09/02/2025
ဘရိုက်တန်ဂိုးသမား ဂိုးလက်ဆောင်ပေးတာတောင် အသုံးမချနိုင်ဘဲ ရှုံးပွဲတွေ့ပြီး FA ဖလားပြိုင်ပွဲက ထွက်ခဲ့ရတဲ့ ချယ်လ်ဆီး
------------------------------------
🟥ချယ်လ်ဆီးအသင်းကတော့ ရာသီလက်ကျန်အတွက် အရှိန်မြှင့်ရမဲ့ အချိန်ရောက်လာမှ ကစားသမားတွေဟာ Run out of Steam၊ Run out of Energy လို ပုံစံဖြစ်နေပါတယ်။ ဒါကလည်း ချယ်လ်ဆီးတို့ အခုနောက်ပိုင်း ပွဲတိုင်းမှာ ပြိုင်ဘက်ကို အေးအေးဆေးဆေးနဲ့ အသာစီး မယူနိုင်ဘဲ အသည်းအသန်ကစားရလို့ ကစားသမားတွေ မရုန်းနိုင်တော့တာလည်းဖြစ်နိုင်ပါတယ်။
🟥အခုပွဲမှာ ချယ်လ်ဆီးကစားပုံက လျော့တိလျော့ရဲနိုင်လွန်းပြီး ပထမပိုင်းမှာ အခွင့်အရေးတချို့ကို ဖြုန်းတီးပစ်ခဲ့ပါတယ်။ ဘရိုက်တန်ကို ရှုံးခဲ့တာက နီကိုလက်စ်ဂျက်ဆင်၊ မာ့ခ်ဂီယူတို့ မပါနိုင်လို့ဆိုပြီး ဆင်ခြေပေးရင် အဲဒါက လုံလောက်မှု မရှိပါဘူး။ အဲဒီနှစ်ယောက်စလုံး ဝင်ကစားရင်တောင် ချယ်လ်ဆီးတို့ နိုင်ပွဲရဖို့ မသေချာပါဘူး။ တိုက်စစ်မှာ ဒဏ်ရာရကစားသမားတွေရှိနေလို့ မာရက်စ်ကာက အပြောင်းအလဲလုပ်ခဲ့ပြီး ပါလ်မာနဲ့ အန်ကွန်ကူကို တွဲဖက်ကစားစေသလို ဒူးစ်ဘရီဟောက No 10 တောင်ပံနှစ်ဖက်မှာ ဆန်ချို၊ ပတ်ဒရိုနက်တိုနဲ့ ကိုင်စီဒိုက Single Pivot အဖြစ် ကစားတာကြောင့် ချယ်လ်ဆီးကစားကွက်က ၄-၄-၂ Diamond Shape ဆန်ခဲ့ပါတယ်။
🟥ပွဲစလို့ ၅ မိနစ်မှာပဲ ဘယ်ခြမ်းကနေ ပါလ်မာ လှမ်းကန်တင်ပေးတာကို ဘရိုက်တန်ဂိုးသမား ဗာဘရူဂန်ဟာ မူလတန်းကျောင်းသားတစ်ယောက်လို အမှားမျိုး ကျူးလွန်ခဲ့ပြီး ကိုယ့်ဂိုးကိုယ်ပြန်သွင်းမိခဲ့ပါတယ်။ အဲဒီနောက်ပိုင်းမှာလည်း ချယ်လ်ဆီးတို့ ဂိုးသွင်းခွင့်ရပေမဲ့ ပါလ်မာရဲ့ကန်ချက်ကို ဗာဘရူဂန် ကာကွယ်နိုင်ခဲ့ပါတယ်။ ၁၂ မိနစ်မှာ ဗဲ့လ်မန်း ကန်တင်ပေးတာကို ရူတာက အပိုင်ခေါင်းတိုက်ပြီးတော့ ချေပဂိုးပြန်သွင်းခဲ့ပါတယ်။
🟥အဲဒီနောက်ပိုင်းမှာ ချယ်လ်ဆီးတို့ ဒုတိယဂိုးရဖို့ အသည်းအသန် အားထုတ်တာမျိုး မတွေ့ရဘဲ ပွဲကို လိုက်မျောနေပြီးရှေ့ပွဲတွေတုန်းက ဘရိုက်တန်ကို ၄ ပွဲဆက်တိုက် အနိုင်ရခဲ့တာကြောင့် အခုလည်း အလွယ်တကူ နိုင်မယ်လို့ ထင်ခဲ့ပုံပါပဲ။ ထူးခြားတာက နှစ်သင်းစလုံး ပထမဆုံးဂိုးပေါက်တည့်မှုကနေ ဂိုးသွင်းခဲ့ပြီး ပထမပိုင်းတစ်ပိုင်းလုံး နောက်ထပ် ဂိုးပေါက်တည့်မှု မရှိတော့ပါဘူး။ ဒုတိယပိုင်း စစချင်းမှာ ဘရိုက်တန်တို့ ရုတ်တရက် Tempo မြှင့်ခဲ့တာကြောင့် ချယ်လ်ဆီး အငိုက်မိသွားပြီး ဂိုးပေးခဲ့ရပါတယ်။
🟥ချယ်လ်ဆီးကစားသမားတွေရဲ့ ပေါ့တီးပေါ့ဆနိုင်တဲ့ ဘောလုံးရှင်းထုတ်ပုံကနေ ရူတာ အသာလေး တင်ပေးလိုက်တာကို မီတိုမာက အဆုံးသတ်သွင်းယူခဲ့တာဖြစ်ပါတယ်။ လက်ကျန်မိနစ်တွေမှာ ချယ်လ်ဆီး ဂိုးရဖို့ ကြိုးစားပေမဲ့ ဘရိုက်တန်ရဲ့ Final Third Zone အတွင်း Clear Cut Chances တွေ မဖန်တီးနိုင်သလို ဗာဘရူဂန်ကလည်း အမှားမရှိလို့ ချေပဂိုးမရဘဲ အရှုံးပေးခဲ့ရပါတယ်။
🟥လိဂ်ဖလားပြိုင်ပွဲမှာ တတိယအဆင့်ကနေ စောစောစီးစီးထွက်ခဲ့ရတဲ့ ချယ်လ်ဆီးအသင်းဟာ အခု FA ဖလားပြိုင်ပွဲမှာလည်း စတုတ္ထအဆင့်နဲ့ပဲ ကျေနပ်လိုက်ရပြန်ပါပြီ။
