11/04/2026
من شوية لقيت المدام عمالة تصحي فيا على آخرها عشان أرد على التليفون.. فسألتها الساعة كام دلوقتي؟
قالتلي لسه النهار مطلعش!
فقلت لها ومين الغتت إبن الغتت اللي ممكن يرن في وقت زي ده؟!
قالتلي رقم غريب، بس رن أكتر من عشرين مرة!
فقلت لها هتلاقيه عيل تافه من العيال اللي بيفضلوا يرنوا على أرقام عشوائية لعل وعسى ترد عليهم واحدة، ويا ويله وسواد ليه مني واللّٰهِ، وفتحت المكالمة ولسه هشتم..!
لقيت صوت أعرفه بيقولي صباح الخير يا حبيب قلبي، أنا أسف إني صحيتك في وقت زي ده، ولكن الموضوع اللي محتاجك فيه ميتحمِّلش تأخير!
قلت له صباح الورد، مين.. عشان الرقم مش متسجل عندي واللّٰهِ..
قالي فُلان الفُلاني .
فقلت له حبيب قلبي، معلش واللّٰهِ ممعيش غير رقمك القديم، خير؟
قالي خير إن شاء اللّٰه، والدتي تعبت شوية إمبارح ولما أخدناها على المستشفى، الدكاترة قالوا إن لازمها عملية، وأخوك الدُّنيا ضيقة معاه اليومين دول، فمحتاج منك مبلغ سلف لحد ما أقبض الجمعية الشهر اللي بعد الجاي!
قلت له ألف سلامة عليها، ولكن إنت فاجئتني بصراحة عشان واللّٰهِ ما معايا كاش في البيت حاليًا..
قالي مفيش مشكلة، إن شاء اللّٰه ربنا هيحلها من عنده، وأسف مرة تانية إني صحيتك في وقت زي ده، وبمجرد ما قفل معايا سألتني مين ده؟
قلت لها فلان الفُلاني..
قالتلي وعاوز إيه؟
قلت لها عاوز مبلغ سلف، بس أنا قلت له ممعيش طبعًا عشان عمره ما بيرن عليا غير لما يكون عاوز مني حاجة!
فبصتلي بزعل كده وقالتلي وإيه يعني، ما الناس للناس وده أمر عادي!
قلت لها عادي بالنسبالك إنتي، أما بالنسبالي أنا مبحبش أجتمع بالأشخاص اللي مبتفتكرنيش إلَّا وقت المصلحة!
فإبتسمت وقالتلي إبن عباس رضي اللّٰه عنه قال: أربعة لا أقدر على مكافأتهم.. رجل بدأني بالسلام، ورجل وسع لي في المجلس، ورجل أغبرت قدماه في المشي في حاجتي، فأما الرابع فما يُكافئه عني إلَّا اللّٰه عز وجل وهو رجل نزل به أمرًا فبات ليلته يفكر فيمن يقصد ثم رآني أهلاً لحاجته فأنزلها بي.
فرن عليه بسرعة قوله لقيت مع مراتي فلوس عشان ترفع عن نفسك الحرج، واديله اللي هو عاوزه.. وعند ربنا كُلُّه وربنا خزاينه مليانة واللي عنده لا ينفذ..
قولتلها ونعم باللّٰه العلي العظيم، حاضر يا ستى، ورنيت عليه قلت له زي ما قالتلي بالظبط..
فرد عليا بصوت مخنوق قالي واللّٰهِ بمجرد ما قفلت معاك حسيت إن الدُّنيا إسودت في وشي وإنتهت كل الحلول، فرفعت إيدي في السما وفضلت أردد ربي إني مسني الضر وأنت أرحم الراحمين لحد ما لقيتك بترن تاني، فعرفت إنُّه إستجاب من قبل حتَّى ما أفتح عليك!!
"اللهم يا جامع الناس ليوم لا ريب فيه، اجمع كل قلب بمن يحب في حلالك، واجعل بيوتنا مليانة بالستر والمودة.. يا رب هب لنا من أزواجنا وذرياتنا قرة أعين واجعلنا للمتقين إماماً."
"صَلوا على مَن تُقضى بذكره الحوائج.. وقولوا آمين."
لعلها ساعة استجابة.
واللهم اجعلنا سبب لتوصيل رزق لمهموم أو مديون أو فى كرب و ضيق قولوا امين
#منقوله
