04/04/2025
بعد ما خلّصنا أجازة العيد وكل واحد فينا رفع كحك وبسكوت على كيفه، وكلنا حسينا بالكسل اللي بيجي بعد الأكل التقيل زي الكحك والبيتي فور والرنجة والفسيخ وغيرها، لازم نرجّع نشاطنا ونخلّص جسمنا من الدهون اللي اتجمعت في اليومين دول. هقولكم على كام حاجة بسيطة في التغذية نعملها بأسلوبنا، عشان نرجع زي الأول وأحسن.
أول حاجة، لازم نرجع ننظم أكلنا بعد اللخبطة بتاعة العيد. يعني لو كنت بتاكل كحكة ورا كحكة ومبطلتش غير لما الطبق يخلص، حاول تركز على أكل خفيف ومفيد. ابدأ يومك بفطار كويس، زي طبق فول مدمس بزيت الزيتون مع عيش بلدي، أو شوية جبنة قريش مع طماطم وخيار. الفكرة إنك تاخد بروتين وخضار يسدّوا جوعك ويدوك طاقة من غير ما يزودوا دهون.
تاني حاجة، اشرب مية كتير قوي. العيد كان مليان شاي وسكر زيادة مع الكحك، وده ممكن يكون عطش جسمك من جواه. خد كوبايتين مية أول ما تصحى، وكل ساعتين كده اشرب كوباية. المية هتساعدك تنضف جسمك وترجّع نشاطك.
تالت حاجة، حاول تتحرك شوية. مش لازم تروح جيم وترفع حديد من أول يوم، بس امشي نص ساعة في الشارع، ولو عندك سلم في البيت اطلعه وانزله كام مرة. المهم تبطّل الكسل وتخلّي جسمك يحرق الدهون اللي اتراكمت من كتر الأكل.
رابع حاجة، ركّز على الأكل الصحي اللي يملّي عينك ومعدتك من غير ما يكتر دهون. مثلاً، بدل ما تاكل نص كيلو كحك كل يوم، جرب تعمل طبق سلطة خضرا بزيت الزيتون والليمون، أو طبق شوربة خضار دافية لو الجو لسه فيه برد. لو جعت بالليل، بدل ما تروح لعلبة البسكويت، كل شويه مكسرات نية أو ثمرة فاكهه .وآخر حاجة، خد وقتك في الرجوع لروتينك. مش هينفع في يومين تنزل كل الدهون اللي اكلتها في العيد، بس لو بدأت تخفف سكر، تشرب مية، وتتحرك شوية، هتحس إن جسمك بيرجع لنشاطه والكسل بيروح.
اهتم تحافظ على فيتامينات اللي جسمك محتاجها الزنك والماغنسيوم لو كنت بتستخدم مكملات غذائية وهترجع تتمرن ارجع ظبط جرعاتك تاني من بكره
العيد حلو وأكله حلو، بس لازم نرجع نراعي نفسنا بعده. جسمك مش هيزعل منك لو خففت الأكل التقيل واديته حاجة خفيفة ومفيدة. جرّب الكلام ده وهتشوف الفرق في أسبوع!
