10/07/2026
هر لفظ ۾ درد، حق ۽ وفاداري آهي. خاص ڪري "ڊائري ۽ پيننَواري ڳالهه دل تي لڳي ٿي
محترم ايم پي اي صاحب
ڳوٺ حاجي الهوڌايو شر، تعلقو فيض گنج لاءِ فوري پيئڻ جي پاڻي جي فراهمي بابت فريادي اپيل
جناب عالي
عرض آهي ته اسان جو ڳوٺ حاجي الهوڌايو شر هر بنيادي سهولت کان محروم آهي. پر هن جديد دور ۽ سخت گرمي جي موسم ۾ پيئڻ جي صاف پاڻي جو نه هجڻ اسان لاءِ هڪ وڏو عذاب بڻجي ويو آهي.
جڏهن اسان پنهنجي معصوم ٻارڙن کي اسڪول کان واپسي تي يا ننڊ مان اٿڻ شرط هٿن ۾ پاڻي جون خالي بوتلون کڻي ويندي ڏسندا آهيون ته اکين ۾ ڳوڙها اچي ويندا آهن.
اڄ به اليڪشن جو اهو دور ياد آهي، جڏهن توهان پاڻ پنهنجي هٿ ۾ ڊائري ۽ پين کڻي آيا هئائو ۽ چيو هئو ته "پنهنجا سڀ مسئلا نوٽ ڪرايو". اسان خوش ٿي ويا هئاسين ۽ پنهنجي ٻچڙن کي آسرا ڏيندا هئاسين ته هاڻي اسان کي پيئڻ جو مٺو پاڻي ملڻ وارو آهي. پر اڄ زميني حقيقتون ڏسي ائين ٿو لڳي ڄڻ توهان جي ڊائري مان اسان جي ڳوٺ جو نالو ئي مٽجي ويو آهي!
اسان کي مڪمل يقين آهي ته توهان پنهنجي تڪ لاءِ اسڪيمون ڏئي رهيا آهيو، پر توهان جا اهي يو سي ليول جا نمائندا (چيئرمين ۽ جنرل سيڪريٽري) اسان جي ڳوٺ تائين حق پهچڻ ئي نٿا ڏين!
اهي يو سي وارا توهان کي پوري تسلي ڏئي ڪوڙيون رپورٽون پيش ڪن ٿا ته "اسان ديھ ننگر جي سڀني ڳوٺن ۾ ڪم ڪري ڇڏيا آهن" جڏهن ته زمين تي اسان وٽ ڪا به هڪ اسڪيم موجود ناهي. يو سي انتظاميا جي هن نااهلي ۽ من پسنديءَ جو نقصان اسان جو ڳوٺ ڀوڳي رهيو آهي.
سائين جن کي هٿ ٻڌي عرض آهي ته توهان پاڻ سوچيو، هن 40 کان 45 ڊگري گرمي ۾ 3 ڪلوميٽر پري کان اسان جا بزرگ، ۽ معصوم ٻارڙا ڪيڏي مشڪل سان پاڻي ڀري اچي پيئندا هوندا؟ توهان جا اهي ووٽر جيڪي هميشه پيپلز پارٽي (PPP) سان گڏ رهيا آهن، اڄ يو سي نمائندن جي غلط بياني جو شڪار آهن.
اسان توهان کان ٻي ڪا به وڏي سهولت نٿا گهرون، بس پنهنجي معصوم ٻارن جي بقا لاءِ پيئڻ جي واٽر سپلاءِ جو مٺو پاڻي گهرون ٿا.
اميد ته توهان يو سي ليول جي ڪارڪردگي جو پاڻ نوٽيس وٺي اسان کي هي جائز حق ڏياريندا.
العارض
ڳوٺ حاجي الله ودايو شر جا ووٽر ۽ رهواسي
تعلقو فيض گنج، ضلعو خيرپور ميرس
` `
Shaukat Rajpar Government NEWS
