29/05/2026
معلومة مجانيه مهمة بهالوقت وكل عام وانتم بخير وأمان
يا جماعة الخير.. ليش نشر صور العيد على السوشيال ميديا فيه مخاطر تقنية؟
مع أجواء العيد، الكل بحب ينشر صوره على الفيسبوك، إنستغرام، وسناب شات. بس من زاوية أمن معلومات (الأمن السيبراني)، هاي الصور مش مجرد "لقطات فايعة"، هي عبارة عن مخزن بيانات مفتوح (OSINT) ممكن الهاكرز وجماعة الهندسة الاجتماعية يستغلوها بطرق علمية وتقنية بحتة:
1. كشف موقعك وسيرتك (EXIF Data)
أي صورة بتلقطها بكاميرا الموبايل، بيتخزن جواتها تلقائياً ملف بيانات مخفي اسمه (EXIF). هذا الملف بكون فيه إحداثيات موقعك الجغرافي الدقيق (GPS) بالملي، وساعة التصوير بالثانية، ونوع جهازك. الهاكر بسحب هاي البيانات وبعرف وين إنت وين بتروح وبتيجي.
2. التزييف العميق (Deepfakes)
لما تنشري كذا صورة وبزوايا مختلفة وجودة عالية، إنتِ فعلياً بتعطي خوارزميات الذكاء الاصطناعي (GANs) "مادة دسمة" وجاهزة. الهاكرز بياخذوا هاي الصور وبتدربوا عليها لتركيب فيديوهات وصور مفبركة بالكامل بتشبهك مية بالمية، وبستغلوها بعدين بـ الابتزاز الإلكتروني.
3. الهندسة الاجتماعية (Social Engineering)
تفاصيل الخلفية بالصورة (مكان المطعم، نوع السيارت، الماركات، الناس اللي معك) كلها بتتحلل تقنياً عشان الهاكر يبني "ملف سلوكي" عنك وعن حياتك. من ورا هاي التفاصيل بقدر يصمم هجمة تصيد مُوجّه (Spear Phishing) أو حتى يحزر أجوبة أسئلة الأمان لحساباتك وبنوكك.
4. سرقة البصمات الحيوية
الصور الجديدة اللي دقتها عالية وتفاصيل الوجه فيها واضحة، أو لما تصوري وإنتِ عاملة حركة بإيدك ومبينة بصمات أصابعك، هاي بتصير هدف لسرقة الخصائص البيومترية ومحاولة اختراق أنظمة التحقق الذكية والتطبيقات.
طيب.. كيف نحمي حالنا تقنياً؟
اطفي الـ GPS من إعدادات الكاميرا قبل ما تصوري.
خذي (Screenshot) للصورة وانشري اللقطة مش الصورة الأصلية، لأن لقطة الشاشة بتحذف كل البيانات المخفية (Metadata) تلقائياً.
خلي حسابك خاص (Private) وبلاش سالفة النشر للعامة (Public) بهي الفترة بالذات.
بلاش الصور اللي دقتها خارقة (Ultra-HD) عشان تصعّبي الشغل على خوارزميات الذكاء الاصطناعي وما تطلع تفاصيل وجهك بدقة مبالغ فيها.
وكل عام وانتم بأمان
