18/05/2026
ສະຫະພັນບານສົ່ງແຫ່ງຊາດລາວ ສຳເລັດຜົນການຝຶກອົບຮົມຜູ້ຕັດສິນບານສົ່ງຫາດຊາຍ ປະຈຳປີ 2026
ການຝຶກອົບຮົມຜູ້ຕັດສິນບານສົ່ງຫາດຊາຍ ປະຈຳປີ 2026 ຂອງ ສະຫະພັນບານສົ່ງແຫ່ງຊາດລາວ ໄດ້ສຳເລັດລົງຢ່າງຈົບງາມ ໃນວັນທີ 16 ພຶດສະພາ 2026 ຫຼັງຈາກໄດ້ຈັດຂຶ້ນເປັນເວລາ 3 ວັນ ແຕ່ວັນທີ 14-16 ພຶດສະພາ 2026 ທີ່ ເດີ່ນກິລາບານສົ່ງໃນຮົ່ມກອງທັບ ບ້ານຈອມມະນີ, ເມືອງໄຊເສດຖານະຄອນຫຼວງວຽງຈັນ.
ພິທີປິດການຝຶກອົບຮົມ ໄດ້ຮັບກຽດຈາກ ທ່ານ ປີໄຊ ສຸວັນໄຊ ຮອງປະທານ ແລະ ເລຂາທິການ ສະຫະພັນບານສົ່ງແຫ່ງຊາດລາວພ້ອມດ້ວຍ ທ່ານ ທິບພົງພັດ ມີນີວົງ ຮອງເລຂາທິການ ແລະ ຜູ້ຝຶກສອນຜູ້ຕັດສິນບານສົ່ງ ລວມທັງ ທ່ານ ນ. ວັນຊະນະ ສີວົງຊຳ ຜູ້ຝຶກສອນຊ່ວຍ ເຂົ້າຮ່ວມ ແລະ ມອບໃບຢັ້ງຢືນໃຫ້ແກ່ຜູ້ເຂົ້າຮ່ວມ.
ຕະຫຼອດໄລຍະການຝຶກອົບຮົມ, ຜູ້ເຂົ້າຮ່ວມໄດ້ຮຽນຮູ້ທັງພາກທິດສະດີ ແລະ ພາກປະຕິບັດ ກ່ຽວກັບກົດກາການແຂ່ງຂັນບານສົ່ງຫາດຊາຍ, ວິທີການສ້າງສະໜາມແຂ່ງຂັນ, ກະຕິກາການຕັດສິນ, ການຄວບຄຸມການແຂ່ງຂັນ ແລະ ການປະຕິບັດໜ້າທີ່ຕ່າງໆ ໃນສະໜາມແຂ່ງຂັນ ຕາມມາດຕະຖານ ແລະ ກະຕິກາສາກົນ. ນອກຈາກນີ້ ຍັງໄດ້ມີການຕີລາຄາຜົນການຝຶກອົບຮົມ ຜ່ານການສອບເສັງພາກທິດສະດີ ແລະ ພາກປະຕິບັດ ເພື່ອວັດແທກຄວາມຮູ້ ແລະ ຄວາມສາມາດຂອງຜູ້ເຂົ້າຮ່ວມການຝືກອົບຮົມ ນຳໃຊ້ບົດຮຽນເຂົ້າໃນການປະຕິບັດຕົວຈິງໃນການແຂ່ງຂັນ. ຜົນການຕີລາຄາໂດຍລວມ ພົບວ່າ ຜູ້ເຂົ້າອົບຮົມສ່ວນໃຫຍ່ ມີຄວາມເຂົ້າໃຈກະຕິກາ ແລະ ສາມາດປະຕິບັດໜ້າທີ່ໄດ້ດີ ຕາມຫຼັກມາດຕະຖານການຕັດສິນ.
ໃນໂອກາດດັ່ງກ່າວ, ຄະນະສະຫະພັນ ໄດ້ເນັ້ນຢ້ຳເຖິງ ວິໃສທັດ ແລະ ແຜນການພັດທະນາຜູ້ຕັດສິນລາວ ພ້ອມທັງ ຊຸກຍູ້ໃຫ້ນັກສຳມະນາກອນ ໄດ້ນຳເອົາບົດຮຽນ ທັງພາກທິດສະດີ ແລະ ພາກປະຕິບັດຕົວຈິງ ໄປຈັດຕັ້ງປະຕິບັດຕົວຈິງ ພ້ອມທັງ ສືບຕໍ່ຝຶກຝົນຫຼໍ່ຫຼອມ ແລະ ພັດທະນາຕົນເອງ ຢ່າງຕໍ່ເນື່ອງ ເພື່ອໃຫ້ກ້າວສູ່ລະດັບ AVC ແລະ ລະດັບສາກົນ ໃນອະນາຄົດ. ທັງນີ້ ກໍເພື່ອເປັນການກະກຽມຄວາມພ້ອມ ຮອງຮັບການເປັນເຈົ້າພາບ ການແຂ່ງຂັນກິລາ SEA Games ຄັ້ງທີ 36 ຂອງ ສປປ ລາວ ໃນອະນາຄົດ.
ການຝຶກອົບຮົມໃນຄັ້ງນີ້ ຖືເປັນອີກໜຶ່ງກ້າວສຳຄັນ ໃນການພັດທະນາບຸກຄະລາກອນດ້ານການຕັດສິນ ແລະ ຍົກລະດັບວົງການບານສົ່ງຫາດຊາຍຂອງ ສປປ ລາວ ໃຫ້ມີຄຸນນະພາບ ແລະ ສອດຄ່ອງກັບມາດຕະຖານສາກົນ.
ສບສ ຂໍສະແດງຄວາມຂອບໃຈ ມາຍັງທຸກສ່ວນ ທີ່ໃຫ້ການສະໜັບສະໜູນການຝຶກອົບຮົມຄັ້ງນີ້ດ້ວຍ.
