03/09/2026
Lieber Ewald,
Wir mechtn da nu wos dazöhn. Aufaunga duads im Sommer 2007 aufn Koimitzberger Fuaßboiplotz. A por 14- bis 17-Jährige haum se in den Kopf gesetzt, an Hobbyverein zu gründen und stehen zum ersten Mal bei einem Hobbyturnier am Platz. Kurz vor Turnierstart kuman wir owa drauf – Es fehlt uns ein Spieler!? Do hod da Bruckner Reini auf amoi a Idee: „He Jungs, I kenn do wen aus Koimitzberg!“ 30 Minuten später stehst du do! A topmotivierter Ewald reißt uns außa. Wir erreichen daun sogor Plotz 3, natürlich ah aufgrund einiger unhaltbaren Tore midn Spitz von dir! Und so worst bei unsern ollerersten Turnier dabei und ob daun nimma wegzumdenga.
In unserer Gruppn host das mit deiner Epilepsie und den damit verbundenen Alkoholverbot ned immer leicht ghobt. Du worst trotzdem mit uns im K1, bei irgendweche Ö3-Discos oder sunstige Festln bis um 4re mit dabei und host uns sogor daun nu hambrocht.
Owa jo, Ewald: Om Meisten wirst uns ois Freind aufn Fuaßboiplotz fehlen. Dei Begeisterung auch ois „Nicht-Spieler“ immer live dabei zu sein und mit uns mitzufiebern hod di ausgezeichnet. Du worst unser EDELFAN. Außerdem wirst uns ah ois Fuaßboller fehlen! Dasd vor ollem in den letzten Monaten deine körperlichen Schwierigkeiten überwunden host, um wieder beim FCSD im Kader zu stehen, zagt dei Begeisterung für unsern Verein. Beim ersten Spiel in der Saison bist du zum ersten Moi offiziell in der Mostviertel-Fußballliga zum Einsatz kuma – und host noch 10 Minuten glei dei erstes Tor gmocht. Wos noch an Tor vom Ewald folgt, braucht ma wohrscheinlich kan mehr dazöhn – dei unverwechselbarer Jubel samt Leiberl ausziang und auf dein Bauch (oder aufn Pauli) klopfen, is jo scho seit Jahren legendär. Diesen Jubel, den wir scho auf unzähligen Hobbyturnieren gseng haum, endlich ah amoi in der Liga zum seng, wor richtig fein. Wir hättn wirkli gehofft, dass ma dei Freid und dein Jubel in dera Saison nu öfter seng kinan.
Owa es hod ned sollen sein. Monche (ah nu so lustige und schene) Geschichten enden leider vü zu fruah. Hoffentlich kaunst jetzt scho gemütlich und ohne Sorgen auf uns owaschaun und auf diese Ort und Weise weiter mit uns mitfiebern.
Danke für ois!