09/12/2025
ဆာလာအတွက် ရွန်းနီ သင်ပေးခဲ့တဲ့ နှုတ်ဆက်နည်း
_____________________
လက်ရှိ ဘောလုံးကမ္ဘာမှာ အဆူညံဆုံး ဖြစ်နေတာကတော့ လီဗာပူး ဂန္ထဝင် မိုဆာလာရဲ့ ပေါက်ကွဲသံတွေပါပဲ။ "ငါလုပ်ပေးခဲ့တာတွေနဲ့ ငါ့နေရာကို တိုက်ပွဲဝင်စရာ မလိုဘူး" ဆိုတဲ့ စကားဟာ မှန်သလိုလိုနဲ့ မှားနေကြောင်း၊ ဂန္ထဝင် ကစားသမားတယောက်ဟာ နေဝင်ချိန်ကို ဘယ်လို ရင်ဆိုင်သင့်သလဲ ဆိုတာကို မန်ယူနိုက်တက် ဂန္ထဝင် ရွန်းနီ က သူ့ရဲ့ ကိုယ်တွေ့ဖြစ်ရပ်မှန်တခုနဲ့ ယှဉ်ပြီး မီးမောင်းထိုးပြလာပါတယ်။
၂၀၁၆-၁၇ ရာသီကို ပြန်ကြည့်ရအောင်။ အဲ့ဒီအချိန်မှာ ရွန်းနီဟာ ယူနိုက်တက်အတွက် ၁၃ နှစ်ကြာ ကစားပေးခဲ့ပြီး၊ ဂိုးပေါင်း ၂၅၃ ဂိုးနဲ့ စံချိန်တင်ထားတဲ့ အသင်းခေါင်းဆောင်ပါ။ ဒါပေမဲ့ အသက် ၃၀ ကျော်လာတဲ့အခါ သူ့ရဲ့ ခြေစွမ်းတွေ ကျဆင်းလာတာကို သူကိုယ်တိုင် သိနေပါတယ်။ အထူးသဖြင့် ဇလာတန် အီဘရာဟီမိုဗစ် ရောက်လာတဲ့အချိန်မှာ ရွန်းနီဟာ အရန်ခုံကို ပိုရောက်လာခဲ့တယ်။
ဒီအခြေအနေကို ရွန်းနီ ဘယ်လို တုံ့ပြန်ခဲ့သလဲ? သူ မီဒီယာတွေရှေ့ထွက်ပြီး ပေါက်ကွဲခဲ့သလား? မော်ရင်ဟိုကို အပြစ်တင်ခဲ့သလား? လုံးဝ မလုပ်ခဲ့ပါဘူး။
"ကျွန်တော် ဇန်နဝါရီလမှာ ဟိုဆေး (မော်ရင်ဟို) ဆီသွားပြီး ရိုးရိုးသားသားပဲ မေးခဲ့တယ်။ 'ကျွန်တော် ကစားချင်တယ်၊ အငှားနဲ့ ထွက်ခွင့်ပြုပါ' လို့ပေါ့။ ဟိုဆေးက ငြင်းတယ်။ ယူရိုပါလိဂ်အတွက် ကျွန်တော့်ကို လိုအပ်သေးတယ်၊ နွေရာသီရောက်မှ ထွက်ပါလို့ ပြောတယ်။ ကျွန်တော် မတ်တပ်ရပ်တယ်၊ သူ့လက်ကို ဆွဲနှုတ်ဆက်တယ်၊ ပြီးတော့ အခန်းထဲက ပြန်ထွက်လာခဲ့တယ်။ ပြီးပါပြီ... ဘာမှ ဆက်ပြီး ညည်းညူမနေတော့ပါဘူး" လို့ ရွန်းနီက ပြန်ပြောင်း ပြောပြပါတယ်။
ဒါဟာ "ရိုးသားပွင့်လင်းတဲ့ စကားဝိုင်း" တခုပါပဲ။ အမျိုးသား နှစ်ယောက် လက်ဆွဲနှုတ်ဆက်ပြီး သဘောတူညီမှု ယူလိုက်တာပါ။ ရွန်းနီဟာ ကျန်ရှိတဲ့ ရာသီဝက်မှာ အရန်ခုံကနေ ကျေကျေနပ်နပ် ပါဝင်ခဲ့ပြီး ယူရိုပါလိဂ် ဖလားကို ကိုင်မြှောက်ကာ အိုးထရက်ဖို့ဒ်ကနေ ဂုဏ်သိက္ခာရှိရှိ နှုတ်ဆက်ထွက်ခွာသွားခဲ့ပါတယ်။
လက်ရှိ ဆာလာရဲ့ အခြေအနေကို ရွန်းနီက သုံးသပ်ရာမှာတော့ ပြတ်သားပါတယ်။"အချိန်ဆိုတာ လူသားအားလုံးကို ဝါးမြိုတတ်စမြဲပါ (Time catches up with all of us)" လို့ ရွန်းနီက ဆိုပါတယ်။
"အသက်အရွယ် ရလာပြီး စွမ်းဆောင်ရည် ကျဆင်းလာတဲ့အခါ လူတွေက အကြောင်းပြချက် ရှာတတ်ကြတယ်။ အဲ့ဒီအခါမှာ ကိုယ့်ကိုယ်ကို ပြန်ကြည့်ရမယ့်အစား သူများတွေကို လိုက်ပြီး အပြစ်တင်တတ်ကြတယ်။ အခု ဆာလာ ဖြစ်နေတာ အဲ့ဒါပါပဲ။ သူက ကိုယ့်ကိုယ်ကို ပြန်သုံးသပ်ရမယ့်အစား အာနေးစလော့ တို့၊ မီဒီယာတို့ကို လိုက်ပြီး အပြစ်တင်နေတယ်"
ရွန်းနီက ဆက်ပြီးတော့ - "သူဟာ လီဗာပူးရဲ့ အဓိက ကစားသမားပါ။ ဒီလိုအချိန်မျိုးမှာ လက်မောင်းပင့်တင်ပြီး 'ရတယ်... ငါ ဘယ်လောက် ကောင်းသေးလဲ ပြမယ်ကွာ' ဆိုပြီး သက်သေပြရမှာပါ။ 'ငါက ဂန္ထဝင်မို့လို့ နေရာလုစရာ မလိုဘူး' ဆိုတဲ့ အတွေးမျိုး မဝင်သင့်ပါဘူး။ နောင်နှစ်အနည်းငယ်ကြာလို့ ဒီကိစ္စကို ပြန်ကြည့်ရင် သူပြောခဲ့တဲ့ စကားတွေအတွက် သူနောင်တရပါလိမ့်မယ်" လို့ သတိပေးခဲ့ပါတယ်။
ရွန်းနီဟာ အသက် ၁၇ နှစ်သားကတည်းက ပွဲထွက်ခဲ့ရလို့ အသက် ၃၀ မှာ သူ့ရဲ့ "World Class" စွမ်းရည်တွေ လျော့ကျလာတာကို ရိုးသားစွာ ဝန်ခံခဲ့သူပါ။ ဇလာတန်က သူ့ထက် အသက်ကြီးပေမဲ့ ပိုကောင်းနေသေးတာကိုလည်း သူ လက်ခံခဲ့ပါတယ်။
ဂန္ထဝင် ကစားသမားတယောက် ဖြစ်လာဖို့ ခက်ခဲသလို၊ ဂန္ထဝင် တယောက်အနေနဲ့ နေဝင်ချိန်ကို လှလှပပ ဖြတ်သန်းဖို့ဆိုတာ ပိုပြီး ခက်ခဲပါတယ်။ ရွန်းနီကတော့ သူ့ရဲ့ အတ္တကို ဘေးဖယ်ပြီး အသင်းနဲ့ နည်းပြအပေါ် လေးစားမှု ပြသကာ ထွက်ခွာခဲ့ပါတယ်။ ဆာလာ အနေနဲ့လည်း "အချိန်" ဆိုတဲ့ သစ္စာတရားကို လက်ခံပြီး၊ အပြစ်တင်ခြင်းတွေ ရပ်တန့်ကာ ကွင်းထဲမှာပဲ သက်သေပြဖို့ လိုအပ်နေပြီ ဖြစ်ကြောင်း ရွန်းနီရဲ့ ဇာတ်လမ်းက သင်ခန်းစာ ပေးနေပါတယ်။
Ref: Sports Illustrated
