HB Culture

HB Culture 1938-2007

PASSION CREATES US

الرحيل و المحاسبة و قبل منها تسريع الجمع العام !ألتراس حلالة بويز و الجمهور الواعي فهاد تلاث السنوات الأخيرة كان عقلاني ...
19/08/2026

الرحيل و المحاسبة و قبل منها تسريع الجمع العام !

ألتراس حلالة بويز و الجمهور الواعي فهاد تلاث السنوات الأخيرة كان عقلاني بشكل كبير و كان عندوا نظرة واقعية لكل موقف و لكل حدث... حتى مستوى النقد كان كيكون بشكل موزون و رزين، و شامل لمنظومة النادي لي بالأساس غائبة.

محاولة تشتيت الرأي العام بأن المطالبة بالرحيل و المحاسبة هي حرب شخصية كيف كايداعي الرئيس و الحاشية ديالوا... خطة بليدة ما دام الجمهور وصل لمستوى اليأس من الطريقة لي تسيرات بها للكاك، و من العبث و التدبير للمال العام لي ولا مكشوف... ميزانية كاتفوق 6 د المليارات فظرف تلاث سنوات كايخصها المطالبة بأكثر من المحاسبة... ما دام النتيجة غايبة.

الساكنة القنيطرية اليوم و كيف البارح كانت كطالب بتسريع الجمع العام، و كا طالب بفتح باب الانخراط فوجه الناس لي عندها غيرة و عندها رغبة فخدمة النادي ... و ماشي لخدمة مصالحهم كيف كايدير الرئيس رفقة الكراكيز التابعين ليه.

تأخير الجمع العام حاليا كيبان أمر مقصود... و لي هو فحالة تم الإقالة أو الاستقالة ديال هاد المكتب الفاشل، هي يخلي الكاك فحالت شتات و دمار كثر من هاد الدمار لي فيه.

و ترويج لدعاية مكاينش البديل، مكاينش حسن من الرئيس المخضرم... و مكاينش و مكاينش، سياسة إلهاء مغاتلهيش الجمهور القنيطري الواعي على أن الحاجة الوحيدة لي مكايناش هي مكتب و رئيس، مكاينش تدبير جيد للمال العام، مكايناش مصداقية... و كخلاصة لهادشي حتى الجمهور معندوش غي كلمة وحدة ، عندو جوج كلمات تابثين و منطقيين " المحاسبة و الرحيل " .

اتضح بالملموس كما كان واضحٌ جلياً لنا و للعديد ممن عايشوا الفترات السابقة، أنه ليس لنا رئيس أو مكتب بل للكاك رب عمل تعيش...
10/08/2026

اتضح بالملموس كما كان واضحٌ جلياً لنا و للعديد ممن عايشوا الفترات السابقة، أنه ليس لنا رئيس أو مكتب بل للكاك رب عمل تعيش على ميزانية ناديه أسر و تجمع لباردين الكتاف همهم الوحيد تمجيد مصدر رزقهم على حساب مصلحة الكاك، و ذلك بتوحيد الرأي في صفحات الفايسبوك، بعد انتظار الإشارة من ربهم و نعوذ بالله، بعدها يتم غزو مواقع التواصل بعبارات التضامن التي هي مدفوعة الأجر.

الرئيس باقتنائه لمجموعة كلاب مروضة و مطيعة، و بعد اطلاقه لحملة التضامن مع نفسه و لحملة ( گولو بلي غا عشرين لي ضدي و الجمهور مقسم) ( گولو بلي الانتخابات جايا ) و ( گولو بلي علاش هادشي غا معايا ) و ذلك بعد صعوده فوق النخل و اقتدائه بلون رايبي جميلة السياسي سابقاً، يحاول جاهداً اليوم التشبت بالكرسي الرئاسي و مشروعه و آلياته هم عبدة النرجيلة منتظري الأنابيك أو أنا والو بلا بيك.

مسرحية المرتزقة كمثل محدثي الانفلاتات في ثورات التغيير عبر العالم و خلق افلام كسيارة بدون مجرم و ازقة بدون كاميرات هي لعب مفروشة من طرف شخص فاسد حان وقت رحيله الحتمي و ضرورة محاسبته على تشغيل أشخاص بدون الابلاغ عنهم في جداول la cnss.

و السؤال الحقيقي خلف هذه المسرحيات و التمويهات، ماذا كان مشروع الكاك خلال الثلاث سنوات؟ هل اطلع أحد منا و منكم على تفاصيله ؟ هل وضحت الصفحة الرسمية بلاغا رسمياً فيه قيمة الديون التي تمت تسويتها ؟ متى الجمع العام ؟ و لماذا لم يعلن المكتب استقالته كما قيل قبل نهاية الموسم ؟ لماذا لم يتم توضيح رحيل أكثر من عشرين لاعب؟ أما بين هذا السؤال و ذاك الواضح أن الكاك أصبحت مهنة و مصدر رزق و أن الموضوع أعمق من تسيير بل القضية تستدعي تدخلا عاجلا لفك شفرة عصابة النهب و تشغيل أطفالٍ كبِرو.

الرحيل و المحاسبة و كل التضامن مع النادي الرياضي للقنيطري.

ليوم، و بداعي حب الكاك و محاربة الفساد الرياضي بصيفتوا فيروس كاينخر الفريق ديالنا، تم الاستماع لعدد من أفراد الجمهور في...
07/04/2026

ليوم، و بداعي حب الكاك و محاربة الفساد الرياضي بصيفتوا فيروس كاينخر الفريق ديالنا، تم الاستماع لعدد من أفراد الجمهور في ولاية الأمن بعدما توجه الرئيس بتهم واهية ضدهم، و من خلال هاد الأسطر كانعلنوا تضامنا التام مع الجميع، ما دمنا جسد واحد واعي باللعبة و بالفبركة لي كايمارسها المسؤول الأول على الإخفاق فالنادي الرياضي القنيطري، فرصة كبيرة بالنسبة لينا باش تتوحد الصفوف ما دام عندنا موقف واحد.

الحرية للجمهور، الحرية للكاك.

ما عمرنا عشنا على وقع النتائج و كانت الأزمات واقع تزادينا فيه، عمرنا رضينا نبدلو الخضر بالكحل و لكن الواقع و المواقف كاي...
28/03/2026

ما عمرنا عشنا على وقع النتائج و كانت الأزمات واقع تزادينا فيه، عمرنا رضينا نبدلو الخضر بالكحل و لكن الواقع و المواقف كايفرضو راسهم علينا.

حلالة خوت تشادو فالنكسة قبل الفرح، بارطاجاو الصبر و الرجلة و الروح لي كاتزرع فجسد مريض، حتى ولا الاستسلام بالنسبة لينا وهم.

ما عمر شي واحد عايش معانا دابا شاف الفرقة لي حلم بيها و مزال كلنا عندنا رغبة و تخيلات فأننا شي نهار غا نعيشوها، ما كاينش دليل ملموس ولكن كاينين خوت لي ضحاو و مازال كايضحيو باش يعيشوا هاد النهار، و تا لا ما عاشوهش حالفين ما يسمحوا فال DRAPEAU و فسمية المدينة لي ماكانرضاوش انها طيح الأرض كثر ما هي طايحة.

عارفين الفرقة كيفاش مبنية و عارفين السباب لي النهاية معروفة فمشهد معاود … غدا ولا ليوما كلنا الفاس نوقفوا مع الكاك ماشي مع تا شي واحد اخر، طريق السلامة لگاع لخوت و ان شاء الله خير

18/03/2026

الفكرة من نهار التأسيس و هي مبنية على أهداف سامية و هي تشجيع النادي الرياضي القنيطري، و توحيد حوام المدينة فجسد واحد، ماكتفرقهم فتنة ما كتفرقهم أفعال طائشة.

الفكرة تخلقات باش تخلينا لحمة واحدة عندها صوت واحد، ما كاينش الفرق بين لي عندو و لي ماعندوش بين لي مكمل قرايتوا و بين لي كايجيبها بعرق كتافو و بين المعدور و لي بصحتو، هاد الاختلافات كادوب ملي كلشي كايبارطاجي معا كلشي و ملي ولد حلالة ما كيدوزش خوه بأي حاجة قد عليها.

الفطور كان جماعي، و فجنبو كاين السجن المركزي لي كانطلبو من ربي يهون على أي ولد الفيراج فهاد الشهر المبارك .. الحرية ليهم و للخضرة

09/03/2026

Ultras culture in North Africa has always been more than football; it’s identity, resistance, and memory. In this video we explore the story of the Helala Bo...

08/03/2026

ملي كاتكون الحرب شخصية بين أنا كايروج و كايقتاحم العاطفة القنيطرية عن طريق ولاد البلاد لي يحسو بقيمة و بحجم التوني، و بين أنا أخرى كاتنتج واقع معاكس على داكشي لي تقال قبل كانوليو أمام أزمة كبيرة مماثلة لداكشي لي كايديروه السياسيين و لي المتناقض الأول كايهدر عليها باش يغطي الفشل ديالو.

ولاد البلاد البارح بدون أي اشتغال على المدرسة و التكوين، و 65 انتداب اليوم من أجل نفخ التقارير المالية، بزاف فهاد العدد ما لعب تا دقيقة، و مازال نرجس كاتحاول تلفق تهم المهزلة فناس آخرين، و مازال باغيينا نخرجو نحتافلو بالصعود من الهواة … المحاسبة و ماشي غير الرحيل حيت الفشل و الفساد واضح و لا غبار عليه.

معركة نتا ضد نتا

ولاد مدينة وحدة، كانتفسو نفس الأوكسجين و كانعيشو نفس المشاكل، كاتجمعنا الكاك و كاتجمعنا حوام قنيطرة و كايقوينا الاحترام ...
07/03/2026

ولاد مدينة وحدة، كانتفسو نفس الأوكسجين و كانعيشو نفس المشاكل، كاتجمعنا الكاك و كاتجمعنا حوام قنيطرة و كايقوينا الاحترام و الأخوة، يقد لحد الساعة ما يكونش مكتاب لينا نعيشو الفرحة … و لكن خاصنا نكونوا مفتاخرين أننا فرضنا راسنا بلا پوديوم و بلا محسوبية و زبونية و بلا تا واحد ما يدافع لا علينا و لا على نادينا … النشوة بتجاوز المعاناة و تبقى أوريجينال حسن بزاف من نشوة مغشوشة شكلاً و مضموناً … ما عمروا بقا الحال فينا على داكشي لي ما عشناهش و لكن كايبقى فينا على خوتنا لي وصل أجلهم بلاما يعيشو داكشي لي تمناو يا فحياتهم يا مع الفرقة .. داكشي علاش الكرة آه و لكن كاين حوايج ضروري لي ولد الفيراج عمروا يتخلا عليهم و هما الوعي، الدراسة، و النجاح و رضى الوالدين ..

فهاد الأيام المباركة تاندعيو لگاع خوتنا لي راحوا بالرحمة و بالمغفرة رحمكم الله.

و كانتمناو من دوك لي هازين التوني فوق لحمهم يردوا شوية الاعتبار و البدية تكون من ماتش غدا … حيت حنا ما كانشوفوهاش مجرد فرقة … و أعان الله أي واحد باغي الخير لهاد الفرقة.

ماشي غير باش نردوه بالداريجة و لكن باش نحاولو نوضحوا الواضحات و لي هي تابثة في المواقف و فالخرجات و فداكشي لي كاتعيشو ال...
27/02/2026

ماشي غير باش نردوه بالداريجة و لكن باش نحاولو نوضحوا الواضحات و لي هي تابثة في المواقف و فالخرجات و فداكشي لي كاتعيشو الكاك ليوم و لي هو نسخة طبق الأصل من الماضي.

فمدة ثلاث سنوات حاولات المجموعة بكل ليونة التعامل مع المكتب الحالي أو مع الرئيس الحالي، حفاظاً على سيرورة النادي وباش مايدخلوناش البعض فمطبات الماضي لي تخلينا عليها بحسن النية و ما دمنا كنا السباقين للم الشمل عبر الدعوات المتكررة و فعلاً بالاجتماع لي كان فمقر النادي.

هاد المرحلة كانت فيها تجاوزات متعددة و لي فأولها هو انعدام التواصل، العشوائية التسييرية و الانفرادية، عودة المرايقية لجنابات الملعب و منهم لي ولا كايدخل فابور و القصة التاريخية للمنصة، الأرقام الكبيرة فالتقرير المالي، التطاول على الاختصاصات، و شن الصراع كل مرة بين الرئيس و الخلية الإعلامية، نفسهُ مع المدربين، نفسه مع اللاعبين و ما غير هذا.

هاد التجاوزات كانت مرئية بالنسبة لينا و للجميع، و كل مرة تانحاولو نتافضو ضدها، تانفكرو مية مرة و بلاصة ما يتم التصعيد تانحاولو نديرو غا إشارات و تانعاودوا نطالبو بمطالب مشروعة، بحالا كانوصلو لهاد السيد أنه عندوا فرص للتغيير .. لكن طاح المطلب على البصير.

داز العام اللول لي مازال باغينا البعض نخرجو نحتافلو علا ودو، و داز العام التاني بانعتاق فالدقيقة الأخيرة من النزول و بجوج ديال المليار و كثر، و جا العام الثالث لي كانشوفوه كيما كلشي نسخة من العام لي فات… و مرة اخرى انعدام المعلومة، صراع بين اللاعبين و الرئيس واخا هادشي يبغيو يخبيوه، تدخل فالقرارات و استمرار سياسة انتظار المنح، عدم تأدية شهريات اللاعبين، و خسارات بطرق العار.

الرئيس بلاصت ما يلقا الحل لهادشي، ناض كايجمع الصحافة الزنقاوية و كايسطر فهرس الأسئلة و كايخرح يستفز الجمهور لي هو كابقى كبر من الإنجازات ديالو و ديال غيرو، و كايلفق التهم، و كايحاول يتلاعب نفسياً بمفهوم الصراع بكل نرجسية، و كايضاد ضمنياً مع كافة التصريحات ديالو قبل ما يرجع يكون رئيس، بالإضافة لأنهم كايصنعو جيش فايسبوكي كايحاول يغطي على الإخفاق، و كايروج لعبارة علاش هذا كاديرو معاه هادشي و ما كاديروهش مع لي قبل، و فالمقابل كايتفاداو يقارنو كمية العشوائية مع حجم ردة الفعل و كايتفاداو تا لغة الأرقام لي كاتگول أنه سير 9 سنوات فآخر 20 سنة، و مازال نفس السياسة نفس التعنث و نفس النهج ديال انتظار المنح.

الحضور فهاد الظروف لي عامرة بالخبث و التلفيق و فالضرب فالجمهور و فالجميع و التصميم على عبارة " أنا مش غلطانة أنا" و تطوير النرجسية بطريقة ما كاتخدمش الجو العام، كان بالنسبة لينا حل بعيد، حفاظاً مرة أخرى على سلامة الجو العام.. ماداموا كايحاولو يجرونا لردة فعل يغطيو بيها فشلهم الدريع.

باش ما يغلطوناش و يربطو ردة الفعل بالنتائج،المطلب ديال الجمهور القنيطري ما عمروا كان هو النتائج، و لكن من ديما كان هو نادي احترافي و مهيكل و مستقل عن سياسة المنح و نادي لي كايقَدر الجمهور ديالو و كايوفر ليه المعلومة و شروط الراحة النفسية و الجسدية … عوض محاولات الاستفزاز و نكران الجميل، و المقاطعة ما عندهاش علاقة لا بالنتائج لا ب " فالشدة نفوتك جامي" حيت الشدة ليوم هي استمرار هاد العبث و الفساد و الخبث أما حضورنا فالأزمات سواء معنويا و مادياً موثق و منقوش.

مازال لينا عودة … هنا نيت، ماشي ضروري بداكشي لي عندو علاقة بالنادي و لكن بأي حاجة يمكن ليها ترسخ فعقل ولد حلالة.

Address

Kenitra
14000

Website

Alerts

Be the first to know and let us send you an email when HB Culture posts news and promotions. Your email address will not be used for any other purpose, and you can unsubscribe at any time.

Shortcuts

Share

Category