Coach Mohammad Abdulaziz

24/08/2023

من كام يوم كده كنت باخد تدريب على حاجات جديدة في الشغل ، و تم انتدابي أنا و واحد زميلي عشان نتدرب عليها

قاعد بسمع الموظف اللي بيدربنا و ببص عليه و على زميلي ، أنا أربعين سنة و هما الاتنين ٢٤ سنة و لسة طلبة في نفس الجامعة

#السؤال بقى :
هل من حقي اتضايق أو تصعب علي نفسي اني بتساوى مع زميلي الأصغر مني سنا (فرق ١٦ سنة) و كمان إن اللي بيدربنا من عمر زميلي ؟

في انتظار تعليقاتكم الرائعة ، و إن شاء الله البوست اللي جاي
هتناقش معاكم في رأيي

20/08/2023

لسة شايف بوست عن راجل عنده فوق الستين سنة ، حاسس بالوحدة رغم وجود مراته معاه ، بيشتكي من الوحدة و إن حتى مراته لو اتفتح معاها أي نقاش بينتهي دايما بالخناق

اللي لفت نظري التعليقات على مشكلته ، معظم اللي نصحوه قالوا له روح صلي في الجامع و حاول تعمل علاقات هناك هتلاقي الصحبة الصالحة اللي تونسك ، و القرآن خير جليس

رغم جمال النصيحة دي و حقيقي ربنا يجزى خير كل واحد قالها ، إلا إن لفت نظري حاجة

لما الراجل وصل للعمر ده ، بقت النصيحة الأكبر إنه يدور على الصحبة الصالحة في الجامع

طب لو صاحب المشكلة كان في الثلاثينات أو الأربعينات مثلا ، هل كنا هنلاقي اللي ينصحه يروح الجامع و إن القرآن خير جليس ؟

يا ترى بعد العمر ده كله ، نفهم ايه من مشكلة صاحب البوست ؟ أعتقد أهم درس : إن القرب من رب العالمين و صلة الرحم و انتقاء الناس في حياتك أهم بكتييييير جدا من الإنجازات المادية رغم أهميتها اللي محدش يقدر ينكرها



#متنساش


#كلمة عن #العمر

13/08/2023

الحمد لله حتى يبلغ الحمد منتهاه

ده آخر تقييم الأسبوع اللي فات ، و الحمد لله بالنسبة لي ككوتش ده إنجاز رائع اتعمل في أقل من شهرين ، و الفضل يعود (بعد ربنا سبحانه) لالتزام صاحبة التقييم بالبرنامج و الواجبات الأسبوعية خلال الجلسات

و أحب أقول لصاحبة التقييم إن أنا اللي بشكر حضرتك جدا ، لأني اتعلمت من حضرتك زي ما انتي اتعلمتي حاجة جديدة ، و يكفيني شرفا إني تعاملت مع إنسانة في منتهى الأخلاق و الطيبة زيك

و من ضمن الكلام الرائع اللي حضرتك قولتيه في آخر جلسة و اتحفر في الذاكرة :

العيب مش في الطيب ، إنما العيب في اللي بيستغل الطيب



#متنساش


#كلمة عن #الشكر
#شكرا

24/07/2023

مش لازم تمر بألم و وجع عشان تتغير

مش لازم يبقى فيه ألم و خوف عشان تفضل متحفز و مستعد

أي نعم الألم و الخوف من أكبر مسببات التغيير في حياة الإنسان

بس لو اضطريت تمر بيهم (و هيجي يوم و تمر بيهم ، لأن دي سنة الحياة) ، حاول على قد ما تقدر تتعلم منهم



#متنساش


#كلمة عن #التغيير

19/07/2023

عام هجري جديد

يملؤه إن شاء الرحمن الأمل و التفاؤل ، سائلين الله عز و جل أن يكون عاما تتجدد فيه نفوسنا و نزداد قربا للجنة و يزحزحنا الله عن النار

و ما أجمل أن نبدأ العام ببداية جديدة و عقلية جديدة و أهداف جديدة

و كل عام و أنتم بخير



#متنساش


#كلمة عن #جديد

14/07/2023

سرعة الغزال حوالي 90كم في الساعة
سرعة الاسد حوالي 60 كم الساعة

يعني سرعة الأسد تلتين سرعة الغزال تقريبا ، و مع ذلك (بعد كام محاولة) بيعرف يصطاده

يا ترى إزاي ؟
اللي بيحصل كالآتي :
أولا إصرار الأسد بشكل غير عادي
ثانيا الغزال بيبص وراه كتير عشان يطمئن إن الأسد بعيد عنه ، فطبيعي سرعته بتبقى أبطأ

أظن الرسالة وصلت

خليك أسد ، متبقاش غزال

بلاش تبص ورا كتير عشان تتجنب الوقوع



#متنساش


#كلمة عن #الإصرار

14/07/2023

صباح الرضا و البركة و فرحة أهل الجنة

مش هوصيكم نقرأ النهاردة سورة الكهف مع بعض

و يا سلام لو نخلي الدعاء ده على لساننا النهاردة :

ربِّ لا تَذَرْنِي فَرْدًا وَ أَنْتَ خَيْرُ الوَارِثِين

رزقنا الله و إياكم صالح الأعمال و ثوابها

#صباح #الجمعة
#متنساش


#كلمة في #دعاء

12/07/2023

٢٠٠٠ تفاعل خلال الشهر اللي فات 🙏🌷

جزاكم الله خيرا و أدعو الله أن أكون عند حسن ظنكم بي

I've received 2,000 reactions to my posts in the past 30 days. Thanks for your support. 🙏🤗🎉

07/07/2023

كلمة قرأتها زمان بمناسبة الجمعة :
كل إنسان يريدك لنفسه
و رب العالمين يريدك لنفسك

يعني الإنسان هيحبك لطبعك أو شكلك أو قرابتك أو فايدتك أو حتى فلوسك ، يعني طالع منك بفايدة معنوية أو مادية

إنما رب العالمين بيحبك لمجرد إنك من خلقه و صنعه ، بيحبك عشانك انت مش عشانه هو ، هو يعني كان مستفيد منك ايه لما خلقك ؟ و هو القادر في جزء من الثانية يفنيك أو يغنيك

يا مقلب القلوب ثبت قلوبنا على حبك و طاعتك ، و ارزقنا الجنة بلا حساب و لا سابقة عذاب

مش هوصيكم نقرأ النهاردة سورة الكهف مع بعض



#متنساش


#كلمة عن #القلب في يوم #الجمعة

04/07/2023

مفيش حاجة ثابتة في الدنيا

لو عملت تقول ياريتني ما عملت
لو ماعملتش تقول ياريتني عملت

تندم على قرار بعد كده تفرح بيه
تفرح بقرار بعد كده تندم عليه

و هكذا يتقلب الإنسان بين الرضا و عدم الرضا

الخلاصة :
الحاجة الوحيدة اللي تندم عليها صلاتك ، و أي حاجة تانية بعد كده ليها حل

انبسط برحلتك و خليك راضي ، لأن والله لو علمتم الغيب لارتضيتم الواقع

أي نعم الواقع بيكون مؤلم ، أي نعم هنموت و احنا بنتعلم ، بس افتكر إن مش دي الحياة اللي هتستمر معانا

مش مبسوط في حياتك و حاسس إن فيه حاجة ناقصاك ؟ العلاقة اللي إنت فيها دلوقتي مش مريحاك و مش عارف تعمل ايه ؟ طلعت من علاقة مأثرة عليك جدا ؟

كلمني



#متنساش


#كلمة

30/06/2023

أوقات ممكن تلاقي حد مهموم و منهك و بيبقى كل اللي بيدور عليه طبطبة على الكتف أو حضن

غالبا هتلاقيه عارف الصح و اللي مفروض يتعمل ، بس الإرهاق مخليه مش قادر يعمل أي حاجة دلوقتي

لما تلاقي حد في الحالة دي حط في بالك حاجتين :

مش شطارة أبدا إنك تحاول تحفزه و تنشطه ، لأنه مش هيستقبل منك أي كلام

إن النبي عليه الصلاة و السلام قعد يواسي طفل عشان العصفور بتاعه مات ، مقعدش يقول له انشف و خليك راجل و انت عارف إن العصفور بتاعك مش هيرجع

و افتكر : كلنا بشر و كلنا بتمر علينا لحظات ضعف

الله يرزقنا و إياكم الآية "و نزعنا ما في صدورهم من غل"



#متنساش


#كلمة عن #الطبطبة

27/06/2023