10/03/2026
اتمرن جامد اوي … وكل كويس بس والله العظيم مش عايز منك غير كدا
و علشان تقفل اليوم بميدالية ذهبية، لازم تنام نوم عميق وهادي من غير مقاطعة.
عملتلكم الصورة دي بتوضح بشكل بسيط إزاي جسمك بيبني العضلات.
لما بتتمرن، أنت فعليًا بتكسر ألياف العضلات وبتعمل فيها تمزقات صغيرة.
أول ما تدخل في نوم عميق، جسمك بيبدأ يصلّح اللي اتكسر.
ركز معايا يا صديقي بالله عليك لأني كدا كدا عارف المعلومات دي وعايزك انت تعرفها ❤️
تخيل معايا بكل سهوله يا صديقي إن في عمال شغالين في ورشة إصلاح.
العمال دول محتاجين مواد بناء زي الطوب والأسمنت علشان يصلحوا ويبنوا من جديد.
المواد دي هي الأكل اللي بتاكله، خصوصًا البروتين اللي بيتحول جوه جسمك لأحماض أمينية.
العملية دي اسمها بناء البروتين العضلي.
لكن لو أنت ماكلتش كويس، العمال دول مش هيلاقوا مواد بناء.
ساعتها هيضطروا يهدموا جزء من جسمك علشان يبنوا بيه جزء تاني.
وده اللي بنسميه الهدم العضلي أو الـ Catabolism.
وفي المشروع ده كله، في مهندس كبير هو اللي بيدير الشغل.
المهندس ده اسمه هرمون النمو الي كله مركز عليه يا صديقي الجميل
الهرمون ده بيتفرز لما تدخل في النوم العميق، خصوصًا في مرحلة الـ REM.
كأن المهندس ضرب صفارة وقال للعمال:
“يلا يا رجالة… صاحب البيت نام، نبدأ نصلح ونبني .”
والله بنفس اللفظ كدا ومفيش حاجه بتحصل غير كدا
من غير الإشارة دي، العمال هيبقوا قاعدين من غير شغل.
ولو هرمون النمو قليل، عملية الإصلاح هتبقى بطيئة جدًا،
وساعتها هتصحى تاني يوم ولسه جسمك ما اتعافاش كويس للتمرين.
مش بس العضلات…
هرمون النمو كمان بيقوي الأوتار والأربطة،
كأنه بيعمل صيانة للمعدات والرافعات علشان تقدر تشيل أوزان تقيلة الأسبوع اللي بعده.
وفي الآخر خلّيها في دماغك يا صديقي والله وببساطة:
التمرين
هو المخطط اللي بيقول للجسم يبني إيه.
النوم
هو وقت شغل العمال.
الأكل
هو العربيه او المواصله اللي بتوصل مواد البناء…
البروتين والطاقة.♥️💪
