13/08/2025
📊🎉✨ ໄຊຊະນະຂອງ 🇱🇦 ເອສຣາ ນອກຈາກສ້າງປະໂຫຍດໃຫ້ສະໂມສອນ ຍັງສ້າງຜົນປະໂຫຍດໃຫ້ວົງການບານເຕະລາວ ແລະ ປະເທດຊາດ‼️
—————————————————
✍️ ໂດຍ: ເອກະສັນ ທິບພະຈັກ
—————————————————
ແຟນບານຫລາຍທ່ານ ທີ່ຕິດຕາມ ສະໂມສອນ 🇱🇦 ເອສຣາ ຄືຊິຮູ້ຂ່າວໄຊຊະນະນັດຫລ້າສຸດຂອງທີມ ທີ່ບຸກໄປຊະນະ 🇲🇲 ຢາງກຸ້ງ ຢູໄນເຕັດ ຈາກມຽນມາ ດ້ວຍການດວນຈຸດໂທດ 5-3 ຮອບຄັດເລືອກ ເຕະບານຊາຍ ຊິງແຊ້ມສະໂມສອນອາຊີ ລະດັບ 3 ຫລື AFC Challenge League ລະດູການໃໝ່ 2025-26 ເມື່ອວັນທີ 12 ສິງຫາ 2025 ຜ່ານມາ.
🇱🇦 ເອສຣາ ທີມແຊ້ມລີກສູງສຸດຂອງລາວ ທັງເປັນແຊ້ມຊິງຂັນທ່ານນາຍົກລັດຖະມົນຕີ ແຫ່ງ ສປປ ລາວ ລະດູການຫລ້າສຸດ ເຂົ້າຮ່ວມໃນຖານະນ້ອງໃໝ່ ເປັນຄັ້ງທຳອິດ ເປັນຝ່າຍອອກໄປຢາມ 🇲🇲 ຢາງກຸ້ງ ຢູໄນເຕັດ ແຊ້ມລີກຄັບຂອງມຽນມາ ຢູ່ສະໜາມຕູວັນນາ ໃນນະຄອນຢາງກຸ້ງ, ເຊິ່ງການແຂ່ງຂັນໃນເວລາປົກກະຕິ 90’ ສະເໝີກັນ 0-0 ຕໍ່ເວລາພິເສດອີກ 30’ ຢາງກຸ້ງ ເປັນຝ່າຍຍິງຂຶ້ນນໍາກ່ອນນາທີ 97’ ແຕ່ ເອສຣາ ໄລ່ຕີສະເໝີຈາກ ອານັນຕະຊາ ສີພົງພັນ ນາທີ 109’ ຈົບເກມ 120’ ນາທີ ສະເໝີກັນ 1-1 ຕ້ອງມາດວນຈຸດໂທດຕັດສິນ ແລະ ເປັນ ເອສຣາ ຍິງໄດ້ຄົມກວ່າ ຊະນະດວນຈຸດໂທດ 5-3, ເຮັດໃຫ້ ເອສຣາ ຄວ້າສິດໄປແຂ່ງຂັນຮອບສຸດທ້າຍ ຫລື ຮອບແບ່ງກຸ່ມຕໍ່ໄປ.
ຄວາມຈິງການຄັດເລືອກນັດນີ້ 🇱🇦 ເອສຣາ ແມ່ນຈະໄດ້ຫລິ້ນຢູ່ ສປປ ລາວ ແຕ່ບໍ່ພ້ອມເປັນເຈົ້າພາບ, ເນື່ອງຈາກບໍ່ສາມາດສ້າງເງື່ອນໄຂ ໃຫ້ມີລາຍຮັບເພີ່ມຈາກຜູ້ໃຫ້ການສະໜັບສະໜູນ ແລະ ຂາຍລິຂະສິດການຖ່າຍທອດສົດ ເພາະງົບປະມານ ທີ່ສະຫະພັນບານເຕະອາຊີ (AFC) ມອບໃຫ້ທັງສອງທີມ ເພື່ອມາບໍລິຫານໃຊ້ຈ່າຍຄ່າຕ່າງໆ ເປັນຕົ້ນ ຄ່າປີ້ຍົນ, ຄ່າເດີນທາງ, ຄ່າທີ່ພັກ, ຄ່າອາຫານ ແລະ ການໃຊ້ຈ່າຍອື່ນໆ ແມ່ນບໍ່ພຽງພໍ, ດັ່ງນັ້ນ 🇱🇦 ເອສຣາ ຈຶ່ງມອບສິດໃຫ້ 🇲🇲 ຢາງກຸ້ງ ຢູໄນເຕັດ ໄດ້ເປັນເຈົ້າພາບ ຊຶ່ງ ຢາງກຸ້ງ ຢູໄນເຕັດ ກໍຕອບຕົກລົງພ້ອມເປັນເຈົ້າພາບ. ຢ່າງໃດກໍຕາມ ເຖິງວ່າ ເອສຣາ ເສຍປຽບຄູ່ຕໍ່ສູ້ໃນນາມເປັນທີມຢາມ ແຕ່ຍ້ອນຫົວໃຈນັກສູ້ ບວກກັບຄວາມມານະອົດທົນ ແລະ ພະລັງແຫ່ງຄວາມສາມັກຄີ ນຳມາສູ່ໄຊຊະນະທີ່ມີຄວາມໝາຍ ແລະ ຄວາມສຳຄັນຢ່າງຍິ່ງຕໍ່ສະໂມສອນ, ວົງການບານເຕະລາວ ແລະ ປະເທດຊາດ.
👏🔹ຜົນປະໂຫຍດຕໍ່ສະໂມສອນແນວໃດ?
✅ ໄຊຊະນະນັດນີ້ ເຮັດໃຫ້ ເອສຣາ ຈະໄດ້ຂຽນປະຫວັດສາດອີກໜ້າໃໝ່ໃນເວທີລະດັບທະວີບ ເຖິງວ່າ ຈະມາໃນຖານະນ້ອງໃໝ່ ແຕ່ຂໍໄປໃຫ້ໄກທີ່ສຸດ.
✅ ເອສຣາ ໄດ້ຮັບເງິນອຸດໜູນຈາກສະຫະພັນບານເຕະອາຊີ (AFC) ຈຳນວນ 100,000 ໂດລາສະຫະລັດ ຈາກການຜ່ານໄປຫລິ້ນໃນຮອບແບ່ງກຸ່ມ.
✅ ເອສຣາ ຈະໄດ້ເກັບຄະແນນເພີ່ມ ເພື່ອຈັດອັນດັບສະໂມສອນ ລະດັບທະວີບ.
