23/08/2026
Монгол Улсын Гавьяат дасгалжуулагч Л.Жамьянсүрэн, Гавьяат тамирчин Д.Дэмбэрэл нарын нэрэмжит 2026 оны Байт харвааны тэмцээн 3 өдрийн турш Төв аймгийн Зуунмод хотын Төв цэнгэлдэх хүрээлэнд амжилттай зохион байгуулагдаж өндөрлөлөө.
Тэмцээнд Гавьяат дасгалжуулагч Л.Жамьянсүрэн багшийн охин ОУХМ Ж.Удвал оролцсон бөгөөд тус тэмцээнд Л.Жамьянсүрэн багшийн Хэнтий аймгаас төрсөн отгон шавь ОУХМ Б.Урантунгалаг, Г.Ган-Эрдэнэ, Ө.Цэрэнмядаг, Ц.Нямхатан нараас өсөх ирээдүйтэй залуу тамирчдыг болон шинэ тутамд хөгжиж буй Компаундын төрлийн тэргүүн байранд орсон тамирчдыг урамшуулж мөнгөн урамшуулал олголоо. Тус нэрэмжит шагнал маань цаашид Гавьяатын нэрэмжит тэмцээнээр уламжлал болон олгогдох юм. Түүнчлэн, алс холын Швед болон АНУ-д ажиллаж амьдарч буй Гавьяат дасгалжуулагч Л.Жамьянсүрэнгийн шавь н.Рэгзэдмаа болон СМ Т.Амаржаргал нар тус тэмцээний үйл ажиллагаанд дэмжлэг үзүүлж мөнгөн хандив ирүүлсэнд талархаж буйгаа илэрхийлье. Мөн Л.Жамьянсүрэн багшийн гэр бүлээс 1.000.000 төгрөгийн хандив ирүүлсэн бөгөөд тус хандивыг тамирчдын тэмцээн уралдаанд ашиглах цаг авахад зориулах юм.
Тэмцээний бас нэгэн сэтгэл хөдөлгөсөн мөч болох Л.Жамьянсүрэнгийн охин ОУХМ Ж.Удвал багшийнхаа үйл хэргийг залгамжлан өнөөдрийг хүртэл байт харвааны шигшээ багт хичээллэн өндөр амжилт гаргасан тамирчин, олон шавь төрүүлэн дасгалжуулагчаар ажиллаж буй ОУХМ Г.Ган-Эрдэнэ болон Үндэсний шигшээ багийн тамирчин, 2 удаагийн Олимпын наадамд эх орноо төлөөлөн амжилттай оролцсон ОУХМ Б.Урантунгалаг нарт Л.Жамьянсүрэнгийн нэрэмжит тусгай шагнал олголоо.
Монголын байт харвааны холбооноос тэмцээнд баг тамирчдаа зохион байгуулж амжилттай оролцуулсан нэр бүхий 8 дасгалжуулагчид нийт 1000 ам.долларын үнэ бүхий байт харвааны спортын жижиг хэрэгсэл гардуулж урамшууллаа.
Тэмцээнээ хүндэтгэн ирж оролцсон нийт дасгалжуулагч, тамирчид, баг хамт олондоо дахин талархаснаа илэрхийлж амжилт хүсье.
Төв аймгаас төрөн гарсан Монгол Улсын анхны дэлхийн аварга, Гавьяат тамирчин Д.Дэмбэрэл, Гавьяат дасгалжуулагч Л.Жамьянсүрэн нарын гавъяаг мөнхлөх, алдрыг дуурсгаж, хойч үед нь таниулах, залгамж халааг бэлтгэхэд энэхүү тэмцээний гол зорилго орших бөгөөд 30 гаруй жил хамтран зохион байгуулж, дэмжин тусалсаар ирсэн Төв аймгийн болон тус аймгийн Биеийн тамир, спортын газар, Баян-Өнжүүл, Баянцагаан сумдын үе үеийн удирдлагуудад гүн талархал илэрхийлье.
