31/05/2026
مهو يا اما انتو فاهمين مطالب الجماهير ومستخفّين فيها وبتتعاملوا معها كإنها مش موجودة ! وهاي مصيبة..
او انكم مش فاهمين مطالب الجمهور، وهون المصيبة أعظم!!
يعني انتو من كل عقلكم قاعدين بتستنوا رجل أعمال ييجي يدعم النادي عشان تهربوا من هدير الجماهير؟
ولا عنجد مفكرين اذا اجا رجل اعمال يدعم النادي وانتو موجودين هيك الجمهور بكون راضي؟ لو ييجي ألف رجل اعمال وانتو موجودين ما بدنا ياهم..
هو في مستثمر أو رجل أعمال بمنطق سليم بيجي يدعم النادي بوجود إدارة مثلكم؟
هو في رجل أعمال عاقل مستعد يدعم النادي مشان يوفر رواتب لاعبين بهيك مستوى؟
هو في رجل أعمال وبمخه شوية منطق بدعم النادي مشان يجدد مع لاعبين ما حدا قبلان فيهم غيرنا؟
بدل ما تتحملوا مسؤولية قراراتكم، حملتوا النادي فاتورة أخطائكم. بعتوا أفضل اللاعبين اللي الجماهير تعبت عليهم سنين وسنين، وبدل ما النادي يستفيد منهم، راحوا ببلاش مقابل ترقيع أخطاء إدارية ما إلها أول ولا آخر.
واليوم بتحكوا عن "أبواب مفتوحة لرجال الأعمال"!
يا سادة، المشكلة مش بالأبواب... المشكلة باللي واقفين عليها.
افهموا الرسالة للمرة الألف:
الجماهير ما بدها داعم، الجماهير بدها إدارة تعرف شو بتعمل. الجماهير ما بدها وعود جديدة، الجماهير بدها وجوه جديدة. الجماهير زهقت من التبريرات، وملّت من القرارات اللي أي واحد عنده ذرة خوف على النادي ما كان أخذها من الأساس.
القصة أبسط مما بتحاولوا تصوروها... الجماهير ما بدها حلول التفافية، الجماهير بدها رحيلكم فقط
