19/06/2026
اوول ٽيسٽ
انگلينڊ ــ نيوزيلينڊ
رچن رويندرا ۽ نڪولس جي شاندار بيٽنگ
نيوزيلينڊ جي انگلينڊ خلاف 352 رنسن جي سگهاري ليڊ
لنڊن جي اتھاسڪ اوول گرائونڊ تي جاري ٻي ٽيسٽ ميچ جي ٽئين ڏينھن ڪيوي ٽيم راند ۾ گهڻي اڳيان نڪري ويئي آھي. 100 رنسن جي ليڊ اڳيئي ھئن. 252 ٺاھيون بيٺا آھن. اِھي ٿيون: 352 رنسون. 7 وڪيٽون بہ ھٿ ۾ اٿن. لڳي ٿو، سڀاڻي 500 جي ليڊ تي ڊڪليئر ڪندا. ڀلا جي 100 رنسون بہ وڌيڪ ٿا ٺاھين، تڏھن بہ انگلينڊ لاءِ گهڻيون ھونديون، جو انگريز گذريل ٿورن ڏھاڙن دوران وڏيءَ اٿل پٿل مان گذريا آھن. بين اسٽوڪس ۽ ايٽڪنسن تي ھلندڙ جاچ ۽ پوري ملڪ ۾ ھُل رانديگرن جي ذھن تي سڌيءَ اڻسڌيءَ طرح ڇانيل آھي.
اڄ انگلينڊ راند شروع ڪئي تہ اسڪور 222 ھو ۽ 6 رانديگر آئوٽ ھئا. پر ميٽ ھينري ڪنھن کي بہ نہ بخشيو. ھڪ ٻئي مٿان جارڊن ڪاڪس، آرچر ۽ ٽونگ جون وڪيٽون ورتائين. انگلينڊ جو اسڪور ھو: 238 ۽ 9 رانديگر آئوٽ هئا. پر ميٿيو فشر مزاحمت ڪئي. ڀلي راند ڪيائين. ھن آخري وڪيٽ تي 53 رنسن جي اھم پارٽنرشپ سوني بيڪر سان گڏجي ڪري انگلينڊ جو اسڪور 291 تائين رسايو. بيڪر کي جيميسن آئوٽ ڪيو ۽ فشر ناٽ آئوٽ رھيو.
نيوزيلينڊ جي شروعات چڱي نہ ھئي. 28 رنسن تي ٻئي اوپنر آئوٽ ٿي ويا. ليٿم 4 ۽ ڪان وي 11 رنسون ٺاھيون. پوءِ ھينري نڪولس ۽ رچن رويندر ڄمي بيھي رھيا. 161 رنسن شاندار پارٽنرشپ ڪيائون. انگلينڊ جا فاسٽ بالر بيوس ڏٺا ويا. وڪيٽ اچي جيڪب بيٿل ورتي. ھن رچن رويندر کي 76 رنسن کي ايل بي ڊبليو ڪيو. اسڪور ھو 189. اُتان اسڪور کي 252 تائين ھينري نڪولس ۽ ڊيرل مچل پڄايو. نڪولس شاندار راند کيڏي. 119 رنسن تي ناٽ آئوٽ رھيو. نڪولس جي اِھا 11ھين سينچري ھئي ۽ انگلينڊ جي سرزمين تي پھرين.
ٽئين ڏھاڙي جي خاص ڳالهين ۾ ميٿيو فشر جي ففٽي، ميٽ ھينري جون 5 وڪيٽون ۽ نڪولس جي سينچري ۽ نڪولس ۽ رويندر جي 161 رنسن جي پارٽنرشپ شامل آھن.
اڃا ٽيسٽ جا 2 باقي آھن. لڳي نہ ٿو، انگلينڊ راند ۾ واپس اچي سگهندي. ڪا موسم جي مٿن مھرباني ٿئي يا ٻي اننگ ۾ جو رُوٽ ۽ ھيري بروڪ وڏيون اننگون کيڏن تہ ٻي ڳالهہ آھي. باقي آسرو گهٽ آھي. ٽيسٽ انگلينڊ ھٿان نڪتي پئي آھي.
