05/06/2026
🔥 «Vinicius Jr លេចធ្លោនៅអេស្ប៉ាញ តែហេតុអ្វីអ្នកគាំទ្រប្រេស៊ីលនៅតែមិនទុកចិត្ត?»
🇧🇷 ⭐ ជាតារានៅ Real Madrid ប៉ុន្តែនៅតែត្រូវបង្ហាញខ្លួនឯងជាមួយប្រេស៊ីល – តើ Vinicius Jr អាចឈ្នះចិត្តប្រជាជាតិបានដែរឬទេ?
«មនុស្សជាច្រើននិយាយថា ប្រេស៊ីលពេលនេះមិនមានតារាឆ្នើមដូចមុនទេ។ ប្រហែលជាវាពិតមែន»។ នេះជាការលើកឡើងរបស់គ្រូបង្វឹកជម្រើសជាតិប្រេស៊ីល មុនការប្រកួតមិត្តភាពជាមួយប៉ាណាម៉ា នៅចុងខែឧសភា។
លោកបានបន្តថា៖ «យើងមិនមាន Pele, Romario ឬ Ronaldo ទេ ប៉ុន្តែយើងអាចមានស្មារតីទទួលខុសត្រូវរួមគ្នា ហើយវាអាចជាកម្លាំងដ៏អស្ចារ្យមួយ»។
មនុស្សជាច្រើនធ្លាប់រំពឹងថា Vinicius Junior របស់ Real Madrid នឹងក្លាយជាមេដឹកនាំថ្មីរបស់ក្រុមជម្រើសជាតិប្រេស៊ីលនៅពេលនេះ។ ប៉ុន្តែរយៈពេល 4 ឆ្នាំបន្ទាប់ពីការធ្លាក់ចេញពី World Cup 2022 ក្រោមថ្វីជើងក្រូអាតដោយបាល់ប៉េណាល់ទីក្នុងវគ្គ 8 ក្រុមចុងក្រោយ មន្ទិលសង្ស័យជុំវិញខ្សែប្រយុទ្ធវ័យ 25 ឆ្នាំរូបនេះនៅតែបន្តមាន។
ស្ថានភាពបានឈានដល់កម្រិតមួយដែល បន្ទាប់ពីប្រេស៊ីលចាញ់បារាំង 2-1 កាលពីខែមីនា ការជជែកវែកញែកនៅក្នុងប្រទេសបានផ្តោតលើសំណួរថា៖ «តើ Vinicius នៅសមនឹងជាប់ជម្រើស 11 នាក់ដំបូងដែរឬទេ?»
កម្មវិធីវិភាគបាល់ទាត់ដ៏ល្បីរបស់ប្រេស៊ីល ESPN Linha de Passe ថែមទាំងបានលើកជាសំណួរថា៖ «តើគួរដក Vinicius ចេញពីជម្រើសដំបូងដែរឬទេ?»
ទោះបីជាមានការមកដឹកនាំរបស់ Carlo Ancelotti ដែលជាគ្រូបង្វឹកជោគជ័យបំផុតម្នាក់ និងជាបុគ្គលដែលមានឥទ្ធិពលខ្លាំងលើអាជីពរបស់ Vinicius នៅ Real Madrid ក៏ដោយ សំណួរដែលតាមលងគាត់ជានិច្ចនៅក្រុមជម្រើសជាតិនៅតែមិនបាត់។
សំណួរនោះគឺ៖ «ហេតុអ្វី Vinicius មិនអាចបង្ហាញទម្រង់លេងដូចនៅ Real Madrid នៅពេលលេងឱ្យប្រេស៊ីល?»
ទោះជាយ៉ាងណា Vinicius គឺជាកីឡាករប្រេស៊ីលដែលចូលរួមចំណែកច្រើនជាងគេក្នុងការរកគ្រាប់បាល់ក្នុងវដ្ត World Cup នេះ ដោយស៊ុតបាន 7 គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន 6 លើក ក្នុង 28 ប្រកួត។ ប៉ុន្តែស្ថិតិទាំងនេះនៅតែមិនទាន់អាចបិទមាត់អ្នករិះគន់បានឡើយ។
លោក Cleber Xavier អតីតជំនួយការគ្រូបង្វឹកប្រេស៊ីលក្នុង World Cup ឆ្នាំ 2018 និង 2022 បានប្រាប់ BBC Sport ថា៖
«ការលេងឱ្យបានដូចនៅក្លិបគឺជារឿងពិបាកណាស់។ នៅក្លិប អ្នកមានការហ្វឹកហាត់ជាប្រចាំ របៀបលេងដូចគ្នា មិត្តរួមក្រុមដដែលៗ និងពេលវេលាគ្រប់គ្រាន់សម្រាប់អភិវឌ្ឍការយល់ចិត្តគ្នា។ ប៉ុន្តែនៅក្រុមជម្រើសជាតិ អ្វីៗខុសគ្នាទាំងស្រុង»។
លោកបានលើកឧទាហរណ៍ពី Lionel Messi ផងដែរ៖
«Messi ក៏ធ្លាប់ត្រូវគេសង្ស័យបែបនេះដែរ។ គាត់ត្រូវរងសម្ពាធជាច្រើនឆ្នាំ មុននឹងអាចនាំអាហ្សង់ទីនឈ្នះ World Cup ឆ្នាំ 2022។ មូលហេតុគឺអាហ្សង់ទីនបានកសាងក្រុមមួយដែលមានភាពរឹងមាំ និងមានស្ថិរភាព។»
ចំណែក Vinicius មិនដែលគេចវេះពីការរិះគន់ទាំងនេះឡើយ។
គាត់បានប្រាប់ Caze TV ថា៖
«នៅក្លិប រៀងរាល់ 3 ថ្ងៃម្តង យើងមានឱកាសថ្មី។ បើខ្ញុំលេងមិនល្អ 2 ប្រកួតក្នុងចំណោម 10 ប្រកួត មនុស្សក៏មិននិយាយច្រើនដែរ។»
«ប៉ុន្តែនៅក្រុមជម្រើសជាតិ ចន្លោះពេលរវាងការប្រកួតមួយទៅការប្រកួតមួយវែងណាស់។ សម្ពាធតែងតែខ្ពស់ ហើយមនុស្សគ្រប់គ្នារំពឹងឱ្យខ្ញុំបង្ហាញទម្រង់លេងល្អបំផុតជានិច្ច»។
Vinicius បន្ថែមថា៖
«បើខ្ញុំទៅ World Cup ស៊ុតបាន 4 ឬ 5 គ្រាប់ ហើយនាំប្រេស៊ីលឈ្នះជើងឯក រឿងរ៉ាវទាំងអស់នឹងផ្លាស់ប្តូរ។ ពេលនោះ មនុស្សនឹងនិយាយថា ខ្ញុំបានត្រៀមខ្លួនសម្រាប់ World Cup មកជាយូរហើយ សូម្បីតែក្នុងប្រកួតដែលខ្ញុំលេងមិនសូវល្អក៏ដោយ»។
