30/08/2026
Fredagskvelden vår i Yacht Club Fallersleben, var utanom det vanlege triveleg. Hamna er ganske liten, men ligg lunt plassert like ved kanalen. Me stikk baugen vår forsiktig inn den relativt smale inngangen frå kanalen. Me står på «lemmen» med god oversikt, og ser ein ledig plass, og glir sakte inn. Brått høyrer me nokon som ropar!
Og der i eine kortenden av hamna sit 8-10 personar som alle - alle vinkar oss bort til deira brygge og byr oss stor god plass mellom dei! Smilande, gjestfrie og hjelpsomme! Me er fortøyd på èin to tre! Etter ei lita stund byr dei på jordbær snaps! Dei snakkar kun tysk og bedyrar at engelsk kan dei ikkje😀. Uansett særs trivelege og i møtekommande!
Det er naudsynt for oss å handle «lebensmittel», og ein eldre kar byr seg omgåande til å køyre oss, når han forstår at me har tenkt å gå til butikken. Me takkar ja, det var trass i alt ca 3 km tur/retur. Dette gjer han gjerne for langvegsfarande i hamna si.
Etter kvart som kvelden går, vert det litt prat med fleire. Det viser seg at det å snakka engelsk er lettast når det ikkje er så mange som høyrer på.
Ein kar har reist mykje til Noreg for å fiske. Han drøymer om å sigle med eigen båt til Noreg - Lofoten -Island - Spitsbergen.
Hamneverten snakkar villig i veg om smått og stort, når eg betaler hamneavgift, og han veit ikkje kva godt han skal by oss.
Så er det dama som har vore i Noreg mange gonger (5) - elskar Bergen, var på Fløyen når dei store adventslysa vart tent, og har aldri hatt regn i Bergen. Til slutt, med tårer i augene, kondolerer ho oss i høve Kong Haralds bortgang. Ho har følgd med på sendingane i tysk TV heile dagen.
Litt seinare på kvelden høyrer me på Kong Håkon VIII sin tale.
