28/12/2022
بصوا بقا
عشان نكون على نور من أولها.. عشان متزعلش سوا وممكن أدور فيكوا الضرب واحد واحد.. فمتخلونيش اتهور عليكوا
تلعبوا كالآتي
تشكيلك يا جدي 3-4-3 والأفراد كالآتي
حراسة المرمى : علي لطفي (ولا ان ده مستحيل)
خط الدفاع : محمود متولي(ركز معانا الله لا يسيئك) - محمد عبد المنعم (بلاش فزلكة والنبي يا نعومة كنت هتلبسنا كذا جون بس ربنا ستر) - ياسر ابراهيم (رجولة)
خلصنا من الدفاع
ندخل بقا عالوسط
خط الوسط : محمد ابهاني (ورب العزة لو ما اتعدلت لمخزوقك) - حمدي فتحي (الكريز وربي) - السولية (اتعدل بدل ما اعدلك) - علي معلول (اسرع دليفري في مصر)
خلصنا من خط الوسط
ندخل بقا عالثلاثي الناري (اللي لاهو ناري ولا يحزنون)
خط الهجوم : برونو ساڤيو (والله يابني انت انظلمت في مكان مش مكانك) - محمد شريف (روح يا شيخ ربنا يسدد تصويباتك وتخش في ام الشبكة خلينا نخلص) - حسين الشحات
تبدأ يا معلم لعب من لمسة واحدة وسرعة في الأداء وعاوزين الريتم يكون عالي لحد ما تجيبولكوا تلات اربع حبايات كده عالماشي
طبعا في حالة الهجوم برونو والشات هيضموا لجوا ومعلول وابهاني هيتقدموا... حلو الكلام
بلاش عرضيات ملهاش لازمة عشان مش هتستفاد منها بحاجة... العبها لو في وقتها الصح
إنما طول الوقت اخنق سيراميكا كليوباترا بريتمك السريع
طبعا هتقول لي يابو المداميد هو الكورة لعب من جهة واحدة ولا ايه؟
اقولك لا طبعا اما تقطع الكورة تلعب عالهجمة - والعياذ بالله - المرتدة بس بسرعة الله يستركوا عشان خاطر انا عندي السكر وانتوا مش متركب في رجليكوا أكياس رمل يعني
يارب تمها على خير وكملها بالستر بقا عشان انا جبت اخري
