم شخصيتي وتعليمي حاجه جديدة 🥰
واعبر عن سعادتي بكل اللي عرفتهم في عملي التطوعي واقولهم ان انا مبسوط بمعرفتكم وبكل حاجه اتعلمتها منكم 😍
الصورة دي من داخل إحدى قاعات التدريب اللي بعتبرها الأعز إلى قلبي اللي بعتبر فيها إن قاعة التدريب هي صديقتك في تلك المدة اللي بتقدر من خلالها إنك تتعلم وتستفاد خبرة جديدة ♥️

ولو البوست ده عدي قدامك قولي عرفتني في اي كيان يا صديقي 😉
❤️