18/07/2026
الترجي عندو توّا نهارين ولا ثلاثة يتدرّب في عين دراهم من ولاية جندوبة، والصراحة كي تشوف الأجواء تحس روحك في سويسرا ولا هولندا، من جمال الطبيعة، والغابات، والهواء النقي، وحتى البنية التحتية في المنطقة. ولاية جندوبة من أجمل الولايات في تونس، وعندها كل المقومات باش تكون وجهة رياضية وسياحية عالمية.
واللي يعجب أكثر، كل مرة نشوفو منتخبات وفرق عالمية تجي تتربص في عين دراهم وطبرقة، عمرنا ما شفنا فوضى ولا تزاحم ولا ناس تجري ورا اللاعبين باش تتصور. الفرق تخرج تتمشى في الغابات، وفي الطرقات، وحتى في وسط المدينة من غير حراسة أمنية مشددة، والناس تحترم خصوصيتهم، وهذا دليل على وعي أهل الجهة ورقيّهم.
لكن المؤسف أن ولاية جندوبة مازالت تعاني من التهميش، رغم أنها تملك كل الإمكانيات الطبيعية والسياحية والرياضية. من غير المعقول ولاية بهذا الجمال وبهذه المساحات الخضراء ما يكونش فيها ملعب كبير يليق بها، كيما ملعب رادس أو غيره. لو كان تلقى شوية اهتمام واستثمار، راهي جندوبة تنجم تولي من أبرز الوجهات السياحية والرياضية، موش في تونس فقط، بل في كامل إفريقيا.
جندوبة تستحق أكثر، وتستحق تكون في المكانة اللي تليق بتاريخها، بطبيعتها، وبأهلها.
