Class Of '92

29/11/2025

أنا لسه موجود هنا يا شباب English Football since 1888
تابعونا عشان نستمر ونرجع الشغف

05/07/2025

هنا وهناك واحد شجعونا عشان نرجع❤️

بعد شهور من التخاذل
عدنا من جديد وسلسلة جديدة لحد ما نسميها والله أعلم هتكمل معانا ولا لا
الله أعلم البوست الجاي هيكون امتى اساسا
(فقدت الشغف والحاجات دي)
هتكلم عند فترات مميزة مخدتش حقها للاعب في البريميرليج والنهارده معانا هاري كين وبالتحديد الموسم الأخير مع توتنهام وهو موسم ٢٠٢٢/٢٠٢٣
فيه اكتر من سبب منطقي ممكن يخلي موسم تاريخي زي الموسم ده من كين بدون تسليط الضوء عليه سواء في الوقت الحالي أو حتى وقتها رغم أنه بالنسبالي واحد من أفضل المواسم إلي شوفتها لمهاجم في حياتي إن لم يكن الأفضل من حيث التكامل وحمل منظومة متهالكة على أكتافه
وأبرز الأسباب دي هي مركز توتنهام إلي أنهى الدوري في المركز التامن بدون خارج المراكز المؤهلة للبطولات الأوروبية
أو ببساطة ويعتبر السبب الأبرز إلي لولا وجوده كان كين في الأغلب هو هداف الدوري والأضواء كانت ممكن تتسلط عليه عادي وهو وجود هالاند في مانشستر سيتي في الأول وتقديمه مستوى خيالي وأصبح فيه أكثر من سجل في موسم واحد في تاريخ البريميرليج

هالاند قدر يسجل 36 هدف في 35 مباراة في أول مواسمه في البريميرليج
أهداف هالاند المتوقعة كانت 28,66
يعني قدر يسجل تقريبا 8 أهداف أكثر من المتوقع
بالرغم من ده هالاند أضاع 28 فرصة محققة للتسجيل
وهنرجع للنقطة دي بعد شوية
هالاند سجل 7 ضربات جزاء
29 هدف من اللعب المفتوح
وهدف واحد فقط من خارج منطقة الجزاء
هالاند قدر يصنع 8 أهداف من أصل 3,13 أسيست متوقع
صنع 30 فرصة منهم 11 فرصة محققة للتسجيل
مما هو واضح من الفرجة على موسم هالاند والنظر للأرقام هنلاقي أن هالاند مهاجم صندوق معظم تحركاته ومهامه داخل الصندوق في فريق زي مانشستر سيتي أغلب الموسم مستحوذ على الكورة في التلت الأخير من الملعب
وخلق أكبر كم من الفرصة
وهو ما لا يعيبه بالمناسبة لأن النقطة دي واخده أكبر من حقها عند جماهير الكورة بشكل عام
هو ده دور هالاند في السيتي وقد ينجح ويحقق أرقام قياسية من أول موسم ليه مع سيتي
طيب بالمناسبة نرجع للنقطة الي قولنا هنرجعلها
ليه عدد الفرص الي أضاعها هالاند مش كبير
الإجابة بسهولة لأن ده المعدل الطبيعي حتى لأي مهاجم هداف بل بالعكس هالاند سجل أكثر من المتوقع بحوالي
8 أهداف وهو رقم ممتاز بالمناسبة
المعدل الطبيعي لأي مهاجم كبير حتى كين نفسه باستثناء الموسم ده وهو ده سبب البوست اساسا هو معدل مقارب لهالاند
هاري كين الموسم الاخير في الدوري الألماني سجل 26 هدف وأضاع 19 فرصة محققة
الموسم إلي قبله سجل 36 هدف وأضاع 27 فرصة محققة
هالاند نفسه الموسم الاخير سجل 22 هدف وأضاع 21 فرصة محققة
الموسم الماضي سجل 27 وتخيل أضاع 32 فرصة محققة
بالمناسبة برضه وبعيداً عن البريميرليج واحده من الأرقام الي مش واحده حقها هو تسجيل ليفاندوفسكي 27 هدف في الليجا وأضاع 23 فرصة محققة
وهو المعدل الطبيعي إلي اتكلمنا عنه للمهاجمين الكبار
لكن فكرة أن ليفا في العمر ده بيتقارن بلاعيبه في البرايم بتاعهم مش واخده حقها
لاعيبة مثلا زي سواريز في نفس عمره وبيشطب من زمان
جمهور برشلونة بيتكلم عن ليفاندوفسكي أن لولا وجوده كان ممكن يبقى برشلونة موسمه أفضل
بل بالعكس لولا وجود ليفا أشك أن موسم برشلونة كان ممكن ينتهي بالشكل ده
نعود للبريميرليج والحديث عن كين ولماذا قدم موسم تاريخي في رأيي

في موسم سيئ من مواسم توتنهام السنين الأخيرة كما هو معتاد بل يعتبر موسم 22/23 من أصعب واسوء المواسم نظرا لتغيير المدربين ومشاكل كونتي وتولي مساعدينه القيادة بعده وتغييرهم أكثر من مرة
بالإضافة حتى أن الموسم ده يعتبر بداية انهيار سون المستمر حتى الوقت الحالي إلي مقدمش أي شيئ من المتوقع منه بعد الفوز بالحذاء الذهبي في البريميرليج
هاري كين النقطة المضيئة الوحيدة في توتنهام
تخيل معايا توتنهام في الموسم ده بدون هاري كين
بلاش تتخيل هو شكل توتنهام الموسم الماضي في البريميرليج
الفريق التعيس إلي كان على بعد مركز وحيد من الهبوط
هاري كين في موسم 22/23
لعب 38 مباراة
سجل 30 هدف (5 من ضربات الجزاء)
أهدافه المتوقعة 21,46 هدف
هاري سجل تقريبا 9 أهداف أكثر من المتوقع
وأضاع 12 فرصة محققة للتسجيل فقط
سجل 3 أهداف من خارج منطقة الجزاء
لكنه صنع 3 أهداف فقط وإلي لو جينا نقارن بينهم وبين هالاند في الصناعة هاري كين أسيستاته المتوقعة 3,98 أسيست متوقع وهو رقم مقارب لرقم هالاند إلي صنع 8 أهداف في نفس الموسم
هاري كين صنع 57 فرصة منهم 14 فرصة محققة للتسجيل
تاني هاري كين طوال الموسم صنع 3 أهداف فقط
هالاند صنع 8
رقم بسيط قادر يوضح حال توتنهام والجودة حول هاري كين في الفريق
هاري كين كان يقدر يفوز بالحذاء الذهبي في البريميرليج مستريه بنفس عدد الأهداف ده لولا وجود هالاند
صلاح مثلا هداف الموسم الأخير سجل 29
الموسم إلي قبله هالاند الهداف سجل 27
موسم 21/22 صلاح وسون الهدافين 23 هدف
موسم 20/21 هاري كين نفسه فاز بالهداف وسجل 23 هدف
البوست مش للمقارنة أو التقليل من هالاند لكنه تسليط الضوء على موسم تاريخي لهاري كين الكلام عليه كان قليل في وسط الانبهار بهالاند
وده يودينا للاسئلة المعتادة
ماذا لو كان توتنهام في ظروف أفضل؟
ماذا لو كان هاري كين بيلعب في منظومة أفضل طوال السنين الأخيرة؟
حتى هاري كين راح بايرن ميونيخ والفريق لسه مش مستقر وفيه مشاكل الفترات الأخيرة ولو فيه بصيص من الأمل بدأ يظهر بعد أول موسم لكومباني
في النهاية شكراً للمحترمين إلي وصلوا لحد هنا ومتنساش اخواتنا وحاول تقدملهم أي شيء يكون حجة ليك قدام ربنا
(الارقام في البوست كلها من FotmobوSofa score)
Abdallah Shoman

01/07/2025

كلها ٩ ايام وربع يوم وطالب الثانوية يخلص وراجعلكم عشان بتوع الكليات متخاذلين للأسف
تغييرات جذرية قادمة ⚠️⚠️
برجاء الانتظار لصعوبة الكيمياء والرياضيات 🙌🏻

01/06/2025

ولأن كرة القدم لعبة جماعية فاز باريس سان جيرمان
تغيرت سياسية الفريق فتغير الفريق بأكمله عن السنين السابقة
بعد سنين من شراء النجوم وعدم بناء مشروع حقيقي والصبر على المدربين كانت حقبة انريكي هي الأنجح في تجربة القطريين مع باريس
التعاقد مع مدرب كرة قدم حقيقي صاحب هوية واضحة وشخصية وتأثير غير الفريق بالكامل
وجود أنماط لعب وتكتيك بدون الكبرياء على الكورة وعدم تقديم شيئ مفيد بدونها من ناحية الضغط والمساهمات الدفاعية في الثلاثي الامامي فرق جداً مع باريس
بالإضافة لوجود خط دفاع وحارس ممتازين في الخلف مع خط وسط من الأفضل في العالم مع الكورة ودورهم الممتاز في الحفاظ على استحواذ الفريق والتحكم في الرتم
باريس اختلف كليا عن السابق واستحق اللقب
لايعني التقليل من الثلاثي الامامي الحالي أو اللاعبين الموجودين لكن أقصد عدم وجود الأنا مع الكورة والكبرياء على الفريق
فكفارا واحد من أشمل الأجنحة في العالم
دوي موهبة صاعدة وبقوة شخصيا بعتبره افضل شاب في العالم بعد يامال
ديمبيلي مهاجم وهمي مبدع وقد يتوج بالكورة الذهبية وقدم واحد من أفضل المواسم الي شوفتها لمهاجم وهمي في حياتي
بالإضافة إلي التحركات والحرية إلي بيمنحها انريكي للثلاثي بالكورة وإلي قادرين من خلاله يبهرونا في كل مرة بتوصل ليهم الكورة
فريق كرة قدم يلعب كوحدة واحدة
مزيج من التحكم والحرية يجعل فريق كرة قدم بالمتعة والسلاسة إلي ظهر بيها باريس طول الموسم
Abdallah Shoman

31/05/2025

يطول الحديث عن النهائي بصراحه وباريس يستحق بعد موسم تاريخي هو واحد من أفضل النسخ إلي شوفتها لفريق طوال فرجتي على الكورة
بس عايز اتكلم عن فيتينيا بشكل خاص
لاعب كورة عظيم وجودة عالية جدا بالكورة
واحد من أفضل لاعبي العالم الموسم الحالي ويستحق على الأقل يكون من ضمن التوب ١٠ في الكورة الذهبية
الهدف الثالث من بداية الهجمة يستحق التحية
من بداية الهجمة وحمل الكورة للأمام ولعب الكورة مع ديمبيلي والتحرك خلفة والباص لدوي
هدف يدرس في كيفية بناء الهجمة وحمل الكورة للأمام وإنتاج فرصة خطيرة من اللا شيئ
وأعتقد الهدف بيعكس تقريبا الموسم الممتاز إلي قدمه فيتينيا وحضورة في المباريات الكبري وتأثيره على منظومة باريس
كنت أتمنى الحديث اكتر عن باريس وعن المباراة لكن في الوقت الحالي الشغف والوقت صفر 👎
Abdallah Shoman

07/05/2025

فكرة اختزال كرة القدم كأرقام فقط بيخليها تفقد متعتها
ليه دايما اهتم بمسجل الهدف فقط أو حتى مين اكتر لاعب عمل مراوغات أو اني اشوف ارقام فقط بدون الفرجة
لو كرة القدم لعبة ارقام فقط يبقى كلنا نشوف النتائج بدون الفرجة على المباريات
لكن احنا بنتفرج على المباريات لأن المتعة الحقيقية في السيناريو والأحداث

عدد كبير من الناس حب يختزل الي قدمه لامين في الأرقام
لكن الي قدمه لامين اكبر من وصفه في رقم أو غيره
فكرة اني بتفرج على لاعب معاه الكورة مقفول عليه كل الطرق وفي مواقف كتير 2×1 ومعزول على الخط ورغم كل دا بيوصل للجون وبيخلق خطورة تبين كم الجودة والعمل الي قدمه لامين يامال
120 دقيقة تقريبا بنفس الرتم الخطورة ودي ماركو طلع ونزل مكانه اوجوستو عشان خطورة يامال تقل لكن طول المباراة بنفس الخطورة
شخصياً انا شوفت واحدة من أفضل المستويات الفردية الي شوفتها في حياتي
لو اتكلمنا حتى كأرقام
لامين يامال وصل 14 مراوغة ناجحة من أصل 20!!!!
هو أكبر عدد من المراوغات في دوري الأبطال من سنة 2020
وهو رابع مرة يوصل لاعب +14 مراوغة في مباراة اقصائية في دوري الأبطال بعد ميسي ونيمار مرتين من موسم 2003/2004
Abdallah Shoman

07/05/2025

كمشجع لليونايتد كان صعب عليا مشاهدة يان سومر إلي اشتراه انتر بعد بيع اونانا
مستوى فردي تاريخي قدر يتصدى 7 تصديات
5 تصديات من داخل منطقة الجزاء
منع 0,97 هدف متوقع
كورة لامين يامال الي لعبها في البعيدة قدر يتصدها سومر
واحدة من أفضل التصديات في الموسم الحالي
سومر قد يغير نتيجة المباراة واستحق جائزة رجل المباراة
عكس حارس زي اونانا كان من أكبر الأسباب في خروج اليونايتد من مجموعات دوري الابطال الموسم الماضي
جيل انتر الحالي استحق الفوز والوصل لنهائي دوري الابطال
في مشوار قد لا يتكرر في السنوات المقبلة
معدل اعمار لاعبي الانتر مرتفع
اعتقد هي الفرصة الأخيرة لانتر من أجل التتويج بدوري الأبطال بالجيل الحالي
برشلونة قدم موسم ممتاز لم أتخيل بصراحه وصولهم للمستوى الحالي لكن أمامهم طريق طويل مع فيليك والفريق الحالي في ظل معدل الاعمار المنخفض وكم المواهب الموجودة
شكرا للفريقين على واحدة من أفضل المباريات في دوري الأبطال آخر عشر سنين
مفتكرش ان كان فيه مباراة قبل كده بمستوى ورتم ومتعة جنونية من أول دقيقة لآخر دقيقه في الذهاب والاياب..
Abdallah Shoman

05/05/2025

دا انا اروح فيها..

24/04/2025

خلصتوا؟
أنا شايف ديلاب هو المهاجم الأنسب لمانشستر يونايتد حالياً
هو الأصغر والارخص وأقل لاعب هيطلب مرتب
لاعب انجليزي ولعب في البريميرليج والضغوط عليه أقل ومن السهل تأقلمه
اكيد الفريق في وضع مالي غير مناسب للتعاقد مع ايزاك ويمكن حتى جيوكريس
أوسيمين هيطلب مرتب عالي ومشاكله برا الملعب كتير
كمان صفقة ديلاب سهلة بمجرد هبوط ايبسوتش مانشستر قادر يدفع شرك جزائي قيمته ٣٠ مليون جنيه إسترليني فقط
صفقة ديلاب وكونيا الفريق يقدر يحسمهم قبل حتى نهاية الموسم الحالي والتركيز على بيع اللاعيبة وتدعيم باقي الفريق في مراكز أخرى
ديلاب عمره ٢٢ سنة
سجل في البريميرليج الموسم الحالي ١٢ هدف
أهدافه المتوقعة ٩.٠٢ هدف فقط!
معدل كويس مع فريق بيهبط زي ايبسوتش
كمان من الحاجات الي الفريق محتاجها ويمكن منشوفهاش مع اسم تاني هي قدرات ديلاب برا منطقة الجزاء
أنا بشوفه مناسب جداً في الاحتفاظ بالكورة وجودته بيها
دوره هيبقى مهم للفرق جداً في الخروج من الضغط والتحولات ودي من أكبر مشاكل الفريق الي بيعاني منها من سنين مع جميع لاعبي الهجوم تقريبا
الفرق بيكون واضح لما برونو بيلعب مهاجم زي مثلا مباراة سيتي في نهائي كاس الاتحاد والدرع الخيرية
تقدر تشوف خطورة الفريق وتعرف مدى احتياج الفريق لمهاجم قوى خارج منطقة الجزاء
محتاج مهاجم قادر يكسب ثنائيات ويعافر مع المدافعين عشان تقدر تتحرك لقدام
مانشستر يونايتد مش محتاج مهاجم بس هداف أو قوي داخل منطقة الجزاء
مانشستر يونايتد مش فريق هجومي أساسا بقاله سنين
ديلاب الأنسب بالنسبالي لوضع الفريق الحالي
حتى لو افترضنا نسخة أخرى من مانشستر أقوي هجوميا
ديلاب مش مهاجم وحش

مش بحب الحديث المبكر عن الصفقات وسوق الانتقالات والرهان على نجاح لاعب معين
لكن أنا براهن على ديلاب
Abdallah Shoman

24/04/2025

صياح جمهور مانشستر على صفقة ديلاب متعة ربنا يديمها نعمة