20/07/2018
أي ودادي حر ، كبر فوسط حر وولد عائلة حرة ، ورضع من بزولة مو حليب الحرية ، وتايفكر بطريقة حرة نقية نظيفة ، بعيدة عن الأفكار الغائطية ، ومتايتغوطش ليه شي واحد فدماغو ... غادي يكون غير راضي ابدا على دوك الخنيشات ديال ثوب حياتي لي لعبو بهم الوداد فكوناكري.
تايبقاو الوداديين مصدومين مبرزطين حاقدين على هاد الوضعية وكولشي باغي يعرف المسؤول على هاد المهزلة (الوداد فحزيران 2018 باقة تاتلبس تيشورتات ديال الجملة فالبال مطبوعين) قمة الظلم والحكرة وقمة تقزام لهاد النادي العريق أولا لا ا مونسيو دربوكة ؟
غانقصو عليكم قصة ماكرون (ماشي رئيس فرنسا)
القصة ديال ماكرون غاتبدا غالبا ف 2015 باقي ماتزادتش هاد الشركة فالمغرب.
كانو شي وداديين دارو حملة مقاطعة لواحد البوتيك سميتو بحال سمية ديال لوركازم عند العيالات (ج سبوط) غايخصك حرف كملو من عندك. ديك الساعة المقاطعة كانت تاتستهدف تونيات د اديداس لي بغى يقدفهوم للوداديين ب 600 درهم وصدقو خرجو فبوتيك اديداس وبلانيت سبور غير ب 390 درهم ، وتخور فيها مول ج سبوط تخويرة سانك سانك.
من بعد غادي يفكر مزيان وغادي يلقى الحل، أنه هاد شركة ج سبوط لي سميتو مشتقة من سمية ديال خالتي مليكة وبتواطؤ مع بلاك مان غادي يمشي يوقع كونطرا مع ماكرون، يعني غادي يشري حق استغلال اسم ولوغو ماكرون فالمغرب عليها دخلات الكافرة بالله للمغرب.
لي متايعرفش ماكرون فهي شركة دايرينها شي مافيوزيين أرباب أموال وأرباب بنوك باش تكون على شكل غطاء للأموال العفنة ديالهم وبمثابة غسالة تايغسلو فيها ويبيضوا فيها عوووماااار ديالهم. ولي معارفش معنى تبييض الاموال يمشي يبحث شوية ما فيها باس.
المافيوزي بلاك مان والمافيوزي ج سبوط لقاو فهاد ماكرون الضالة ديالهم، عندهم زايد ناقص كيصايبتي اوريجينال كي صايبتيهم ج سبوط وطبعتي فيهم ماكرون مغايتسوقوش ليك ومتايحكروش على النوار.
الجميل فهادشي كامل هي أن العقد مع ماكرون سالا من شحال هادي والوداد باقي تاتلعب بالماركة ديالهم.
والجميل اوس اثنان فهادشي هي أن بلاك مان ماشي مابغاش يدير الحل وإنما مغمس وخبزتو طايبة ومكرملة تما (دقيق كومبلي صحي ومتايديرش الام فالمعدة) ها علاش تيدافع فخرجة اعلامية ديالو على بوتيك ج سبوط وقاليك جيت ولقيتو تما ومكاينش لي يحيدو حيت قانوني
اسيدي هو استوطن داك المكان هانية بصحتو تا غايجي راجل مو لي غايقلعو من تما. ولكن اسي بلاك مان راه ارض الله واسعة يعني يقدر الانسان يدير سطورات فاي مكان ويبيع فيهم تونيات ديال جوطية فيهم لوغو د الوداد وبلا ماركة ولا شركة وكولشي غايشريهم ما دام غايعرف بنادم بلي الواك غتستافد. من غير هادشي بلا ماتغمق علينا راه متانصوتوش ومتناخدوش ربعالاف وماعندناش مع تهناد ديال الحملات الانتخابية.
هاد المرة خاص الوداديين يديرو عقلهم ويتاحدو لمرة وحدة فحياتهم ويقررو مقاطعة شاملة وكاملة لبوتيك ج سبوط وما يجي منو.
ولي قاطع الحليب ديال سبعين ريال راه غاتجيه ساهلة يقاطع مافيوزي تايحلب ففرقتو وتايغتاصب فيها ليلا ونهارا.
الحل بيديك خويا الودادي.
