30/05/2026
ياخي قلنا تروحو كامل واحد بواحد، ولا راكم حاسبين الحراش دار جدودكم؟
من نهار جيتو والفريق داير كيما طاكسي فالليل: لا وجهة لا ضو.
الصغير فيكم داخل لـ60 سنة ومازال ماتعلم التسيير، النتيجة؟
9 سنين فالقسم الثاني، خزينة تقول عليها تعرضت لعملية سطو، وديون أكثر من إنجازاتكم.
واش حققتو بالضبط؟
حتى “مشروع رياضي،من غير مشروع تهريب المستثمرين”. أي واحد يقرّب للفريق تديرولو فوباراج وكأنكم حراس كنز فرعوني.
وزيد مازالكم حابين تبقاو!
على واش بالضبط؟ على الكراسي؟ ياخي الفريق ولى عندكم كيما القهوة تاع الحومة، نفس الوجوه ونفس الهضرة ونفس الإفلاس.
أعطونا سبب واحد يخلينا نآمنو بيكم… غير واحد برك، ماشي خطاب انتخابي.
لأن بصراحة، من مول القمجة حتى مول البليغة كامل نعرفوكم و علابالنا بلي بقاءكم راهو عقوبة جماعية للفريق.
كل ما تطولو، غير تزيدو تأكدو بلي التسيير عندكم كان بنظام:
“دبّر راسك و الانصار يتكفلو بالباقي.”
