11/04/2026
فاطي سطر
محمد عبد الماجد
كان وبَر(كان).. الجزاء من جنس الاسم
😝😝😝😝
رئيس لجنة الانضباط في الاتحاد الأفريقي، السنغالي عثمان "كان"، الذي أصدر قرار إيقاف حمزة الموساوي لمدة شهر ثم رفع الإيقاف من أجل أن يشارك اللاعب أمام الهلال ذهاباً وإياباً، ثم أوقف اللاعب لمدة عامين من أجل ألا يشارك أمام الجيش الملكي، وهو الذي كان رئيساً للجنة الاستماع في شكوى الهلال، وهو الذي رفض شكوى الهلال؛ ليس غريباً عليه ذلك الذي فعله، فهو عثمان (كان)، وهي نهضة بر(كان)، والجزاء أو القرار من جنس الاسم.
صديقي قال لي : مفروض الهلال (كان) يفعل كذا، و(كان) ما يعمل كدا ، و(كان) لازم يتحرك قبل ذلك .. وكان وكان وكان ..
قلت ليه : كان شنو ؟ ، هو (كان) رئيس اللجنة يعني ليس في الإمكان أفضل مما (كان).
كان في خدمة بركان.
زمان كان عندنا جارنا اسمه عبد السميع الناصح، كان كل يوم الصباح الساعة تسعة يمشي الدكان ويقول لسيد الدكان: عاوز لي (طحنية).. وكان بصوت تبدو عليه بقايا النوم يقول لسيد الدكان: عليك الله صلحها. الزول ده من هو في سنة سادسة ابتدائي إلى أن نزل معاش هو في الحالة دي، ما حصل غاب عن الطحنية. يوم مشى الدكان بدري، وفي الوقت الذي اتجه فيه سيد الدكان نحو صفيحة الطحنية عندما رآه قادماً نحوه ببقايا نومه، قال له عبد السميع الناصح عندما وصل الدكان: اعمل لي (جبنة) بألف.
الطحنية مالها الليلة؟
يا ربي الحاصل شنو؟
الحلة كلها خنت أيدها في رأسها.
سيد الدكان والحلة استغربت وكان نفسهم يعرفوا السبب شنو؟ الذي جعل عبد السميع الناصح يغير من الطحنية إلى الجبنة كدة فجأة، ويطلب في ذلك اليوم الجبنة بدلاً من الطحنية التي اعتاد عليها.
البلد الحاصل فيها شنو؟ (الشمرجاوية) قالوا يدخلوا صفحته في الفيس ويشوفوا الحاصل شنو؟ الزول ده ماله؟
دخلوا صفحته لقوه عامل الحالة (يشعر بالحزن)، من اليوم داك، أي زول يجي يشيل ليه (جبنة) من الدكان، الجماعة كلهم بصوت واحد بيقولوا (يشعر بالحزن).
بعد انتقال كانتي للهلال، قالوا ليك أي مريخابي أصبح يأتي للدكان يشيل ليه (جبنة) ويرجع.. والجماعة شغالين وراءه يتغامزوا ويهمسوا فيما بينهم: (يشعر بالحزن).
إن شاء الله يا مريخاب رفض شكوى الهلال تبقى ليكم (طحنية).
