27/08/2026
"CORRECT ME IF I'M WRONG, BUMAHA AT BUMAGYO NG BIYAYA" - LUISTRO ‼️
Muling umani ng atensyon sa social media ang isang pahayag ni Batangas Rep. Gerville Luistro matapos lumutang online ang bahagi ng kanyang talumpati na tumatalakay sa pagdating ng iba’t ibang programang ayuda sa kanilang distrito.
Sa naturang pahayag, binanggit ni Luistro ang kasalukuyang administrasyon ni Pangulong Ferdinand Marcos Jr. at ang naging liderato noon ni dating House Speaker Martin Romualdez habang tinatalakay ang mga programang Assistance to Individuals in Crisis Situation (AICS), Ayuda para sa Kapos ang Kita Program (AKAP), at Tulong Panghanapbuhay sa Ating Disadvantaged/Displaced Workers (TUPAD).
Ayon sa kongresista, kapansin-pansin umano ang dami ng tulong na naihatid sa kanilang lugar sa panahong ito.
Sa kanyang pahayag, sinabi niya: “Sa panahon ni President Bongbong Marcos, sa panahon ni Speaker Martin Romualdez, correct me if I am wrong, bumaha at bumagyo ng biyaya.”
Dahil sa muling pagkalat ng naturang video clip at mga screenshot ng kanyang pahayag, naging paksa ito ng diskusyon sa iba’t ibang social media platforms.
May mga netizen na nagpahayag ng pagsang-ayon habang mayroon ding nagbigay ng kani-kanilang pananaw hinggil sa naging pahayag ng mambabatas.
Ikinokonekta ni Luistro sa kanyang talumpati ang pag-abot ng mga programang pang-ayuda sa papel ng pambansang liderato, na aniya ay nakatulong sa pagdadala ng mga benepisyo sa kanilang nasasakupan.
Patuloy namang umiikot online ang naturang pahayag kasabay ng mga talakayan tungkol sa implementasyon at distribusyon ng mga programang ayuda ng pamahalaan sa iba’t ibang bahagi ng bansa.
