15/09/2026
समाचार सम्प्रेषण का लागि Sajilo News लाई धेरै धन्यवाद 🏏
फाइनलअघि सेलिब्रिटी क्रिकेट उत्सवको शानदार जित, टिम ओनर्स १६ रनले पराजित।
र्यापर भ्यौमा र दिलीप ओखेडाको ५३ रनको साझेदारी निर्णायक।
काठमाडौं । इन्डोर सुपर लिग (आईएसएल) सिजन–२ को फाइनलअघि आयोजित मैत्रीपूर्ण क्रिकेट खेलमा सेलिब्रिटी क्रिकेट उत्सवले इन्डोर सुपर लिगका टिम ओनर्सलाई १६ रनले पराजित गरेको छ। सेलिब्रिटी टोलीले प्रस्तुत गरेको ९४ रनको लक्ष्य पछ्याएको टिम ओनर्स ७७ रनमै समेटिएपछि सेलिब्रिटी टोलीले सहज जित हात पारेको हो।
टस जितेर सेलिब्रिटी क्रिकेट उत्सवका कप्तान विवेक खतिवडाले पहिले ब्याटिङ गर्ने निर्णय गरेका थिए। १० ओभरको खेलमा सेलिब्रिटी टोलीले निर्धारित ओभरमा ९३ रन बनाउँदै टिम ओनर्ससामु ९४ रनको लक्ष्य प्रस्तुत गरेको थियो।
सेलिब्रिटी टोलीको इनिङ्समा र्यापर भ्यौमा र दिलीप ओखेडाबीचको ५३ रनको साझेदारी जितको आधार बन्यो। त्यस्तै, सौगात विष्टले २२ रनको योगदान गर्दै टोलीलाई प्रतिस्पर्धात्मक योगफलसम्म पुर्याए।
लक्ष्य पछ्याउने क्रममा टिम ओनर्सले सुरुदेखि नै सेलिब्रिटी टोलीको कसिलो बलिङको सामना गर्नुपरेको थियो। कलाकार भरत कार्कीले एक तथा मोडल पुरुषोत्तम मलिकले दुई विकेट लिए। सौगात विष्ट र दिलीप ओखेडाको अनुशासित बलिङसामु टिम ओनर्सको ब्याटिङ जम्न सकेन।
अन्ततः टिम ओनर्सको इनिङ्स ७७ रनमै सीमित भएपछि सेलिब्रिटी क्रिकेट उत्सवले १६ रनको शानदार जित दर्ता गर्यो।
मैत्रीपूर्ण खेलमा सेलिब्रिटी क्रिकेट उत्सवका सल्लाहकार विक्की कार्की, कलाकार कुमार कट्टेल, टंक तिमिल्सिना, रवि ओड, निर्देशक सुरेश न्यौपाने लगायतका कलाकार तथा विभिन्न क्षेत्रका व्यक्तित्वहरूको उपस्थिति रहेको थियो। टोलीको संयोजन सेलिब्रिटी क्रिकेट उत्सवका को–फाउन्डर सञ्जीव उपाध्यायले गरेका थिए।
इन्डोर सुपर लिग नेपालको पहिलो फ्रेन्चाइजमा आधारित इन्डोर क्रिकेट प्रतियोगिता हो। प्रतियोगिताको दोस्रो संस्करण भदौ २२ देखि २८ गतेसम्म काठमाडौंको गोल्फुटारस्थित भेलोसिटी एरेनामा आयोजना हुँदैछ।
दोस्रो संस्करणमा काठमाडौं कैलाश किंग्स, सुदूरपश्चिम टाइगर्स, पोखरा वारियर्स, माया हेटौंडा रोयल्स, मिक्सम्यान्डु, बुटवल एम्पायर्स, ललितपुर अलस्टार्स, लुम्बिनी योर्कर्स, जनकपुर किंग्स र विराटनगर बटालियन गरी १० फ्रेन्चाइज टोलीले प्रतिस्पर्धा गर्नेछन्।
प्रतियोगिताको आधिकारिक प्रसारण साझेदार कान्तिपुर टेलिभिजन रहेको छ।
