15/06/2026
Sutton HKers｜全英港人籃球聯賽季後賽戰報🏀
上個星期日，Sutton HKers 首次踏上全英香港人籃球聯賽季後賽嘅舞台，為最高級別盃賽嘅冠軍殊榮而戰！
一班熱血波友晨早就出發，捱足近三個鐘頭車程遠征諾定咸，對陣北區榜首勁旅 Warrington HKers，大家都知道係一場硬仗。
比賽開局雙方都打得審慎，防守強度極高。或許係季後賽初體驗，隊員明顯有少少緊張，外圍投射頻頻打鐵，半場就已經以 17:27 落後。
下半場情況雪上加霜！對手嘅緊迫防守令我哋寸步難行，第三節竟然只得 5 分進帳，創下近年新低😓。幸好第四節我哋作出戰術調整，射手手感逐漸回暖，一度將分差追近至個位數，睇落有啲希望……可惜最終仍以 43:56 飲恨落敗。
下一關，我哋將會同老對手 Watford Elites 爭奪季後賽第三名，敬請期待！
賽後，一班香港人喺異鄉影低咗呢張大合照🇭🇰，身在英國，依然可以繼續追逐我哋嘅籃球夢，真係好難得。
想一齊打波？歡迎隨時搵我哋！我哋逢星期二晚都有練習，正為下一季聯賽積極備戰，隨時歡迎新隊員加入🏀
#我想打籃球🏀 #英國香港人籃球聯賽
