21/12/2025
खेलकुदमा खेलाडीको भविष्य सुरक्षित गर्न माग
दाङ, ६ मंसिर । दाङको घोराही उपमहानगरपालिकामा क्रियाशील गोर्खा स्कुल हाप्किडो डोजाङ तथा शुभसन्देश शिक्षा सदन स्कुल हाप्किडो डोजाङले नेपालमा खेलकुद क्षेत्रप्रति देखिँदै आएको दीर्घकालीन सरकारी बेवास्ताप्रति गम्भीर असन्तुष्टि व्यक्त गर्दै संघीय, प्रदेश तथा स्थानीय सरकारलाई स्पष्ट जिम्मेवारी बहन गर्न सार्वजनिक आह्वान गरेका छन्।
डोजाङ प्रमुख बिशाल थापाद्वारा जारी विज्ञप्तिमा खेलकुद क्षेत्रलाई नीति र भाषणमा मात्र सीमित राखिएको आरोप लगाएका छन। स्थानीय तहदेखि संघीय सरकारसम्म समन्वयको अभाव, अस्थिर बजेट व्यवस्था तथा दीर्घकालीन योजनाको कमीका कारण प्रतिभावान खेलाडीहरू अवसरबाट वञ्चित हुँदै गएको उल्लेख गरिएको छ। विशेषगरी स्थानीय सरकारले खेलकुदलाई प्राथमिकतामा नसमेट्दा गाउँ–नगरस्तरका खेलाडीहरू प्रारम्भिक चरणमै निराश हुन बाध्य भएको जनाइएको छ।
डोजाङ प्रमुख थापाले खेलकुद विकासको पहिलो आधार स्थानीय सरकार नै भएको स्पष्ट पार्दै भने, “खेलाडी जन्मिने ठाउँ स्थानीय तह हो। यदि स्थानीय सरकारले नै खेलकुदलाई बेवास्ता गर्छ भने राष्ट्रिय सपना कहिल्यै साकार हुँदैन। खेलकुद दया होइन, अधिकार हो।”
उनका अनुसार धेरै स्थानीय तहमा खेलकुद बजेट औपचारिकतामा सीमित रहेको, प्रशिक्षण केन्द्रको अभाव रहेको र प्रतियोगिता अनियमित रूपमा सञ्चालन हुँदै आएका छन्। यसका कारण युवा खेलाडीहरू वैकल्पिक रोजगारी वा पलायनतर्फ धकेलिनु परेको उनको भनाइ छ।
थापाले स्थानीय, प्रदेश र संघीय सरकारबीच स्पष्ट कार्यविभाजन आवश्यक रहेको बताउँदै स्थानीय सरकारले विद्यालयस्तरदेखि डोजाङ र क्लबहरूसम्म संरचना विकासमा लगानी गर्नुपर्ने, प्रदेश सरकारले प्रतियोगिता तथा प्रशिक्षक विकासमा भूमिका खेल्नुपर्ने र संघीय सरकारले राष्ट्रिय खेलकुद नीति, अन्तर्राष्ट्रिय सहभागिता तथा दीर्घकालीन रणनीति सुनिश्चित गर्नुपर्ने माग गरेका छन्।
“सरकारका सबै तह जिम्मेवार नबन्दासम्म खेलकुद केवल भाषणमै सीमित हुन्छ,” उनले भने , “अब दोषारोपण होइन, जिम्मेवारी बहन गर्ने समय हो।” उनले निजी क्षेत्र, उद्योगी, समाजसेवी, अभिभावक तथा खेलप्रेमीहरूलाई पनि स्थानीय सरकारसँग सहकार्य गर्दै खेलकुद पूर्वाधार, छात्रवृत्ति तथा प्रतियोगिता सञ्चालनमा सहयोग गर्न आग्रह गरेका छन् ।
सीमित स्रोत–साधन र चुनौतीपूर्ण अवस्थाका बाबजुद पनि गोर्खा स्कुल हाप्किडो डोजाङ र शुभसन्देश शिक्षा सदन स्कुल हाप्किडो डोजाङले अनुशासन, आत्मरक्षा, आत्मविश्वास र राष्ट्रगौरवको भावना बोकेका खेलाडी उत्पादन गर्दै आएका छन्। यी डोजाङहरूले स्थानीय स्तरमै खेलकुद संस्कृतिको विकासमा महत्वपूर्ण भूमिका खेल्दै आएका छन्।
