19/10/2026
الباسكيط و الفولي …
فآخر المنشورات ميكنا شحاجة على هاد جوج فروع لي كيعانيو و غيعانيو هاد الموسم ، و هادشي عطيناه و حذرنا منو شحال من مرة بلا تجاوب …
فرع كرة السلة و لي كان مسير فالمواسم الأخيرة من اللاعب السابق فالفريق الشبعة و لي كنعتارفولو بالخدمة ديالو و الغيرة ديالو من غير ما نعرفوه ولا تجمعنا بيه علاقة، الخدمة لي كتبان على عدة مستويات حتى بدينا كنعتابرو هاد الفرع هو الفرع الأكثر استقرارا و الخلية الإعلامية خدامة و كينقلو المباريات و كاين مستشهرين و تعاقدات (رغم ان بعضهم كان ضعيف) ولاكن كل موسم كتكون من 4 كبارين … اليوما خرج (لضروف خاصة) و بقى الفرع "أونبان" لولا اللجنة المؤقتة لي حاولات تنقد الفريق من المجهول !
فرع كرة الطائرة ولا "الكارثة" ولي هو فرع متوج فالموسم لي قبل لي فات و فلت من الهبوط الموسم لي فات ، سي الرئيس ما مهتم بوالو من غير الحملة الإنتخابية لي معمل فيها والو (و للصدفة نفس الحزب لي منتامي ليلو واحد الرئيس سابق حتى هو كان كيطفي الطيليفون و مكيخلصشي…) ، ولي غتخليه كذالك ميعمل والو فهاد الموسم في انتظار موسم كارثي جديد!
هاد العبث لي واقع فالفروع كيخليك تسقسي راسك، واش طنجة معنداشي ولادا ؟ واش اتحاد طنجة معنداشي لي كيبغيها؟
فاينوما هادوك لي حمقولنا الراس ديالنا بأنهم كيبغيو الفريق (اولا الكرة فيها و الفروع الأخرى لا) ؟
