23/05/2026
【那一晚我對我的訓練0尊】
前幾日練跑，教練開咗一課 200m on & off 嘅間歇。根據我之前嘅 VDOT 數據計算，我當日應該要用 3K effort（大約 43秒/200m）去跑。
不過，可能係近期多咗做肌力訓練，加上當日體感真係好好，一衝出去雙腿就好似停唔到咁。結果？第一隻就超晒速，跑出38秒，之後幾隻雖然已經收慢，仍跑出40秒附近。
我初時心裡沾沾自喜，覺得自己狀態大勇。但靜落嚟後，我就知道自己其實係練錯咗方向。
雖然之前我已經一早懂得了「輕鬆跑不要超速」嘅道理，知道 Easy run 跑太快會練唔到有氧基礎。但估唔到，原來連速度訓練，喺速度上都要重新學習點樣去克制。
好多人都以為，練習長跑只要比原定目標更肯衝、跑得更快，效果就一定更好。
教練開 3K effort 畀我，生理上嘅目的係要我同時開動有氧同無氧系統，去刺激最大攝氧量（VO2 max），並且訓練身體喺 on 同 off 之間中和乳酸嘅能力。
但我一貪快衝過頭，個身體就會自動切換去純無氧系統。雖然 200 米好短我都頂得完，但原本想練嘅有氧系統，監生畀我自己嘅衝動破壞晒。
丹尼爾博士講過一句話：訓練是要尋求用最小、最精準的刺激，去獲得最大的生理效益。任何多出來的強度，都是沒有回報的無謂消耗。
快，的確好爽。但喺長跑嘅世界入面，「克制」往往比「激進」需要更大嘅勇氣。不論是慢跑抑或快跑，收放自如，先至係最深嘅學問。
如果每一課科學化嘅課表背後，都有它專屬嘅生理任務，咁盲目貪快，其實不單止不是進取，本質上根本就係對數據、對科學、同對自己嘅訓練「0尊」。
你哋又有無試過體感太好，唔小心將輕鬆跑跑咗做賽速，或者間歇跑衝爆咗？歡迎一齊交流下你哋嘅「超速」故事。
