15/08/2025
من وين تجيب قيمتك؟
هل هي من أفعالك، أعمالك، علمك، ذكائك ، نجاحاتك، شكلك، استعراضك لكل ماتملك وكل الاشياء اللي عندك ياها واللي شاطر فيها؟
طيب لو معك كل هدول،، ولسا في أشخاص مابتشوف قيمتك، مابتقدرك ومابتعاملك على حسب قيمتك
شو بتعمل؟
مرتاح تعيش مع شعور قلة القيمة مرات؟
بتقدر تتقبل هالشعور يعيش معك وداخلك
او بترتعب وبتخاف منه وبتكرهه
اكتشفت اني لسنين وسنين عملت كتير انجازات وحققت كتير اشياء وامتلكت صفات ومهارات رائعة، اهتميت بشكلي،
وحسيت انو هالشي ساعدني ارفع من قيمتي، اعتزيت فيها، وتفاخرت فيها
بس لما قابلت اشخاص ماشافو قيمتي !
ما قيّموها وما اعطوها قدرها من الاحترام والتبجيل
غضبت ، زعلت، مافهمت ! شو لازم اعمل اكتر حتى تشوف قيمتي!
اثبتلي انك شايفها حتى ارتاح! حتى اعرف كمل بحياتي وانا حاسة بالاكتمال مع نفسي لانك شايف قيمتي!
واليوم لما قعدت بتأمل طويل لاحتوي فيه كل المرات اللي شعرت فيها بقلة القيمة،، واديه هالشعور صعب ومليان احاسيس مزعجة وجسمي كان رافضه تماما
بعد كم ساعة محتولات احتواء وهضم هالشعور السخيف
حسيت انو لاول مرة قدرت استمتع فيه،، استرجع قوتي منه
ولما فتحتله قلبي،، وارتحت معه واحتويته
فجأة فتحلي كنز ،، حسيت في داخلي بحر مليان لولو وياقوت ومرجان وورد وأحجار كريمة وجوهره عميق وريحته فواحة واحساسه حب وراحة وسلام ،، شفت القيمة اللي حاملتها
مو بسبب انجازاتي ولا علمي ولا مهاراتي ولا عطائي
قيمتي اللي جاية من جوهري، من روحي من قلبي ومن كينونتي
القيمة والامانة اللي اعطاني ياها خالقي
الروح اللي نفخها فيني والنفس اللي اعطاني ياها
اديش هي ثمينة وقيمة، وانا مكرّمة باني احملها
باني كون مسؤولة عنها باني احتويها
هي القيمة جاية من عمق انوثتي، من جوهر مين أنا
هي القيمة مالها اسم ولا عمر ولا انجازات ومهارات ولا نجاحات
هي القيمة مو انا صنعتها هي بذرة كانت جواتي وفتّحت فيني
لما عانقت قلبي حسيت فيها اديه عميقة ونادرة ومميزة
لما رحمت حالي،، واحتويت شعوري بقلة القيمة،، قابلت بأعماقه قيمتي الحقيقية!🥹✨
حسيت بقيمة الانثى اللي كلنا حاملينها داخلنا، هي الانثى هي الأمانة هي الجوهر هي الاحساس هي الحب،، هي القيمة الحقيقية اللي منحملها اناثا وذكورا وهي اللي نحنا مسؤولين نحميها ونقدرّها لمجرد كينونتها ✨
شي مرة تجرأت تقابل قيمتك من خلال قلة قيمتك!!؟
