08/01/2025
كفايه بجد ❌
« احنا شركه تدريب فندقي ورفع كفاءة العاملين بالقطاع السياحي والفندقي................
، الكام ملحوظه دول لاي حد عايز يأسس مطعم ، عشان نصحح مفهوم بعد الإشاعات ، عشان فعلا بقت حديقه حيوان مش سوق خالص عشان أحنا بنعاني بجد »
١. حضرتك كصاحب مطعم أول مطعم ليك « اول ٦ شهور إلي ١ سنه ، إنسي تكسب من المطعم » عشان تقلل الوقت اللي نوصل لنقطه التعادل بين مكسبك ومصروفاتك ، ارجوك مفيش حاجه اسمها في خلال ٣ شهور اكسب ومفيش حاجه اسمها من اول يوم ربنا حيكرمنا ، ارجوك مش عشان يوم الافتتاح عملت عرض ٥٠٪ وجالك كام ألف يبقي ده شغل المطاعم الحقيقي وانك ابن حظ والزهر حيلعب معاك ( الكلام ده خرافه )
٢. مفيش حاجه اسمها افتح فرع جديد بعد ٦ شهور وانت اصلا موصلتش لنقطه التعادل بتاعه المطعم الاولاني ، وتقولي اصل بلبن كل شويه يفتح فرع عايز ابقي زيه ، و عايز يبقي عندي الصيت و الغني ، ارجوك المعدل الطبيعي انك تفتح فرع تاني لو فاست فود لا يقل عن ١ سنه إلي سنتين ، لو مطعم كاچوال فأنت لا يقل عن ٣ سنين ، أفهم ارجوك ، بلبن نظام وخطه موضوعه عشان الصيت ولا الغني ولما يجي الصيت حيجيب الغني وسياسته محطوطاها ميزانيه تعدي الملايين وحضرتك فااااااتح مطعم ب ٥٠٠ الف جنيه اصلا ( خرافه )
٣. أرجوك ، مفيش حاجه اسمها توقف تسويق ، مفيش حاجه اسمها اول شهرين بس كده الناس تعرفني وحشتغل ، حضرتك مش بتبيع ماء زمزم عشان الناس تعرفك وحتشتغل بعد كده ، انت مطعم ، محتاج تقري للناس وتخليك اول واحد يجي في ذاكرتهم ، لازم تسويق مدي الحياه لغايه اخر يوم بتقفل فيه المطعم ، وانسي بقي فكره اعمل تسويق ب الفين جنيه ولا ٥ ، التسويق الصح كل شهر بيزيد عن اللي قبله ، في مطاعم بتدفع من ٥٠ الف ل ٤٠٠ و ٥٠٠ الف شهريا ، التسويق زي ابنك اللي بتربيه كل ما تستثمر في دماغه وتعليمه كلما كان حيعوك عليك بالنفع .
٤. ارجوك ، انت صاحب مطعم ، مش مدير يعني ولا شيف حتي ، عين مدير للمطعم انت شخص مستثمر فقط فلوسك ، حضرتك لازم يكون في وسيط بينك وبين الأصطف ياخد منك ويقلب الكلام في دماغه ويوصل المعلومه للأصطف ، لو ورقه منديل وقعه علي الارض انت صاحب مكان بتشوفها " نصف جنيه واقع " ، إنما اللي شغال حيدوس عليها بحزمته وبقولك " فدايا ".
٥. ملكش دعوه بالاصطف أي ملحوظه مش عجبتك قولها للمدير وهو حيتعامل ملكش الحق تعدي دور المدير دول رجلاته هو مش انت .
٦. ابعد زوقك الشخصي عن الزوق العام ، مش عشان حضرتك بتحب طبق معين بطريقه غير الطبيعي يبقي الناس تأكلها بمزاجك حضرتك مش " مراد مكرم"
٧. المؤسسه الناجحه بتبقي تدريجيه في كل شيء ، وزي العائله ليها رب أسره وزوجه و أولاد ، هات مدير قوي واظيله مرتب يستحقه وهات زوجه ( مساعد مدير وياريت يكون لسه بيتعلم) اديله مرتب متوسط مع ترقيه في حين إثبات كفائه ، هات شيفات وموظفين بمرتبات متوسطه ورقيهم .
٨. متفتكرش الشيفات و الصنائع و المديرين و الموظفين بيدورا علي المرتب العالي ، طول ما اللي شغال اللي معاك بيدور علي فلوس يبقي العيب منك
انت كصاحب شغل موفر للموظف انك صاحبه وجدع وفي ظهره وتديله مرتب متوسط وتأمين و عمولات وحوافز وترقيه ، حصله ظرف تقف معاه ، وقت الدراسه تراعي عياله بفلوس زياده ، في العيد عيديه ، في رمضان شنطه محترمه ،ومل عيد تحسسه انك شايفه وموجود قسم مرتبه
بياخد ١٠ الاف ، اديله مرتب ٦ الاف و ٢ الف تارجت و ٢ الف متوزعين ( عيديه ولحمه ورمضان ورأس سنه ومولد نبوي ) احسن بكتير لما تديله ----» مرتب كامل ومش حيرضيه .
٩. أكرم رجالتك ارجوك ، رأس مالك رجالتك .
١٠. ادي البرستيچ لمدير الفرع والمساعدين و المشرفين والشيفات كل واحد قدام المساعد بتاعه ، حيقدرك .
١١. ارجوك اشتغل مع محاسب تكاليف كل شهر يجيلك لمخزنك المنيو ويراقب التكاليف ، الفين جنيه لك شهر يحافظوا علي مالك
١٢. هات مدير مشتريات قوي ومتسترخصش ، يكون معاه علاقات و بيعرف يتفاوض ولف محافظات كتير و يعرف يجيب الفسيخ و يجيب الشربات .
١٣. حضرتك ارجوك اتعامل مع محامي قانوني يساعدك في أي مشكله متتعاملش بدماغك.
١٤. اوعي تأخر المرتب عن اليوم بتاعه ، الله اعلم بظروف الناس ، لول اتاخر يوم مهديه اعتزار ادي اليوم الزياده بيومين للموظفين .
١٥. خليك فاهم سوق المنافسه مختلف :
• لو في منطقه شعبي يبقي تنافس في السعر و خدمه عملاء كويسه .
•لو في منطقه متوسطه يبقي تنافس علي الطعم و السعر .
•لو في منطقه راقيه تنافس علي الجوده و خدمه عملاء كويسه .
•لو يتنافس بين شركات نافس علي الاستمرارية وثبات الجوده .
•لو يتنافس علي تقديم وحبات لعمال الشركات تميز في السعر و الكميه و الجاهزيه لتحضير الوجبات .
•لو السوق بتاع سنه صغير يبقي تنافس علي الطعم و المشاعر ، الاطفال بيحبوا الطعم و اللي بيحبهم في المكان .
•لو السوق بتاعك مدارس يبقي تميز في السعر .
•لو السوق مدارس انترناشيونال يبقي التميز في الشكل و الجوده .
•لو السوق بتاع لكبار السن تميز في سهوله الاستخدام و البيع و السعر القليل .
•لو السوق بتاعك معظمه ستات بيوت تميز في الشكل و الطعم الكويس .
•لو كلاود كيتشن تميز في النكهه المنزلي واللي يعمل الاكل ستات بيوت مش شيفات .
•لو فاست فوود تميز في السعر و الكميه .
•لو كاچوال داينينج تميز في التنوع و تجربه ممتازه وجديده .
•لو فاين داينينج تميز في الراحه للعميل كأنه في الجنه .
( افهم السوق بتاعك قبل ما تفتح )
١٦. النظافه رقم واحد ، استخدم جلافزات كل ٢٠ دقيقه ومعقمان و كحول و روائح عطريه ولازم ٢ عامل نظافه شغالين ٢٤ ساعه معاك ( واحترم نفسك ولديهم مرتب كويس مش تديهم الفين جنيه ) ، ادرس هايجين و هاسب
١٧. المدير ملهوش مواعيد وملكش دعوه بيه بيعمل ايه ليك تحاسبه اخر الشهر فقط ، اديله قيمته وبرستيچه ومميزه في كل حاجه عن الباقي واوعي مشاكلك معاه تطلع للأصطف ، حاسبه كويس جدا واديله مرتب عالي جدا جدا ، الراحل ده خبره ، استلم منه تقارير نهايه اليوم و الاسبوعيه و الشهريه و السنويه و وتقرير بأي تطويرات جديده في سير العمل لتسهيله و توضيحه
١٨. الكاشير يا محترم بياخد مرتب قليل وعموله عاليه ، ده البياع بتاعك لو لقي أن رزقه علي كل جنيه بدخل ليه نصيب ، مبيعاتك في حته تانيه ، عين سيلز متعينش كاشير بيضرب ارقام ، شكه كويس ونظيف و وجهه وابن بلد
١٩. الشيف عباره عن ( خبره و نظافه وإبداع ) انت المنتج و الشيف هو المخرج ملكش دعوه بشغله حاسبه اخر الشهر بأي عجز مادي أو معنوي للعميل
المطبخ رجالته فقط ومسؤولياته واطلب منه كل شهر تقرير عن الأصطف و تطويراتهم و اكلي منه كل شهر يعمل تيست لطبق جديد ووفرله حل المكونات اللي يطلبها و المعدات المحترمه ، ومميزه عن الباقي ، ورأيه برأي مسؤول المشتريات هما الاثنين مسؤولين عن الطلبيات الفرق واحد بينفذ مع المورد و الشيف هو اللي بيطلب وبيخزن .
٢٠ . أخطر واحد مدير المشتريات ، رجلك علي رحله في كل شيء وعينك معاه وراجع حساباته كذا مره واسال وراه واعرف الحقيقه ، هو اللي بيتفث علي الطلبيه ، مع مسؤول المشتريات ، الله اعلم اللي مكتوب علي الورق هو اللي مُتفق عليه ولا لا ، بس اظيله قيمته اعمل كل حاجه من وراه من غير ما تزعجه ، هو في أيده يكبرك و يوقعك واوعي تعرفه علي مسؤول الحسابات والماليات عندك مهما حصل .
٢١. الوحيد اللي محدش يعرف هو مين ولا بيجي امتي الا انت وشغالين في سريه ٣ بس :
• محاسب التكاليف و المحاسب المالي و مراقب الكاميرات و انت صاحب المطعم .
٢٢. متصدقش أي حاجه تتقلك من مدير مطعمك غير بدليل مادي ارجوك ، ورقه ، فديو ، تسجيل خصوصا لو بيتكلم علي حد من اصطف .
٢٣. متعينش ٢ قرايب أو ٢ صحاب في مكان واحد .
٢٤. كل ٦ شهور شغل ناس معندهاش خبره في كل الأقسام ودربها خصوصا في الصيف الطلبه ( ربي رجاله بتوعك )
للحديث بقيه
Skills training Egypt
