05/03/2026
بنهاشم ماشي بوحدو اللي كان السبب فالهزيمة.
اليوم الوداد لعبات مع فرقة واقفة كتلعب مع بعضياتها منذ سنين، كل عام كيتبدلو فيها جوج ولا ثلاثة ديال اللعابة زائد أن الجيش ولات عندو شخصية قوية فاش احتك مع الفرق الكبرى فعصبة الأبطال والدليل على ذلك هو الماتش الكبير اللي دارو فمصر ضد الأهلي. ما يمكنتش لفرقة فطور البناء تنافس فرقة ضايرة هاذي سنين وتجاري الإيقاع ديالها.
من جهة أخرى المكتب المسير لم يدافع على حظوظ الفريق، قبل يلعب ضد فرقة استراحت يومين أكثر منك واليوم شفنا كيفاش الفرقة وقفات فالشوط الثاني ولعابة بحال مفيد وزياش خرجوا بشد عضلي حنت الماتش ديال الأحد ضد بركان كان فيه الريتم طالع واللعابة داروا مجهود كبير.
وأخيرا بنهاشم خسر معركة الوسط اليوم والوقت اللي بغا يتدارك الوضع لقى راسو خاصو يدير تغيييرات اضطرارية، اليوم كنا نكونوا أحسن ب 4-4-2 باش تحكم وسط الميدان وتلعب لعب مباشر على الهنوري وبن يدر. فماتش اللي عارف فيه راسي الخصم متفوق عليا بذنيا وفنياً نفضل نتعادل ونحافظ على فرق 4 نقط على الخصم المباشر على أنني نغامر وأنا عارف راسي ما واجدش.
فالأخير العام باقي طويل وباقي كلشي ملعوب، خاص الصبر ونزيدو فالخدمة ومع توالي المباريات نقدرو نكونو أحسن وأهم حاجة هي الوداد ترجع لعصبة الأبطال العام الجاي.
