https://www.facebook.com/880597868473678/

We Love Arsenal 2024 Myanmar, Yangon (2026)

05/10/2026

***ဒဏ်ရာကြောင့် နိုင်ငံကနေ အာဆင်နယ်ဆီပြန်လာရတဲ့ နောက်ခံလူ***

အာဆင်နယ်အသင်းရဲ့ နောက်ခံလူ အက်ဇ်ရီ ကွန်ဆာဟာ ဒဏ်ရာပြသနာကြောင့် အင်္ဂလန် လက်ရွေးစင်အသင်းကနေ နှုတ်ထွက်ပြီး အသင်းဆီ ပြန်လည်ရောက်ရှိလာပြီ ဖြစ်ပါတယ်။

ကွန်ဆာဟာ အင်္ဂလန်လက်ရွေးစင်အသင်းနဲ့ သွားရောက်မပူးပေါင်းခင်ကတည်းက ဒဏ်ရာအနည်းငယ် ရနေခဲ့တာ ဖြစ်ပါတယ်။ ဒါပေမယ့် သူဟာ အင်္ဂလန်အတွက် နှစ်ပွဲကစားပေးခဲ့ပြီး ဒဏ်ရာအခြေအနေ ပိုဆိုးလာခဲ့တဲ့အတွက် အသင်းဆီ ပြန်လည်ရောက်ရှိလာတာ ဖြစ်ပါတယ်။

ကွန်ဆာရဲ့ ဒဏ်ရာအခြေအနေဟာ ဘယ်လောက်အထိ ပြင်းထန်သလဲဆိုတာကိုတော့ မသိရသေးပါဘူး။ ဒါပေမယ့် လာမယ့်စနေနေ့မှာ ကစားမယ့် လိဒ်ယူနိုက်တက်နဲ့ပွဲစဉ်ကိုတော့ ကစားနိုင်ဖို့ မျှော်လင့်ချက် ရှိနေပါတယ်။

04/10/2026

အာဆင်နယ်အသင်းဟာာ အဓိကကွင်းလယ်လူ ဒီကလန်ရိုက်စ် အား စာချုပ်သက်တမ်းတိုးမြှင့်ဖို့အတွက် ဆွေးနွေးမှုတွေ ပြုလုပ်လျက်ရှိ‌နေပြီး အဆိုပါ ဆွေးနွေးမှုများဟာ အပြုသဘောဆောင်တဲ့ တိုးတက်မှုတွေရှိနေကြောင်း သိရပါတယ်။
အာဆင်နယ်အသင်းအတွက် အရေးကြီးတဲ့ ကစားသမားတစ်ဦးဖြစ်ရှုမြင်ထားပြီး အသင်းမှာ ရေရှည်ဆက်ရှိနေစေရန် စီစဉ်နေခြင်းဖြစ်ပါတယ်။
အာဆင်နယ်အသင်းတာဝန်ရှိသူများဟာ ဒီကလန်ရိုက်စ်နဲ့ စာချုပ်သစ် ချုပ်ဆိုနိုင်ရေးအတွက် ဆွေးနွေးမှု‌တွေတိုးတက်နေပေမယ့် အခြားအရေးပါတဲ့ကစားသမားတွေဖြစ်ကြတဲ့ ကိုင်ဟားဗက်၊ ဒေးဗစ်ရာယာနဲ့ မာတင်အိုဒီဂတ် တို့ရဲ့ အခြေအနေက‌တော့ ဒီကလန်ရိုက်စ်လောက် မရေရာသေးကြောင်း သိရပါတယ်။ အဆိုပါကစားသမားသုံးဦးစလုံးဟာ ၂၀၂၈ ခုနှစ်မှာ အာဆင်နယ်အသင်းနဲ့ စာချုပ်သက်တမ်းကုန်ဆုံးမှာဖြစ်ပြီး အခုအချိန်အထိ သိသာထင်ရှားတဲ့ တိုးတက်မှုတစ်စုံတစ်ရာ မရှိသေးကြောင်းလည်းသိရပါတယ်။

03/10/2026

***ဇိုလစ်မရှိတဲ့ဘယ်ခြမ်းကို ဘယ်သူအပိုင်စားရမလဲ အက်ဇီးလား မာဒူကီလား***
အဆင့် ၂ နေရာမှာ ရှိနေပြီး ဖိအားတွေကြားထဲရောက်နေချိန် ဘယ်ခြမ်းတိုက်စစ်ရဲ့ အသက်သွေးကြောဖြစ်တဲ့ ခရစ်စတိုဇိုလစ်က ဒဏ်ရာကြောင့် သုံးလေးပတ်လောက် နားရတော့မယ်ဆိုတဲ့ သတင်းက အမ်းမရိတ်စ်ရပ်ဝန်းကို စိုးထိတ်စေခဲ့ပါတယ်။ အခုတော့ အာတေတာရဲ့ ရှေ့မှာ အကြီးမားဆုံး ပဟေဠိတစ်ခု ရောက်လာခဲ့ပါပြီ။
ဇိုလစ် ချန်ထားခဲ့တဲ့ ဘယ်ခြမ်းနေရာလွတ်ကို အနုပညာဆန်ဆန် ဖန်တီးရှင် အက်ဘရီချီ အက်ဇီးနဲ့ ဖြည့်မလား ဒါမှမဟုတ် တိုက်စစ်စည်းကို တိုက်ရိုက်မီးပွင့်စေမယ့် နိုနီ မာဒူကီကိုပဲ ယုံကြည်မှု ပုံအောလိုက်မလားဆိုတာပါပဲ။ ပရိသတ်အများစုက အက်ဇီးရဲ့ မှော်ဆန်တဲ့ ခြေစွမ်းကို မျှော်လင့်နေကြပေမဲ့ ကွင်းတွင်း နည်းဗျူဟာပိုင်းနဲ့ ကစားဟန် အံဝင်ခွင်ကျမှုအရ ကြည့်ရင်တော့ မာဒူကီကသာ အာဆင်နယ်တိုက်စစ်အတွက် ပိုသင့်တော် နိုင်ဖွယ်ရှိပါတယ်။

မာဒူကီဟာ စည်းဘေးမှာ ကပ်ပြီး နေရာယူရတာကို သဘောကျသလို၊ ဘောလုံးရတာနဲ့ ပြိုင်ဘက်နောက်ခံလူကို တစ်ဦးချင်း တိုက်ရိုက်ရင်ဆိုင်ကျော်ဖြတ်ဖို့ ဝန်မလေးတဲ့ ကစားသမားမျိုးပါ။ သူ့ရဲ့ လျင်မြန်တဲ့ လှည့်စားမှုနဲ့ Dribble success rate က ပြိုင်ဘက်ခံစစ်စည်းကို ဟာကွက်ဖြစ်စေပြီး ဘောက်စ်ထဲက တိုက်စစ်မှူးတွေအတွက် နေရာလွတ်တွေ အများကြီး ရသွားစေနိုင်ပါတယ်။
တစ်ဖက်က အက်ဇီးကို ကြည့်ရင်တော့ သူဟာ စည်းဘေးမှာ ကပ်ကစားရတာထက် အတွင်းဘက် (Half-space) ထဲ ချိုးဝင်ပြီး ဘောလုံးဖန်တီးရတာကို ပိုအားသန်တဲ့ Inside Forward ဒါမှမဟုတ် Playmaker မျိုးပါ။ တကယ်လို့ အက်ဇီးကိုသာ ဘယ်ခြမ်းမှာ ထည့်လိုက်မယ်ဆိုရင် အာဆင်နယ်ရဲ့ တိုက်စစ်က ဗဟိုကိုသာ အလွန်အကျွံ စုပြုံသွားပြီး ပြိုင်ဘက်ခံစစ် ပိတ်ဆို့ထားတဲ့ ထောင်ချောက်ထဲ သက်ဆင်းသွားနိုင်ပါတယ်။ ခံစစ်ထူထပ်တဲ့ ပရီးမီးယားလိဂ်အသင်းတွေကို ရင်ဆိုင်ရာမှာ ကွင်းကို အကျယ်ဆုံး ဖြန့်မကစားနိုင်မှ အဆင်ပြေနိုင်မှာပါ။

ခေတ်သစ်ဘောလုံးလောကမှာ ခံစစ်ကနေ တိုက်စစ်ကို မျက်စိတစ်မှိတ်အတွင်း ကူးပြောင်းနိုင်စွမ်း (Defensive-to-Attacking Transition) ဟာ အနိုင်အရှုံးကို ဆုံးဖြတ်ပေးသွားနိုင်တဲ့ထိ အရေးပါလာပါတယ်။ ဒီနေရာမှာ မာဒူကီရဲ့ ဘောလုံးဆွဲပြေးနိုင်စွမ်း (Progressive Carries) နဲ့ ပေါက်ကွဲအားကောင်းတဲ့ အပြေးနှုန်းက အာဆင်နယ်အတွက် အဆိပ်ပြင်းတဲ့ ဓားသွားတစ်လက် ဖြစ်လာပါလိမ့်မယ်။ ပြိုင်ဘက်နောက်တန်းရဲ့ ကျောဘက်က နေရာလွတ်တွေဆီကို လျှပ်တပြက် ပြေးဝင်ထိုးဖောက်ရာမှာ မာဒူကီရဲ့ အမြန်နှုန်းက ဇိုလစ်ရဲ့ ကွက်လပ်ကို အကောင်းဆုံး ဖြည့်ဆည်းနိုင်ပါလိမ့်မယ်။
အက်ဇီးမှာ ကမ္ဘာ့အဆင့် ဘောလုံးထိန်းချုပ်မှုနဲ့ လှပတဲ့ ဖန်တီးမှုတွေ ရှိနေတာ မှန်ပေမဲ့၊ အကွက်ချစီမံထားတဲ့ တန်ပြန်တိုက်စစ်တွေမှာ ကွင်းအလျားလိုက် အပြေးပြိုင်ပြီး ပြိုင်ဘက်ကို ဒုက္ခပေးနိုင်တဲ့ "Raw Pace" ပိုင်းမှာတော့ မာဒူကီကို ယှဉ်နိုင်ဖို့ ခက်ခဲပါလိမ့်မယ်။

အာတေတာရဲ့ စနစ်မှာ ဘယ်နောက်ခံလူတွေဟာ သမားရိုးကျ တောင်ပံအတိုင်း လိုက်ပါပြေးလွှားတာထက် အတွင်းဘက် ကွင်းလယ်ဆီ ချိုးဝင်ထိန်းချုပ်တဲ့ Inverted Full-back ပုံစံ ကစားကြတာပါ။ သူတို့ အတွင်းဝင်သွားတဲ့အခါ ဘယ်ခြမ်းစင်္ကြံတစ်ခုလုံး ဟာလာဟင်းလင်း ဖြစ်မသွားဖို့ တောင်ပံကစားသမားက စည်းအစွန်းမှာ မဖြစ်မနေ အမာခံ တပ်စွဲပေးထားရပါတယ်။
မာဒူကီကို ဘယ်တောင်ပံမှာ တာဝန်ပေးလိုက်ခြင်းက ဒီနည်းဗျူဟာမြောက် ဟာကွက်ကို အလှပဆုံး ဖာထေးပေးနိုင်မှာပါ။ အက်ဇီးသာ ကစားမယ်ဆိုရင်တော့ သူ့ပင်ကိုဗီဇအရ အတွင်းကို ထပ်မံချိုးဝင်လာမှာဖြစ်လို့ နောက်ခံလူနဲ့ နေရာလွတ်လုသလို ဖြစ်သွားနိုင်ပြီး ဘယ်ဘက်စည်းကြောင်းတစ်လျှောက်မှာ အာဆင်နယ်ရဲ့ တိုက်စစ်
ဟာကွက်တွေ ဖြစ်ပေါ်လာနိုင်ပါတယ်။

ဘောလုံးဆိုတာ စွမ်းဆောင်ရည်အကောင်းဆုံး ကစားသမား (၁၁) ယောက်ကို ကွင်းထဲ စုပြုံထည့်ထားရုံနဲ့ အောင်မြင်တဲ့ ကစားနည်းမဟုတ်ဘဲ၊ တစ်ဦးနဲ့တစ်ဦး ကွက်တိအံဝင်မယ့် ပဟေဠိအပိုင်းအစတွေကို အချိုးကျ ပေါင်းစပ်ရတဲ့ နည်းဗျူဟာစစ်တုရင်ပွဲ တစ်ပွဲဖြစ်ပါတယ်။ အက်ဘရီချီ အက်ဇီးရဲ့ တစ်ကိုယ်တော် ပါရမီနဲ့ ပွဲအလှည့်အပြောင်း ဖန်တီးနိုင်စွမ်းကို မေ့ထားလို့ မရပေမယ့် ဇိုလစ်မရှိတဲ့ ဒီရက်သတ္တပတ်တွေအတွင်း အာဆင်နယ်တိုက်စစ်ရဲ့ သွေးကြောမပြတ်တောက်စေဖို့နဲ့ မူလစနစ်အတိုင်း ဇစ်မြစ်မပျက် လည်ပတ်နိုင်ဖို့အတွက်ဆိုရင်တော့ စာရေးသူရဲ့ အမြင်အရ နိုနီ မာဒူကီကို ပိုအကြိုက်တွေ့မိပါတယ်။

02/10/2026

Breaking 🚨🚨🚨
အာဆင်နယ်ရဲ့ ဂရိ တောင်ပံတိုက်စစ်ကစားသမား
ခရစ်စတို ဇိုလစ်ဟာ ပေါင်နောက်ကျော ကြွက်သား (Hamstring) ဒဏ်ရာ ရရှိသွားခဲ့တာကြောင့် အနည်းဆုံး ၂ ပတ်ကနေ ၃ ပတ်အထိ အနားယူရဖွယ် ရှိနေတယ်လို့ ပဏာမ ဆေးစစ်ချက်တွေအရ သိရပါတယ်။

30/09/2026

***Saka on the wing သီချင်းသံရဲ့ နောက်ကွယ်က နာကျင်စရာ အမှန်တရား***

အမ်းမရိတ်စ်ကွင်းကြီးရဲ့ အလင်းရောင်တွေအောက်မှာ ပရိသတ်တွေ သီဆိုခဲ့ကြတဲ့ "Saka on the wing" ဆိုတဲ့ သီချင်းသံဟာ တစ်ချိန်က မျှော်လင့်ခြင်းတွေနဲ့ ပြည့်နှက်နေခဲ့ဖူးပါတယ်။ ဒါပေမဲ့ ဒီနေ့မှာတော့ အဲဒီသီချင်းသံရဲ့ နောက်ကွယ်မှာ မောပန်းနွမ်းနယ်မှုတွေ၊ ဒဏ်ရာဒဏ်ချက်တွေနဲ့ မနိုင်ဝန်ကို ထမ်းပိုးထားရတဲ့ လူငယ်တစ်ယောက်ရဲ့ နာကျင်စရာ အမှန်တရားတစ်ခု ပုန်းကွယ်နေခဲ့ပါတယ်။

ဘူကာယိုဆာကာတစ်ယောက် ၂၀၂၃-၂၄ ရာသီမှာ ပွဲပေါင်း ၄၇ ပွဲအထိ ကစားပြီး သွင်းဂိုး ၂၀၊ ဂိုးဖန်တီးမှု ၁၄ ကြိမ်နဲ့ ကစားသမားဘဝရဲ့ အမြင့်မားဆုံး ပုံစံကောင်းကို ပြသနိုင်ခဲ့ပါတယ်။ ဒါပေမဲ့ အဲဒီ အထွတ်အထိပ် ရလဒ်ဟာပဲ သူ့အတွက် ပင်ပန်းနွမ်းနယ်မှုရဲ့ စတင်ခြင်း ဖြစ်ခဲ့ရပါတယ်။ အာဆင်နယ်ရဲ့ တိုက်စစ်တစ်ခုလုံးဟာ ဆာကာရဲ့ ခြေထောက်နှစ်ဖက်ပေါ်မှာပဲ လုံးဝ ဥဿုံ မှီခိုခဲ့ရပြီး ဂိုးရဖို့ဆိုရင် ဆာကာတစ်ယောက်တည်းကိုပဲ အားကိုးအားထား ပြုခဲ့ကြရလို့ပါပဲ။

ပရိသတ်တွေကစလို့ နည်းပြအာတီတာကပါ အသက်ရှူတိုင်း ဆာကာကိုပဲ လိုချင်ခဲ့ကြပါတယ်။ အနားပေးသင့်တဲ့ ပွဲစဉ်တွေမှာတောင် အရန်ခုံမှာ အနားမပေးဘဲ ကွင်းအတွင်း အတင်းအကျပ် ပွဲထုတ်တာတွေကို ခံခဲ့ရပါတယ်။ အကျိုးဆက်အနေနဲ့ ၂၀၂၄-၂၅ ရာသီမှာ ပွဲပေါင်း ၃၇ ပွဲသာ ကစားနိုင်ခဲ့ပြီး ဒဏ်ရာတွေကြားထဲ ပိတ်မိလာခဲ့ရပါတယ်။

၂၀၂၅-၂၆ ရာသီရောက်တော့ ပွဲပေါင်း ၄၉ ပွဲအထိ အလွန်အမင်း ပြန်လည် အသုံးပြုခံခဲ့ရပေမဲ့ သွင်းဂိုး ၁၁ ဂိုးနဲ့ ဖန်းတီးမှု ၇ ကြိမ်သာ ပြုလုပ်နိုင်ခဲ့ပြီး ခြေစွမ်းပိုင်း သိသိသာသာ ကျဆင်းသွားခဲ့တာတွေ့ရပါတယ်။ ဒါဟာ ကစားသမားတစ်ဦးရဲ့ စွမ်းဆောင်ရည်ကျဆင်းသွားတာထက် ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ကုန်ခမ်းသွားခဲ့ရလို့ပဲ ဖြစ်ပါတယ်။ မိုက်ကယ် အိုလီဆီ၊ လာမင်း ယမားလ် တို့လို လူငယ်တောင်ပံ ကစားသမားတွေ တစ်နှစ်ထက်တစ်နှစ် ပိုမို တိုးတက်တောက်ပလာချိန်မှာ ဆာကာကတော့ မနားတမ်း ခိုင်းစေခံရမှုရဲ့ ဒဏ်ဆက်တွေကို ခံစားရင်း ပုံမှန်ခြေစွမ်းထက် ပိုပြီး မတိုးတက်နိုင်တော့တဲ့ လှောင်အိမ်ထဲ ပိတ်မိသွားခဲ့ရပါတယ်။

အသင် ၁၇ နှစ် အရွယ်ကစလို့ အသင်းရဲ့ နိမ့်ကျမှုတွေကို
အရွယ်နဲ့မလိုက် ပခုံးထမ်းတင်ပေးခဲ့ပြီး အောင်မြင်မှုတွေလည်းရယူပေးခဲ့တဲ့ ဆာကာတစ်ယောက် ငယ်ငယ်ရွယ်ရွယ်မှာပဲ အများကြီး ပင်ပန်းခဲ့ရပါပြီ။အသင်းအတွက် ခန္ဓာကိုယ်နဲ့ ကြွက်သားတွေကို ပေးဆပ်ရင်း ဒဏ်ရာတွေနဲ့ ပွဲဆက်များစွာကြား မနိုင်ဝန်ကို ထမ်းခဲ့ရတဲ့ "အမ်းမရိတ်စ်ရဲ့ ရွှေရောင်မျှော်လင့်ချက်လေး" ဟာ အခုချိန်မှာတော့ အလွန်အမင်း သုံးစွဲခြင်းရဲ့ ဝမ်းနည်းဖွယ် သားကောင်ကြီး ဖြစ်မှန်းမသိ ဖြစ်ခဲ့ရပါတော့တယ်။

ဘယ်လောက်ပဲ မောပန်းနွမ်းနယ်နေပါစေ... ဆာကာဟာ အာဆင်နယ်အတွက်ဆို ဘယ်တော့မှ အပြုံးမပျက်ခဲ့ပါဘူး။ ဘာပဲပြောပြော သူဟာ ဒီနေ့အထိ အာဆင်နယ်ရဲ့ အဓိက သော့ချက်ကစားသမားအဖြစ် ရှိနေဆဲဖြစ်သလို၊ ညာတောင်ပံထက်မှာ ပရိသတ်တွေ အမြဲတမ်း ယုံကြည်အားကိုးလို့ ရနေဦးမယ့် သူရဲကောင်းတစ်ယောက်ပါ။ တကယ်တမ်း ခါးသီးပြီး ဝမ်းနည်းစရာ ကောင်းတာကတော့... ဒဏ်ရာဒဏ်ချက်တွေနဲ့ ခန္ဓာကိုယ်ရဲ့ စွမ်းဆောင်ရည် လျှော့ကျလာမှုကြောင့် သူ အိပ်မက်မက်ခဲ့ဖူးတဲ့ အမြင့်ဆုံး ဆုတံဆိပ်တွေနဲ့ အထွတ်အထိပ် အောင်မြင်မှုတွေကို လှမ်းကိုင်နိုင်ဖို့ တဖြည်းဖြည်း ဝေးကွာသွားရပြီဆိုတဲ့ အမှန်တရားပဲ ဖြစ်ပါတော့တယ်။

29/09/2026

အာဆင်နယ်အသင်းရဲ့ ပရီးမီးယားလိဂ်ပွဲစဉ်တွေ ပြန်လည် မစတင်မီမှာ နည်းပြ မီကယ် အာတီတာ နဲ့ တိုက်စစ်မှူး ဗစ်တာ ယောကရက်ရှ် တို့ တွေ့ဆုံဆွေးနွေးမှုတစ်ရပ် ပြုလုပ်ဖွယ်ရှိနေပါတယ်။

ယောကရက်ရှ်အနေနဲ့ အဆိုပါတွေ့ဆုံဆွေးနွေးမှုနဲ့ ပတ်သက်ပြီး အကြောင်းကြားခံထားရပြီးဖြစ်သော်လည်း တွေ့ဆုံရတဲ့ အဓိက အကြောင်းအရင်းကိုတော့ အတိအကျ မသိရသေးပါဘူး။

သတင်းရင်းမြစ်အချို့ရဲ့ ဖော်ပြချက်အရတော့ အဆိုပါ တွေ့ဆုံမှုဟာ နှစ်ဦးကြား ဖြစ်ပေါ်နေတဲ့ သဘောထားကွဲလွဲမှုများနဲ့ စိုးရိမ်ပူပန်မှုများကို ပွင့်ပွင့်လင်းလင်း ဆွေးနွေး ဖြေရှင်းဖို့ ရည်ရွယ်တယ်လို့ သုံးသပ်ကြပါတယ်။

အခြားသော သတင်းရင်းမြစ်အချို့ကတော့ ယင်းတွေ့ဆုံမှုဟာ ယောကရက်ရှ်တစ်ယောက် ဇန်နဝါရီ အပြောင်းအရွှေ့မှာ ထွက်ခွာနိုင်ခြေအတွက် ပြင်ဆင်တဲ့အနေနဲ့ ဆွေးနွေးခြင်း ဖြစ်နိုင်ကြောင်း ယူဆကြပါတယ်။
လက်ရှိအချိန်အထိတော့ အဆိုပါတွေ့ဆုံဆွေးနွေးမှုရဲ့အဓိကရည်ရွယ်ချက်ကို တရားဝင်အတည်မပြုနိုင်သေးဘူး

29/09/2026

***အာဆင်နယ်အတွက် စိုးရိမ်စရာဖြစ်လာတဲ့ မာတင်
အိုဒီဂတ်ရဲ့ ခြေကျင်းဝတ် ဒဏ်ရာ***

နော်ဝေးအသင်းက ပေါ်တူဂီအသင်းကို ၂-၁ ဂိုးနဲ့ ရှုံးနိမ့်ခဲ့တဲ့ ပွဲစဉ်နှောင်းပိုင်းမှာ အာဆင်နယ်အသင်းခေါင်းဆောင် မာတင် အိုဒီဂတ်ဟာ ပေါ်တူဂီကွင်းလယ်လူ ဘာနာဒို ဆေးလ်ဗားနဲ့ ထိခိုက်မိမှုကြောင့် ခြေကျင်းဝတ် ဒဏ်ရာ ရရှိသွားခဲ့ပါတယ်။ ပွဲအပြီးမှာတော့ အာဆင်နယ် အဓိကကစားသမားဟာ ဆေးကုသမှု ခံယူခဲ့ရပြီး အသင်းဘတ်စ်ကားဆီကို မသက်မသာဖြစ်တဲ့ပုံစံနဲ့ လျှောက်လှမ်းသွားတာကို တွေ့ရှိခဲ့ရတာဖြစ်ပါတယ်။ အိုဒီဂတ်ကလည်း သူ့ရဲ့ ခြေကျင်းဝတ်ဟာ နာကျင်နေကြောင်း ဝန်ခံခဲ့ပေမဲ့ လာမယ့် ရက်နည်းနည်းအတွင်း အဆင်ပြေသွားဖို့ မျှော်လင့်ကြောင်း ပြောကြားခဲ့ပါတယ်။
လက်ရှိအချိန်မှာတော့ သူ့ရဲ့ ဒဏ်ရာအခြေအနေနဲ့ ပတ်သက်ပြီး တရားဝင် ဆေးစစ်ချက် အဖြေ မထွက်သေးသလို ကွင်းအတွင်း ပြန်လည်ပါဝင်နိုင်မယ့် ကာလအပိုင်းအခြားကိုလည်း အတည်မပြုနိုင်သေးပါဘူး။

28/09/2026

အာဆင်နယ် ကစားသမားတွေရဲ့ဒဏ်ရာအခြေအနေ‌တွေကို
ဖော်ပြပေးလိုက်ရပါတယ်။

•ကိုင်ဟာဗက် — ပေါင်နောက်ကြွက်သား (hamstring) ဒဏ်ရာရရှိထားတယ်လို့ သံသယရှိရပြီး ပြန်လည်သက်သာလာနေဆဲဖြစ်ပါတယ်။ လိဒ်ယူနိုက်တတ်နဲ့ပွဲမှာ ပြန်လည်ပါဝင်လာနိုင်ခြေရှိနေပါတယ်။

•ဒီကလန်ရိုက်စ် — ဒဏ်ရာအသစ်ရရှိထားခြင်းမရှိဟု ယူဆရပြီး လာမယ့်ပွဲစဉ်တွေအတွက် ကြိုတင်ပြင်ဆင်တဲ့အ‌နေနဲ့ အနားပေးထားခြင်းဖြစ်ပါတယ်။ လိဒ်နဲ့ပွဲမှာ ပြန်ပါနိုင်ခြေရှိပါတယ်။

• ပီရို ဟင်ကာပီယေး — ကြံ့ခိုင်မှုအခြေအနေနဲ့ပတ်သက်တဲ့ စိုးရိမ်ရမှုတွေရှိနေတာကြောင့် အီကွေဒေါ လက်ရွေးစင်အသင်းမှာ ပါဝင်ကစားနိုင်ခြင်းမရှိပါဘူး ။ ယခုရရှိထားတဲ့ အနားယူချိန်ကာလရှည်ဟာ ၎င်းအား ပြန်လည်သက်သာလာစေရန် အထောက်အကူပြုနိုင်ပြီး လိဒ်နဲ့ ပွဲစဉ်မှာ ပြန်လည်ပါဝင်လာနိုင်ခြေရှိပါတယ်။

• ဘန်ဝှိုက် — ပေါင်ခြံဒဏ်ကနေ ပြန်လည်သက်သာလာနေဆဲဖြစ်ပြီး ဘရိုက်တန်နဲ့ပွဲစဉ်ကို လွဲချော်ခဲ့ပါတယ်။ နိုင်ငံတကာပွဲစဉ်များအတွက် အနားယူချိန်ပြီးဆုံးပြီးနောက် ပြန်လည်ပါဝင်နိုင်ဖို့ မျှော်လင့်ရပါတယ်။

• ခရစ်စတီယန် မော်စ်ကွဲယာ — ကြွက်သားဒဏ်ရာကနေ ပြန်လည်သက်သာလာစေဖို့ ဆက်လက်ကြိုးပမ်းနေပြီး လိဒ်နဲ့ ပွဲစဉ်အမှီ ပြန်လည်သက်သာလာနိုင်ခြေရှိပါတယ်။

• ဝီလျံ ဆလီဘာ — ကာလရှည်ကြာ ကစားနိုင်ဦးမှာမဟုတ်တဲ့ အခြေအနေမှာ ဆက်လက်ရှိနေပြီး ၂၀၂၆ ခုနှစ် နှောင်းပိုင်းကာလအထိ ပြန်လည်ကစားပေးနိုင်မှာ မဟုတ်ပါဘူး။

27/09/2026

အိုဆီမန် 🔄 ယောကရက်ရှ် အလဲအထပ် မြင်ရမလား

ဇန်နဝါရီ အပြောင်းအရွှေ့ကာလ မတိုင်မီ တူရကီကလပ်
ဂါလာတာဆာရေး အသင်းဟာ အာဆင်နယ် တိုက်စစ်မှူး
ဗစ်တာ ယောကရက်ရှ် အပေါ် ပြင်းပြင်းထန်ထန်စိတ်ဝင်စားလျက် ရှိနေကြောင်း သတင်းတွေ ထွက်ပေါ်လာခဲ့ပါတယ်။
အာဆင်နယ်အသင်းဟာ ဂါလာတာဆာရေးရဲ့ စိတ်ဝင်စားမှုကို အခွင့်ကောင်းယူပြီး စိတ်ဝင်စားနေဆဲဖြစ်သည့် နိုက်ဂျီးရီးယား တိုက်စစ်မှူး ဗစ်တာ အိုဆီမန်အား မြောက်လန်ဒန်ကို ခေါ်ယူနိုင်ရေးအတွက် အပြန်အလှန် အလဲအထပ် ဆွေးနွေးမှုများ ပြုလုပ်ရန် ပြင်ဆင်နေကြောင်း သိရပါတယ်။ လာမယ့် ဇန်နဝါရီ အပြောင်းအရွှေ့မှာ ယောကရက်ရှ် ထွက်ခွာပြီး အိုဆီမန် ရောက်ရှိလာမလားဆိုတာကိုတော့ စိတ်ဝင်စားဖွယ်ရာ စောင့်ကြည့်ရမှာပါ။

27/09/2026

ယခုလတ်တလော အမ်းမရိတ်ရပ်ဝန်းမှာ ပရိသတ်တွေ အကြား အငြင်းပွားဖွယ် အသံများ ပိုမိုကျယ်လောင်လာခဲ့ပါတယ်။ အာဆင်နယ်ရဲ့ တိုက်စစ်ပိုင်း ပြောင်းလဲမှုတွေကြား ကိုင်ဟာဗက်နဲ့ ဗစ်တာ ယောကရက်ရှ်တို့အနက် မည်သူက မီကယ် အာတီတာ၏ စနစ်အတွင်း ပိုမိုအံဝင်ခွင်ကျဖြစ်သနည်း" ဆိုတဲ့ မေးခွန်းဟာ ပရိသတ်များနဲ့ ဘောလုံးသုံးသပ်သူများကြား ခေါင်းစီးသတင်း ဖြစ်လာခဲ့ပါတယ်။ ပရိသတ်အချို့က ဟာဗက်ကိုသဘောကျသလို တစ်ချို့ကလည်း ယောကရက်ရှ်ကို နေရာပေးစေချင်ကြပါတယ်။

ကစားသမားနှစ်ဦးစလုံး တိုက်စစ်မှူးနေရာမှာ ကစားနိုင်ကြပေမယ့် ကွင်းအတွင်းကစားတဲ့ပုံစံကတော့ ဆန့်ကျင်ဘက် အစွန်းနှစ်ဖက်ကဲ့သို့ ကွဲပြားခြားနားပါတယ်။ ဟာဗက်ရဲ့ ကစားဟန်ကို အဓိပ္ပာယ်ဖွင့်ရရင် "ကျစ်လစ်သော အသင်းလိုက် စနစ်၏ သော့ချက်" လို့ ခေါ်ဆိုနိုင်ပါတယ်။ တိုက်စစ်မှူးအဖြစ် အမည်တပ်ထားပေမယ့်လည်း ကွင်းအတွင်းမှာမူ စွယ်စုံရ ကစားသမားတစ်ဦးအဖြစ် ကိုယ်တိုင်ဂိုးသွင်းသလို ဂိုးလည်းဖန်တီးပါတယ်။ နေရာလိုက် ရွေ့လျားမှုတွေနဲ့အတူ အသင်းဖော်တွေကို ကစားပေါက်ချောင်စေပြီး
အသင်းလိုက်ကစားပုံကို ကောင်းမွန်စေတာလည်း ဖြစ်ပါတယ်။ကွင်းလယ်တစ်ဝက်အထိ ဆင်းလာပြီး ဘောလုံးကို လက်ခံယူခြင်းဖြင့် တောင်ပံကစားသမားတွေအတွက် Space များကို ဖန်တီးပေးပါတယ်။ အာတီတာရဲ့ ဖိအားပေးကစားဟန် (High Pressing System)အောက်မှာ ဟာဗက်ဟာ အလွန်အရေးပါတဲ့ အစိတ်အပိုင်းဖြစ်ပါတယ်။ ဘောလုံးမရှိချိန် ပြိုင်ဘက်ရဲ့ ကွင်းလယ်နဲ့ ခံစစ်ကြား ချိတ်ဆက်မှုကို ပိတ်ဆို့ပေးနိုင်ပြီး ပြိုင်ဘက်တိုက်စစ်ကို ဟန့်တာရမှာလည်း အသုံးဝင်တဲ့ကစားသမားပါ။ပြိုင်ဘက်က ခံစစ်ပိက်ဆော့နေတဲ့ ပွဲတွေမှာဆိုရင် ဂိုးသမားဆီက‌နေ အဝေးဘောပေးပို့မှုတွေကို လက်ခံရယူပြီး အသင်းဖော်တွေထံ ချပေးနိုင်တဲ့ သူ့ရဲ့ အမြင့်ဘောအားသာချက်ဟာလည်း တိုက်စစ်ကို အထောက်အကူပြုပါတယ်။ ဂျာမန်သားရဲ့ ဦးနှောက်သုံးပြီး ပါးပါးနပ်နပ် ကစားတတ်မှုဟာ နည်းပြတိုင်းအတွက် သဘောကျချင်စရာပါ။

အခြားတစ်ဖက်မှာတော့ ဗစ်တာယောကရက်ရှ်ဟာ ဟာဗက်နဲ့ အတော်လေးကွဲပြားပြီး တိုက်စစ်မှုးစစ်စစ်ဖြစ်ပါတယ်။ ယောကရက်ရှ်ရဲ့ အဓိကဦးတည်ချက်ကတော့ ပြိုင်ဘက်ဧရိယာအတွင်း ဂိုးသွင်းယူရန်ဖြစ်ပါတယ်။ ပြိုင်ဘက် ဧရိယာအနီး ဘောလုံးရတာနဲ့ တစ်ပြိုင်နက် ရဲရဲဝံဝံ လှည့်ထွက်ပြီး ဂိုးပေါက်ခြိမ်းခြောက်နိုင်တဲ့ သဘာဝဗီဇ ရှိသူပါ။ တန်ပြန်တိုက်စစ်တွေမှာလည်း အထူးအသုံးဝင်တဲ့ ကစားသမားမျိုးဖြစ်ပါတယ်။ စပို့တင်းလစ်စဘွန်းနဲ့ ဆွီဒင်အသင်းတို့မှာအရမ်းကောင်းခဲ့တာဟာလည်း ဒီအချက်ကြောင့်ပဲဖြစ်ပါလိမ့်မယ်။ စပို့တင်း၊ ဆွီဒင်တို့လိုအသင်းမျိုး‌တွေနဲ့ရင်ဆိုင်ရချိန်မှာ ပြိုင်ဘက်တွေအနေနဲ့ ခံစစ်ပိက်ဆော့မှာမဟုတ်ပါဘူး။ အဲ့ဒီအတွက်ကြောင့် ယောကရက်ရှ်တစ်ယောက် counter attacking တွေကနေ မကြာခဏ အခွင့်အရေးရတတ်သလို မကြာခဏလည်း သွင်းဂိုးတွေရနေမှာပါ။ space ကျယ်ကျယ်သာရရင် ယောကရက်ရှ်ဟာ သိပ်ကြောက်ဖို့ကောင်းတယ်ဆိုတာကို သူရဲ့အသင်းဟောင်းနဲ့ လက်ရွေးစင်အသင်းမှာ သက်သေပြထားပြီးသားပါ။ "အာဆင်နယ်ရောက်ရင် ဘာလို့ခြေစွမ်းမပြနိုင်သလဲ" လို့မေးလာရင်တော့ နေရာလွတ် မရလို့ပဲဆိုပြီး ရိုးရိုးရှင်းရှင်းဖြေရပါလိမ့်မယ်။ အာဆင်နယ်နဲ့တွေ့ရင် တိုက်စစ်ဖွင့်ကစားမယ့်အသင်းက မရှိသလောက်ရှားပါတယ်။ PSG လိုအသင်းမျိုးကတောင် ခံစစ်ပိက်ကစားခဲ့ရတဲ့ သာဓက‌ တွေရှိခဲ့ဖူးပါတယ်။ ခံစစ်ပိက်ကစားတဲ့ အသင်းတွေနဲ့ဆို ယောကရက်ရှ်သာမက အာလင်ဟာလန်းတို့လို ကစားသမားမျိုးတွေပါ လုပ်ရကိုင်ရခက်ခဲတတ်ပါတယ်။ ယောကရက်ရှ် ရောက်ခါစကဆိုရင် အာတီတစ်ယောက်သူရဲ့ positional playing style ကို စွန့်လွှတ်ပြီး direct play ဆန်တဲ့ကစားပုံမျိုးဖန်တီးတော့လေမလားဆိုပြီး စိတ်ကူးခဲ့ကြဖူးမှာပါ။ အာတီတာဟာ သူရဲ့မူကို မပြောင်းခဲ့ဘဲ ယောကရက်ရှ်ကိုသာ ပြောင်းလဲစေခဲ့ပါတယ်။ ယောကရက်ရှ်ဟာ အာတီတာအလိုကျ False 9 ဆန်ဆန် ကစား‌ခဲ့ပြီး အသင်းဖော်တွေနဲ့ အကောင်းဆုံးချိတ်ဆက်‌ကစားခဲ့ပါတယ်။ သူမကျွမ်းကျင်ခဲ့တဲ့ အလုပ်ကို ဆွီဒင်သားကြီး အကောင်းဆုံးကြိုးစားလုပ်ခဲ့ပြီး အံမဝင်မှုတွေကြားကပဲ ပြီးခဲ့တဲ့ရာသီ ပြိုင်ပွဲစုံ ၂၁ ဂိုးထိ သွင်းယူပေးခဲ့တာပါ။သို့‌သော်အသင်းနဲ့ အပြည့်အဝ အံဝင်ဖို့ ရုန်းကန်နေရဆဲဖြစ်တာကြောင့် ဟာဗက်နဲ့ယှဉ်ရင် ပွဲကစားချိန်တွေ‌နည်းပါးနေဦးမှာပါ။

အာဆင်နယ် ကစားဟန်နဲ့ ဘယ်သူက ပိုမို သင့်တော်မလဲ" ဆိုတဲ့ မမွေးခွန်းမှာ အဖြေဟာ အာဆင်နယ် ရင်ဆိုင်ရတဲ့ "ပြိုင်ဘက်ရဲ့ ကစားဟန်" အပေါ်မူတည်၍ အပြောင်းအလဲ ရှိနိုင်ပါတယ်။ အာဆင်နယ်ဟာ အသင်းလိုက် ထိန်းချုပ်ကစားမှု (Positional Play) ကို အဓိကထားပြီး ကွင်းလယ်နဲ့ တောင်ပံတွေကို အပြန်အလှန် ချိတ်ဆက်ကာ ခံစစ်ပိတ်ထားသော ပြိုင်ဘက်များကို မဆုတ်မနစ် ဖိအားပေးလိုတဲ့
ပွဲစဉ်တွေမှာ ကိုင်ဟာဗက်ဟာ အစားထိုးမရနိုင်တဲ့ ထူးချွန် ကစားသမားဖြစ်ပါတယ်။ သူဟာ ဂိုးများစွာ မသွင်းယူနိုင်သည့်တိုင် အသင်းရဲ့ စုစည်းမှုကို ပိုမိုခိုင်မာစေမှာပါ။ဂိုးဧရိယာအတွင်း တတ်နိုင်သမျှ တိုက်ရိုက် ဂိုးပေါက်ခြိမ်းခြောက်နိုင်မယ့် တိုက်စစ်မှူးစစ်စစ် လိုအပ်တဲ့ ပွဲစဉ်တွေ ဒါမှမဟုတ် မြန်ဆန်သော တန်ပြန်တိုက်စစ်များနဲ့ကစားရမယ့် ပွဲစဉ်များတွင်မူ ဗစ်တာ ယောကရက်ရှ်ရဲ့ တိုက်ရိုက်ထိုးဖောက်နိုင်စွမ်း‌တွေဟာ ပိုမိုထိရောက်တဲ့ လက်နက်ဖြစ်နိုင်ပါတယ်။ အာဆင်နယ်ဟာ ပွဲအများစုမှာ ခံစစ်ပိက်ဆော့တဲ့ အသင်းတွေနဲ့ ရင်ဆိုင်ရမှာဖြစ်တာကြောင့် ဟာဗက်ကသာ ပိုမိုပွဲထွက်ကစားရဖွယ်ရှိပါတယ်။

အမှန်တကယ်အားဖြင့်တော့ ဟာဗက်နဲ့ နှင့် ယောကရက်ရှ်တို့အနက် ဘယ်သူပိုကောင်းလဲ၊ ဘယ်သူကပွဲထွက်ခွင့်ရသင့်လဲ ငြင်းခုံနေခြင်းထက် အာဆင်နယ် နည်းပြ မီကယ် အာတီတာ အနေနဲ့ "ကွဲပြားတဲ့ လက်နက်နှစ်ခု" ကို ပိုင်ဆိုင်ထားခြင်းဟု ရှုမြင်ခြင်းက ပိုမို ယုတ္တိကျပါလိမ့်မယ်။
အာဆင်နယ်အသင်း စုစည်းမှုနဲ့ ဟန်ချက်ညီရေးအတွက် ဟာဗက်ရဲ့ နည်းဗျူဟာမြောက် ကစားဟန်ဟာ လက်ရှိအချိန်အထိ ပထမရွေးချယ်မှုအဖြစ် ရှိနေဆဲဖြစ်သော်လည်း ကာလရှည် ရာသီတစ်ခုလုံးအတွက် ချန်ပီယံဆုများကို စိန်ခေါ်နိုင်ရန်မှာ ယောကရက်ရှ် ပေးစွမ်းနိုင်တဲ့ တိုက်ရိုက်ဂိုးသွင်းခြိမ်းခြောက်မှုစွမ်းရည်မှာလည်း မရှိမဖြစ် လိုအပ်နေမည်မှာ အမှန်ပင်ဖြစ်ပါတယ်။ မည်သို့ပင် ဆိုစေကာမူ အာဆင်နယ်ဆိုတဲ့ ခေါင်းစဉ်‌အောက်မှာ ပေးဆပ်နေကြသူတွေချည်း ဖြစ်သည့်အတွက် အဖြူအမဲ မခွဲခြားပဲ အားပေးရမည်မှာ ကျွန်တော်တို့ ပရိသတ်တွေရဲ့ တာဝန်ပဲ မဟုတ်လေလား။

We Love Arsenal 2024 Myanmar

05/10/2026

04/10/2026

03/10/2026

02/10/2026

30/09/2026

29/09/2026

29/09/2026

28/09/2026

27/09/2026

27/09/2026

Address

Website

Alerts

Shortcuts

Share

Listing takedown request