22/05/2026
*راولپنڈی کرکٹ کی تباہی*
راولپنڈی کرکٹ، جو کبھی پاکستان کرکٹ کا مضبوط قلعہ سمجھی جاتی تھی، آج زوال کی ایسی داستان بن چکی ہے کہ نہ میدان میں عزت باقی رہی اور نہ انتظامی سطح پر شناخت۔ ایک وقت تھا جب پنڈی کے کھلاڑی پاکستان ٹیم کی شان ہوتے تھے، مگر آج راولپنڈی کی ٹیم گریڈ ٹو میں جا پہنچی ہے۔ اور سینیئر ڈسٹرکٹ کا اٹک چیمپین ہے یہ صرف ایک ٹیم کی تنزلی نہیں بلکہ برسوں سے بیٹھے ہوئے “کرکٹ مافیا” کی ناکام پالیسیوں، اقربا پروری اور ذاتی مفادات کا نتیجہ ہے۔
حالات یہاں تک پہنچ گئے ہیں کہ اب راولپنڈی ریجن کی صدارت بھی جہلم کے پاس چلی گئی۔ سوال یہ ہے کہ آخر راولپنڈی ریجن کہاں گیا؟ کیا پنڈی میں قیادت ختم ہو گئی تھی؟ کیا اس شہر میں کوئی ایسا شخص نہیں بچا جو اپنے ریجن کی نمائندگی کر سکے؟
یہ وہی راولپنڈی ہے جس نے پاکستان کرکٹ کو بڑے بڑے نام دیے، مگر آج اس شہر کے ساتھ مسلسل ناانصافی ہو رہی ہے۔ چند مخصوص چہروں نے سالہا سال سے کرکٹ پر قبضہ جما رکھا ہے اور ان کی ناقص حکمت عملی نے پنڈی کرکٹ کو تباہی کے دہانے پر لا کھڑا کیا ہے۔
آج ضرورت اس بات کی ہے کہ راولپنڈی کی کرکٹ کو ان مفاد پرست عناصر سے آزاد کروایا جائے، میرٹ کو بحال کیا جائے، اور نوجوان ٹیلنٹ کو آگے لایا جائے۔ اگر اب بھی خاموشی اختیار کی گئی تو وہ دن دور نہیں جب راولپنڈی صرف ماضی کی ایک کہانی بن کر رہ جائے گا۔
