01/01/2026
لكل مقام مقال…
( فنون القتال والدفاع عن النفس)
إلى كنتي كاتتمرّن فنون قتالية وكتحسب أن أي احتكاك فالزنقة خاصّو تضرب فيه بكل القوة اللي عندك،
راه أنت فاهم الأمور بالغلط.
الدفاع عن النفس ماشي استعراض ديال القوة،
وماشي تفريغ ديال الغضب،
وماشي باش تبيّن أنك “الأقوى”.
فالشارع كاين قانون ما مكتوبش، ولكن خاصك تفهمو مزيان:
1️⃣ التدرّج فاستعمال القوة
ماشي أي هجوم خاصّو كسر.
وماشي أي دفعة خاصّها ضربة قاضية.
كتبدا ديما بالأقل… وكتطلع غير إلا بقى الخطر مستمر.
2️⃣ مؤشر القوة
القوة اللي عندك راه سلاح.
وإلى استعملتيها غلط،
أنت المسؤول… قانونيًا وأخلاقيًا.
وخاص هاد الشي يتعلّم للمتدرّب: كيفاش يتحكم فالقوة ديالو.
الفرق الحقيقي بين المتدرّب والبلطجي
ماشي فالضربة،
الفرق فالقرار.
أنت كاتتمرّن باش تحمي راسك،
ماشي باش تولّي خطر على الناس.
وإلى ما قادرش تتحكم فالقوة ديالك،
راه مازال ما تعلّمتش فن قتالي…
غير تعلّمت الضرب فقط.
واللي علّمك غير مدرّب ديال سيرك، كيدرّب الوحوش بلا أخلاق.
مثال واقعي:
أنت ماشي فالشارع،
شي واحد شدّك من حوايجك وبدّا كيهضر بلا سبب.
أول رد فعل؟
ماشي ضربة…
ولكن مسافة، صوت حازم: «وقف فبلاصتك»
ومحاولة فك الاشتباك من مسافة آمنة.
إلى خلّاك؟
الموقف سالا.
ربحتي بلا حتى ضربة.
إلى قرّب وزاد ضغط؟
كتستعمل قوة غير كافية باش تبعدو وتنجّي راسك:
دفع / نقطة ضغط موجعة / إخلال بالتوازن…
إلى خرج سلاح
ولا الهجوم ولا خطر حقيقي؟
ساعتها فقط
كتستعمل أقصى قوة باش توقف الخطر،
ماشي باش تنتقم.
الفرق هنا ماشي فالتقنية…
الفرق فالقرار.
المتدرّب الحقيقي
كيعرف إمتى يبدا،
وإمتى يطلع،
وإمتى يوقف.
وهذا هو المعنى ديال:
التدرّج فالقوة ومؤشر القوة.
مثال إنساني آخر:
بعض المتدرّبين عندي أطباء ديال المستعجلات،
كيحكيو أن بعض المرات كيكون أهل المريض مكلومهمش تيكون ، فحالة هستيريا،
وممكن شي واحد يشد فالطبيب بحكم كيشوف أنه قصّر فحق المريض
(وهذا سلوك مرفوض طبعًا).
ولكن واش نزيدو الطين بلّة بـ:
نكسرو نيف ديال أب أو أخ أو زوج م؟
ولا نضربوه فالحنجرة ونقضيو عليه نهائيًا، كيفما كنشوف ففيديوهات بعض المتعالمين؟
ولا…
ندافعو على راسنا غير بالقدر الكافي وخلاص؟
وللحديث بقية…
سينسي / أيوب الحومات
