22/05/2026
*کراچی میں قومی کھیل کو فروغ دینے کا مشن ، ڈسٹرکٹ کیماڑی میں خواجہ اظہار الحسن کی جانب سے ہاکی اسٹیکس تقسیم کی گئیں*
*کیماڑی سمیت شہر کے ہر ضلع میں کلب ہاکی کی بحالی ہماری اولین ترجیح ہے، خواجہ اظہار الحسن*
*ہاکی اسٹیکس کی فراہمی خواجہ اظہار الحسن کا قابل فخر اقدام ہے، فہیم پٹنی ممبر سندھ اسمبلی*
*بلدیہ ٹائون سمیت ڈسٹرکٹ کیماڑی کراچی ہاکی ایسوسی ایشن کیساتھ ہے ، فہیم پٹنی ممبر سندھ اسمبلی*
کراچی: شہر قائد میں قومی کھیل ہاکی کو فروغ دینے کا مشن ، کراچی ہاکی ایسوسی ایشن کے صدر خواجہ اظہار الحسن کی جانب سے ڈسٹرکٹ کیماڑی کے ہاکی کلبز میں ہاکی اسٹیکس تقسیم کی گئیں ، کے ایچ اے کی جانب سے ہاکی اسٹیکس بلدیہ ٹائون کے ممبر صوبائی اسمبلی فہیم پٹنی کے حوالے کی گئیں ، کراچی ہاکی ایسوسی ایشن کے وفد نے کے ایچ اے کے سینئر نائب صدر لطافت حسین شاہ کی قیادت میں بلدیہ ٹائون کے کلبز اور ممبر صوبائی اسمبلی فہیم پٹنی سے ملاقات کی ، کے ایچ اے کے وفد میں پاکستان انڈر 18 ہاکی ٹیم کے ہیڈ کوچ اولمپئین قمر ابراھیم ، پاکستان جونیئر ہاکی ٹیم کے کوچ اولمپئین سید سمیر حسین ، عظمت پاشا ، سید آل حسن اور دیگر بھی شامل تھے۔
وفد نے کے ایچ اے کے صدر خواجہ اظہار الحسن کا پیغام بھی پہنچایا ، وفد نے کہا کہ خواجہ اظہار الحسن چاہتے ہیں کہ کراچی میں کلب ہاکی فروغ پائے جبکہ ہاکی کو فروغ دینا انکی اولین ترجیح ہے ، کلب ہاکی مضبوط ہوگی تو ایسوسی ایشن مضبوط ہوگی جس کیلئے وہ ہر ممکن کوشش کرینگے ، ہاکی اسٹیکس کی فراہمی بھی اسی سلسلے کی کڑی ہے ، انہوں نے کہا کہ بلدیہ ٹائون میں ہاکی آسٹروٹرف کی تنصیب سے یہاں کے کھلاڑیوں کو اب ہاکی کھیلنے کے بہتر مواقعے میسر آئینگے ، بلدیہ ٹائون میں بہت ٹیلنٹ ہے ماضی میں یہاں سے بے شمار کھلاڑیوں نے مختلف ادوار میں کراچی کی ٹیموں میں اپنی صلاحیتوں کا لوہا منوایا ہے ۔ انہوں نے کہا کہ بہت جلد بلدیہ ٹائون میں انٹر کلب ہاکی ٹورنامنٹ منعقد کیا جائیگا جبکہ دوسرے مرحلے میں ڈسٹرکٹ کیماڑی کے اسکولوں میں ہاکی اسٹیکس تقسیم کی جائینگی ۔
اس موقع پر فہیم پٹنی نے وفد اور خواجہ اظہار الحسن کا شکریہ ادا کرتے ہوئے انکی کوششوں کو قومی کھیل کے فروغ کیلئے قابل فخر اقدام قرار دیا انہوں نے کہا کہ انہیں یقین ہے کہ بلدیہ ٹائون میں ہاکی آسٹروٹرف کی تنصیب کے بعد یہاں کے نوجوانوں کو کھیل کے بہتر مواقعے میسر آئینگے ، بلدیہ ٹائون کے نوجوان اپنے شہر کیساتھ اپنے ملک کا نام روشن کرینگے ، خوبصورت ہاکی اسٹیڈیم بن تو گیا ہے اسکی حفاظت کرنا کراچی ہاکی ایسوسی ایشن کی ذمہ داری بھی ہے ، خواجہ اظہار الحسن سندھ گورنمنٹ کیساتھ ملکر اس گرائونڈ کو آباد کرینگے اور یہاں کے نوجوانوں کو کھیل کے مواقعے فراہم کرینگے ۔
