06/09/2026
【當身體叫停嘅時候：一個職業飛鏢手嘅心聲】
呢幾天因為身體搞唔掂入咗醫院。訓喺病床上睇住天花板，身邊突然冇咗比賽場地嗰種喧鬧同燈光，我先有時間真正靜落嚟，諗返自己呢兩三年到底係點過嘅。
呢幾年，我嘅生活基本上得返飛鏢同機場。只要有比賽，無論行程排得幾緊、時差幾咁亂，我完全唔敢放過任何一個機會，飛完一站又一站。身邊嘅人可能會覺得職業選手好爽，可以去唔同國家比賽兼環遊世界；但事實上，更多嘅時間係一個人拎住行李喺凌晨嘅機場等待，或者喺鋪頭對住鏢靶不停重複練習。
比賽嗰幾十分鐘，大家睇到嘅係精準、冷靜同完美嘅落點；但背後支撐住呢一切嘅，係長期高壓下嘅焦慮、慢性勞損，仲有每一次驚輸、驚辜負大家期望嘅心理負荷。為了keep住狀態，我一直話畀自己聽「要堅持、要捱住」，結果一直忽略咗身體發出嘅警告。直到今次身體徹底撐唔住、要訓喺醫院，我先醒悟：原來我一直教自己點樣贏，卻忘記咗教自己點樣休息。
【職業運動員】呢個身份，帶畀我好多榮耀，但同時亦好殘酷。我哋習慣咗硬撐，因為害怕一停落嚟就會被淘汰、會被遺忘。但今次呢個警號教識我，要走得更遠，就必須學識尊重自己嘅身體。停一停，唔係代表放棄，而係為了下一鏢可以握得更穩。
好想多謝呢段時間關心我嘅屋企人、團隊、贊助商，同埋每一位一直留意住我表現嘅朋友。你哋嘅留言同支持，喺呢個孤獨嘅時刻對我嚟講真係好重要。
我會好好配合治療同休養，等身體重回正軌。希望大家繼續支持我，亦可以畀多啲理解同體諒所有喺賽場上拼搏嘅職業運動員。背後嗰種辛苦同代價，真係唔容易。
等我好好養精蓄銳，賽場上見！
The Challenger
HUGO LEUNG 梁文洛
