21/08/2025
Biddanoa Monteleone: “Dal mare alla montagna 2025”, editzione sa de XXIII.
In Biddanoa Monteleone, sàpadu 23 de austu de su 2025, b’at a èssere s’editzione sa de XXIII de s’eventu isportivu famadu “Dal mare alla montagna”, organizadu dae s’assòtziu A.S.D. Sos Iddanoesos.
S’A.S.D. Sos Iddanoesos est un’assòtziu isportivu nàschidu in su 2014 dae un’idea de unu grupu de amigos de Biddanoa, dae inoghe naschet su nùmene Sos Iddanoesos, chi aiant sa matessi passione pro sa disciplina isportiva de sa cursa. Totu naschet, in prus chi dae sa passione, dae sa netzessidade de apartènnere a un’assòtziu isportivu registradu a manera regulare pro pòdere partetzipare a sas garas ufitziales. Gasi, a poi de àere fatu su diretivu e totu sas pràticas netzessàrias s’A.S.D. Sos Iddanoesos est divènnidu assòtziu autònomu, lìberu, de ogni manera, e prus a totu, sena iscopu de lucru, e at dadu comintzu a totu…
In printzìpios sos sòtzios fundadores fiant pagos, ma orgogliosos de partetzipare a sas diversas garas ufitziales organizadas in sas biddas de a curtzu, mustrende sas màglias cun s’istemma ufitziale de sa sotziedade. Non colat tempus meda, puru gràtzias a s’ispiritu de sa sotziedade, chi medas atletas detzidint de si iscrìere cun Sos Iddanoesos, siat mascros che fèminas, pro su prus biddanoesos o originàrios de Biddanoa Monteleone e, essende amantiosos e apassionados cun sa passione de cùrrere pro si mantènnere in grande forma fìsica, pràticant cust’isport ca est sanu, leale e permitit de incontrare atletas de diversos grupos sòtziu-culturales regionales, natzionales e internatzionales. Custos atletas partètzipant a sas manifestatziones siat a livellu provintziale, chi regionale e natzionale, gasi comente puru a unas cantas garas internatzionales, tra sas prus famadas e prestigiosas, cunsighende resurtados de importu in sas mègius positziones de sa classìfica. Dae su 2016 s’A.S.D. Sos Iddanoesos at comintzadu s’aventura in calidade de sotziedade organizadora de una de sas garas prus dèchidas, ammajadoras, prus panoràmicas, ma prus a totu prus difitziles, de su panorama isportivu isulanu: “Dal mare alla montagna”, ocannu lòmpida a s’editzione sua sa de XXIII. Bi partètzipant medas atletas de importu mannu chi benint dae ogni parte e logu de Sardigna e puru dae foras de s’ìsula, gara chi previdit sa partèntzia, a ora de sas ses de sero, dae su Km 8 de sa litorànea S’Alighera-Bosa, a manera prus pretzisa, dae s’ispiàgia de Pòddine, chi est in territòriu de Biddanoa e s’arrivu a Biddanoa, in Piata Monsignor Idda (Piata ‘e Creja). Su percursu, longu 18 Km e chi sunt agiomai totus in pigada e cun una pendèntzia de prus de 800 mt, atraessat parte de sa marina biddanoesa caraterizada dae sa foresta de mata, pro sighire in buscos de èlighes e suerzos sestados dae su maestrale, finas a lòmpere a su tzentru abitadu de Biddanoa. Unu percursu matanosu chi podent afrontare ebbia atletas allenados e cun su caràtere forte, ma ogni isfortzu e ogni butiu de suore benint ricumpensados a sos atletas giai dae sos primos metros de s’intrada in sa bidda, cando, a poi de cussas pigadas munzosas e chi non finint mai, belleg*i comintzat sa calada, cussa chi giughet a s’arrivu, in ue ogni atleta benit acoltu dae sa cuntentesa e dae su tai tai de sa zente chi incoràgiat dae su primu a s’ùrtimu sos partetziapantes a sa gara, acumpagnende.los cun su tifu issoro finas a s’arrivu. Finida sa gara sos atletas, istracos mortos, promitint chi no ant a fàghere mai prus una gara g*i de cussu tipu, ma Sos Iddanoesos sunt seguros chi s’annu imbeniente totus ant a èssere torra presentes a sa partèntzia, ca “Dal mare alla montagna” est una gara de torrare a fàghere semper, cun s’ ispera manna de totu sos partetzipantes chi bi siat unu pagu de friscura pro la pòdere afrontare mezus…. A poi in Piata Monsignor Idda b’at a èssere sa premiatzione de sos atletas e a sighire totus in Piata Piero Arru (Su marcadu betzu) pro acabare sa serada cun sos piseddos de sa Consulta Giovanile de Biddanoa Monteleone, prontos a dare paninos imbutidos cun sartitza arrustu, patata frissa e cantu àteru, bìbitas e, a poi, divertimentu fintzas a tardu cun sa mùsica de sos dj biddanoesos. Augùrios mannos a totu sos atletas e, a manera particulare, a s’Assòtziu Sos Iddanoesos ca ogni annu, cun impignu mannu, organizant custa bella manifestatzione, chi est divènnida semper de prus importante riferimentu in su panorama isportivu sardu. Àteros annos mezus!!!
Atividade contivigiada dae Maria Leonarda Correddu, operadora de s’isportellu linguìsticu de Biddanoa Monteleone.
Atividade realizada cun su contributu de sa L. 482/99 e L.R. 22/18.
Istituto di Studi e Ricerche Camillo Bellieni, Comune di Villanova Monteleone | SS (pagina istituzionale), Sos Iddanoesos, Giovanile di Villanova Monteleone, Giovannina, Nando Sabiu, Comune di Putifigari
