27/08/2026
اسلام آباد ہاکی کی ترقی اور فروغ کے لیے اہم ملاقات
اسلام آباد: اسلام آباد ہاکی ایسوسی ایشن کے سینئیر ممبر سید سلیم رضا اور مرزا نوید احمد کی سرپرست اعلیٰ اسلام آباد ہاکی ایسوسی ایشن سید ذیشان علی نقوی سے ملاقات ہوئی۔ ملاقات خوشگوار ماحول میں ہوئی، جس میں اسلام آباد میں ہاکی کے فروغ، گراؤنڈ لیول پر کھلاڑیوں کی حوصلہ افزائی اور ہاکی کی ترقی کے مختلف امور پر تفصیلی تبادلۂ خیال کیا گیا۔
اس موقع پر سید ذیشان علی نقوی، جو وزیراعظم یوتھ پروگرام کے ترجمان بھی ہیں، کو اسلام آباد ہاکی ایسوسی ایشن کے Patron-in-Chief کی ذمہ داریاں سنبھالنے کے بعد ایسوسی ایشن کی پالیسی، کردار، مقاصد اور جاری سرگرمیوں کے حوالے سے خصوصی بریفنگ دی گئی۔
سید ذیشان علی نقوی نے وزیراعظم یوتھ پروگرام اور اسلام آباد ہاکی ایسوسی ایشن کے باہمی تعاون سے اسلام آباد میں ہاکی کے فروغ کے لیے بھرپور کردار ادا کرنے کے عزم کا اظہار کیا۔ اس سلسلے میں 6 ستمبر کو اسلام آباد سپورٹس بورڈ الیون اور وزیراعظم یوتھ پروگرام الیون کی گرلز ہاکی ٹیموں کے درمیان میچ منعقد کرنے کا فیصلہ کیا گیا ہے۔ میچ کا مقصد اسلام آباد میں ہاکی کو فروغ دینا، گراس روٹ لیول پر ٹیلنٹ کو سامنے لانا اور پاکستان کے یومِ دفاع کو بھی بھرپور انداز میں منانا ہے۔
میچ کے مہمانِ خصوصی رانا مشہود احمد خان ہوں گے، جو وفاقی وزیر اور وزیراعظم یوتھ پروگرام کے ترجمان بھی ہیں۔
دریں اثناء اسلام آباد ہدف ہاکی کلب و اکیڈمی کی جانب سے سید ذیشان علی نقوی کو کلب کا چیئرمین منتخب ہونے پر صدر سید سلیم رضا نے کلب کی کلر شرٹ بطور تحفہ پیش کی اور چیئرمین کی حیثیت سے تقرری کا نوٹیفکیشن بھی پیش کیا۔ سید ذیشان علی نقوی اب اسلام آباد گرلز اینڈ بوائز ہاکی اکیڈمی کے لیے اپنی خدمات انجام دیں گے۔
اس موقع پر سید ذیشان علی نقوی نے اس عزم کا اظہار کیا کہ اسلام آباد میں ہاکی کے فروغ کے لیے بھرپور اقدامات کیے جائیں گے، اسلام آباد ہاکی ایسوسی ایشن کو درپیش مسائل کے حل کے لیے اپنا کردار ادا کیا جائے گا، اسپانسرشپ حاصل کی جائے گی اور ہر سطح پر کھلاڑیوں کو سپورٹ فراہم کی جائے گی۔ انہوں نے اسلام آباد ہاکی ایسوسی ایشن کی جدید ہاکی اکیڈمی کے قیام کے لیے بھی اپنی بھرپور کوششیں جاری رکھنے کے عزم کا اظہار کیا۔
ملاقات کے اختتام پر پاکستان ہاکی فیڈریشن سے خصوصی اپیل کی گئی کہ اسلام آباد ہاکی ایسوسی ایشن کے ہاکی فروغ پروگرام میں بھرپور تعاون اور مکمل معاونت فراہم کی جائے تاکہ اسلام آباد میں گراس روٹ لیول سے قومی سطح تک نئے ٹیلنٹ کو آگے لایا جا سکے۔
