14/04/2022
كل سنة و انتم طيبين و رمضان كريم 🌙❤
اتمرن ازاي ف رمضان؟
شدة التمرين تبقى ازاي ومدة التمرين تبقى قد اي؟
اي افضل انواع التمارين و هل ينفع اتمرن بنظام push pull leg ؟
طيب ارتاح كام يوم ف الاسبوع؟
اسئلة كتير بتدور ف دماغ كل الرياضيين عن التمرين ف رمضان و دة بيدخلهم ف حيرة و مابيبقوش عارفين يعملو اي لدرجة منهم ال بيوقف تمرين خالص خلال شهر رمضان و دة مش صحيح
تعالو مع بعض نجاوب على كل الاسئلة دي
1️⃣اتمرن ازاي ف رمضان؟
التمرين ف رمضان بيكون فيه صعوبة لان انت بتبقى خارج م فترة صيام اكتر م ١٤ ساعة فبتكون مخازن الجليكوجين ف اقل مستوياتها فبالتالي مابيبقاش في طاقة للتمرين فيستحسن تتمرن بعد القطار م ساعة لساعتين بحيث تكون اخدت وجبة او اتنين و مليت مخازن الجليكوجين و يبقى عندك طاقة تتمرن
2️⃣اتمرن بشدة قد اي و مدة التمرين تكون قد اي؟
سبق و قولنا ان طاقتك ف رمضان بتكون منخفضة فبالتالي هقلل شدة التمرين بحيث اني اتمرن بشدة متوسطة م ٦٠ ل٨٠ %
ولمدة لا تتجاوز ال ٤٥ دقيقة
3️⃣اي افضل نوع تمرين ف رمضان و هل ينفع اتمرن بنظام ال push pull legs ؟
مفيش نظام تمرين مخصوص لرمضان و تقدر تتمرن بالنظام ال ينسابك وال انت حابه على حسب هدفك م التمرين و عدد الايام ال بتتمرن فيها خلال الاسبوع
فلو انت مثلا بتروح الجيم م ٥ ل ٦ ايام ف الاسبوع فيستحسن تمرن كل يوم عضلة بحيث انك تدي كل عضلة وقت كافي للراحة لان عملية الريكوفري ف رمضان بتكون بطيئة بسبب ضغف التغذية و قلة النوم
اما لو بتتمرن ٣ ايام بس ف الاسبوع فيفضل انك تتمرن بنظام ال push pull leg بحيث انك تمرن عضلات جسمك كلها خلال الاسبوع
●لكن التمرين في الحالتين بيكون باوزان متوسطة و بشدة اقل
4️⃣ارتاح كام يوم ف الاسبوع؟
الراحة بتختلف م شخص للتاني على حسب هدفه م التمرين و ع حسب برضو قابلية جسمه للاستشفاء وسرعة عملية الريكوفري عنده
فلو انت عامل كتلة عضلية و عايز تحافظ ع عضلاتك يستحسن انك تريح يوم او يومين ف الاسبوع
اما لو عملية الريكوفري بطيئة يستحسن تريح ٣ ايام ف الاسبوع بحيث انك ماتحطش العضلة تحت ضغط كبير خصوصا ان طاقتك ف اقل مستوياتها
و بكدا نكون جاوبنا على اكتر الاسئلة ال بتدور ف دماغك عن التمرين ف رمضان
و كل سنة و انتم طيبين🌙❤
