19/03/2025
کعبے نہیں جانا، بس کعبے کی طرف رخ کرنا ہے!
ویرات کوہلی سے کسی نے کہا کہ آپ پاکستانی بیٹسمینوں کو بھی ٹپس دیا کریں تاکہ ایشیائی کرکٹ بہتر ھو-
"ویرات کوہلی نے جواب دیا،" پاکستانی بیٹسمینوں کے پاس بیٹھو تو وہ ہیوی بائیکس،بنگلوں، کوٹھیوں اور گاڑیوں کی باتیں کرتے ہیں،یوں لگتا ھے وہ عمدہ کرکٹ میں دلچسپی نہیں رکھتے، صرف کرکٹ کے زور پہ امیر بننا چاہتے ھیں۔"
مجھے تو یہ گپ لگتی ہے، ویرات کوہلی کو تو اپنے "سجنے سنورنے" سے ہی فرصت نہیں؛ اسے پاکستانی کرکٹر سے کیا دلچسپی ہو سکتی ہے- کرکٹ کے حوالے سے وہ "خودغرض" ہے- یار لوگ کہانیاں بنا دیتے ہیں- کپتانی نے ویرات کی کرکٹ کو نقصان پہنچایا تو کپتانی کو ہی لات مار دی- اور پھر وہ ایسے ملک کی ٹیم کا حصہ ہے جس نے جوڑ توڑ کر کے اس ایونٹ کے میزبان کا تیا پانچہ کر دیا، حد یہ کہ فائنل کی اعزازی تقریب میں پاکستان کرکٹ بورڈ کا کوئی بندہ دکھائی نہ دیا- انڈیا نے چیمپیئنز ٹرافی جیت لی لیکن اخلاقی محاذ پر بری طرح ہار گیا-
ویسےامیر بننے میں کوئی برائی نہیں؛ یہ تو بہت عمدہ خواہش ہے- اصل مسلہ تب ہوتا ہے جب لوگ غلط طریقوں سے جھٹ پٹ راتوں رات امیر بننا چاہتے ہیں اور محض پرتعیش زندگی گزارنا چاہتے ہیں- ایسے لوگوں کی زندگی ڈراؤنا خواب بن جاتی ہے-
ویرات کوہلی بھی بہت امیر ہے لیکن اس کی نظر ہمیشہ بال پر ہوتی ہے یا پھر اپنی نشو و نما پر! صحیح طریقوں سے ہلکی آنچ پر امیر بننے والا ، صرف امیر نہیں بنتا ، لاجواب انسان بھی بنتا ہے- دولت بائی پروڈکٹ ہوتی ہے امیر ہونے کی-
ہمارے کرکٹر یا ہم سب سچ میں امیر بننا چاہتے ہیں تو لاجواب انسان بننا شروع کر دیں، ہمیں خبر بھی نہیں ہوگی ہم امیر بن جائیں گے-
امیر بنیئے! یہ امیر بننے کی وجہ اس لفظ کے اندر چھپی ہے- اور یہ برانڈ نیو وجہ لفظ امیر کے اندر چھپی ہوئی ہے- امیر کا مطلب ہے لیڈر، امام، سربراہ ، قائد اور سردار-جیسے کاشتکاری کے قوانین ہوتے ہیں، ایسے ہی کرکٹ کے بھی قوانین ہوتے ہیں، اور بالکل ایسے ہی امیر بننے کے بھی قوانین ہوتے ہیں ، بس انہیں تسلیم کر لیں- آپ کو پرفیکٹ نہیں ہونا، بس رخ سیدھا کرنا ہے -
کعبے نہیں جانا، بس کعبے کی طرف رخ کرنا ہے!
تحریر: Liaquat Khan
