28/08/2026
ليش طفلك بكرر نفس التصرف مع إنو بيعرف إنو ممنوع؟
بتوقفيه وبتشرحي له، وبيبين إنو فهم عليك
بس بعد شوي بيرجع بيعمل نفس الشي
وقتها طبيعي تسألي:
«طيب ما هو بيعرف إنو ممنوع، ليش عم يكرره؟»
في عدة أسباب ممكن تخلي الطفل يكرر التصرف، وواحد منها هو:
شو بيعتقد إنو هالتصرف عم يحققله؟
مثلا ممكن يكون معتقد:
«لما بعمل هالشي، ماما بتنتبهلي»
فمع إنو بيعرف إنو التصرف ممنوع، بيضل يكرره لأنو بنظره عم يساعده يحصل على انتباهك
مش لأنو قاعد عم يخطط كيف يزعجك أو يستفزك
بس لأنو مع الوقت تعلّم إنو هيدا التصرف بالذات بخليكي توقفي كل شي، تطلعي فيه وتحكي معه
وممكن طفل تاني يكون معتقد:
«لما برفض التعاون، يعني أنا اللي باخد القرار»
فبيكرر الرفض لأنو بهاللحظة بيحس إنو إله تأثير بالموقف، خصوصا إذا كان عم يتلقى أوامر وقرارات طول النهار وما عم يلاقي مساحة يختار فيها
هيدي المعتقدات مش أفكار واعية بيقعد الطفل وبيقولها بينه وبين حاله
هي استنتاجات داخلية بتتكون من خلال تجاربه، وبتأثر على الطريقة اللي بيتصرف فيها
يعني هو ممكن يعرف إنو هالتصرف بالذات ممنوع
وبنفس الوقت يكون معتقد إنو هيدا هو الطريق اللي بيساعده يحصل على شي داخلي بحاجة إله، متل الانتباه أو الشعور إنو إله تأثير وقرار
لهيك تكرار التصرف مش دايما يعني إنو ما عم يفهم عليكي
ومش بالضرورة يعني إنو الشرح ما وصل
ممكن يكون بعده ما لقى طريقة تانية أنسب يحصل فيها على هالحاجة
وهيدا أكيد ما يعني إنو نقبل التصرف أو نلغي الحد
إذا كان عم يضرب، منوقف الضرب
وإذا كان عم يعمل شي مؤذ أو غير مقبول، منحافظ على الحد
بس إذا ركزنا بس على سؤال:
«كيف بدي وقفه؟»
من دون ما نفهم شو عم يحققله هالتصرف باعتقاده، ممكن يوقف هلّق ويرجع يكرره بعدين، لأنو الحاجة بعدها موجودة والطريقة البديلة بعدها مش موجودة
وهون بتشتغل منهجية غيّري العدسة
ما منطلع بس على التصرف اللي قدامنا
منغيّر العدسة لنسأل:
شو عم يحاول طفلي يحقق من خلال هالتصرف؟
هل عم يحاول يلفت انتباهي؟
هل عم يحاول يحس إنو إله تأثير أو مساحة يقرر؟
وبعد ما نفهم، منقدر نحافظ على الحد ونعلّمه طريقة أنسب يحصل فيها على حاجته
لأن الهدف مش بس إنو نوقف التصرف بهاللحظة
الهدف كمان إنو نساعد الطفل يبني طريقة جديدة يتعامل فيها مع حاجاته بالمواقف الجاية
شو التصرف اللي بكرر طفلك رغم إنو بيعرف إنو ممنوع؟
