Al Coach - الكوتش

10/08/2026

رأي شخصي

أخبار كتيرة بتربط كريستيان روميرو بأندية كبيرة زي برشلونة وأتلتيكو مدريد وأرسنال وإنتر.

بصراحة مش عارف إيه الحاجة المميزة في مدافع زي روميرو علشان يجذب أندية لها اسم كبير.

مدافع عصبي وأخطاؤه كتيرة وشهرته جاية من الإنذارات والطرد اللي بياخدهم أكتر من مستواه الفني.

طبعا الآراء بتختلف، بس أنا بحب المدافع اللي بيلعب بعقله قبل جسمه واللي ما يبقاش تدخلاته الخشنة اللي بتوصل لحد العنف أحيانا هي سبب شهرته.

رأيي إن مدافع من النوعية دي لا يصلح لنظام هانزي فليك على الإطلاق. ما هو لو برشلونة بيدور على مدافع قوي بدنيا ما كان عنده أراوخو، لكن أسلوب الدفاع المتقدم محتاج مدافع بيفكر وبيلعب بعقله، مش واحد بتاع إلتحامات وخلاص.

أخونا روميرو ده لو راح برشلونة الجمهور هيقول ولا يوم من أيامك يا أراوخو.

#برشلونة #الكوتش #كرةالقدم

09/08/2026

من أول ما ريال مدريد تعاقد مع كيليان مبابي، وأنا كتبت إن المشكلة مش في وجود مبابي مع فينيسيوس، لكن في دور بيلينجهام.

الكل شاهد وتأكد إن بيلينجهام بيتألق لما بيلعب أقرب لمهاجم وهمي .. يتقدم لمنطقة الجزاء ويكون قريب من المرمى .. هنا بيقدر يشكل خطورة ويسجل أهداف.
لكن لعبه كمحور مساند أو لاعب رقم 8 في وسط الملعب مش بيكون بنفس التأثير والتوهج، وهنا تظهر المعضلة.

توماس توخيل مع منتخب إنجلترا كان بيلعب بثنائي في المحور مكون من ديكلان رايس وإليوت أندرسون، وده كان بيعطي حرية لبيلينجهام إنه يتقدم ويلعب دور المهاجم الوهمي.
بس النقطة المهمة هنا إنه كان معاه مهاجم زي هاري كين.. بيرجع لوسط الملعب ويسحب المدافعين معاه ويخلي فيه مساحة يتحرك فيها بيلينجهام بحرية.

هل الكلام ده موجود في ريال مدريد؟ لا طبعا.
لأن ببساطة كيليان مبابي هو اللي لازم الهجمة تنتهي عنده، ومستحيل مبابي يلعب نفس دور هاري كين.
مبابي عاوز يكون هو الهداف ونجم الفريق الأول، وبالتالي مش هيعمل التضحيات اللي بيعملها كين مع منتخب إنجلترا.

طيب ماذا عن مركز 10؟
بصراحة، طالما عندك مهاجم بينهي الكرة في المرمى زي مبابي، فأنت محتاج صانع لعب صريح يوصل له الكرة في مناطق الخطورة، وأحسن واحد يقوم بالدور ده هو أردا جولر.
لكن بيلينجهام مش صانع لعب، هو عاوز هو اللي يسجل الأهداف.

وجود مبابي هو أكبر عائق لبيلينجهام في ريال مدريد، ومش عارف إزاي مورينيو هيحل المعضلة دي .. لكن رأيي بالشكل الحالي صعب يكون لبيلينجهام دور كبير مع الفريق لأن أكيد جولر أفضل منه في جزء صناعة اللعب.

#الكوتش #كرةالقدم

09/08/2026

هل أخطأ ريال مدريد بتجديد عقد فينيسيوس جونيور؟

لا طبعا .. وهقولك ليه

كتير من الناس وأنا منهم عندهم تحفظات على تصرفات وعقلية فينيسيوس جونيور، لكن كموهبة وقدرات فنية الرجل ده عنده كتير يقدمه. لما فينيسيوس بيكون في حالته، بيكون ورقة هجومية قوية جدا في ريال مدريد ولاعب يقدر الفريق يعتمد عليه في التحولات الهجومية والإختراقات من الجانب الأيسر.

لو افترضنا إن الريال قرر عدم تجديد عقد فينيسيوس، فهل هو يملك جناح أيسر بنفس الكفاءة؟
مبابي اتغير مركزه للعمق وأصبح مهاجم، سواء مع ريال مدريد أو منتخب فرنسا.

واحد هييجي يقول ما النادي اتعلقد مع يان ديوماندي برقم محترم .. ماشي يا سيدي، بس أولا ده لاعب لسة سنه صغير وجاي من مستوى تنافسي أقل، فمش من المتوقع أبدا إنه هيقدم نفس مردود فينيسيوس من أول موسم.
كمان ديوماندي ممكن يتم توظيفه كجناح أيسر أو أيمن، وبالتالي هو ممكن يفيد الفريق بأكتر من طريقة، بشرط إنه يتأقلم مع الأجواء ويقدم مستوى جيد، ودي حاجة الله أعلم هتحصل ولا لأ.

بالتالي فكرة التضحية بلاعب بإمكانيات فينيسيوس، اللي بيمثل إختيار مضمون ومجرب، عشان لاعب تاني صغير لسة مفيش حد يقدر يؤكد إن كان هينجح ولا لأ كانت تعتبر مخاطرة كبيرة جدا من ريال مدريد... حاجة كدة أشبه بالقمار.

مورينيو عاوز فينيسيوس، والأخير عاوز ريال مدريد.
طبيعي المفاوضات تاخد وقت وتبقى صعبة، وشوفنا نفس الموقف مع لاعبين كبار في أندية أخرى.

التجديد لفينيسيوس كان قرار صحيح من إدارة ريال مدريد، وفي أسوأ الظروف لو حصل أي حاجة في المستقبل والنادي قرر يبيعه، فالموضوع هيكون متاح وبرقم كبير كمان .. يعني الكل خرج كسبان من التجديد.

#الكوتش #كرةالقدم #فينيسيوس

23/07/2026

هل أسلوب هانزي فليك أضر بكوبارسي؟

كلنا شاهدنا المستويات الكبيرة التي قدمها كوبارسي مع منتخب إسبانيا وفوزه المستحق بجائزة أفضل لاعب شاب في كأس العالم، فلماذا لا يظهر بنفس التوهج مع برشلونة؟

1- أسلوب فليك في اللعب بدفاع متقدم يترك بعض الثغرات ولا يساعد في إظهار إمكانيات كوبارسي، لأن ذلك الأسلوب يتطلب مدافعا سريعا، وهي ليست نقطة تميز المدافع الشاب.

2- في برشلونة مستوى المدافعين المجاورين لكوبارسي لا يرتقي لأداء لابورت وكوكوريا وبورو. الدفاع منظومة كاملة ولا يعتمد على فرد واحد.

3- لا يوجد رودري في برشلونة. دور أفضل لاعب في المونديال كان محوريا في الإستحواذ والسيطرة على الكرة وإسترجاع الكرة في أماكن متقدمة، مما يسهل مهمة الدفاع. مرمى إسبانيا لم يتعرض للكثير من الخطورة على مدى البطولة ولم يستقبل سوى هدف واحد.

أسلوب اللعب مع جودة المدافعين وخط الوسط، كلها عوامل ساعدت في تألق كوبارسي مع المنتخب الإسباني.

برشلونة يحتاج للاعب من نوعية لابورت في الدفاع بجوار كوبارسي.

#برشلونة #الكوتش #كرةالقدم

21/07/2026

#الأرجنتين #الكوتش #كرةالقدم

20/07/2026

رودري أخذ حقه من الإشادة، ولكن ماذا عن بيدرو بورو؟

أفضل ظهير أيمن في كأس العالم بلا منازع.

بعد مباراة إسبانيا الأولى أمام كاب فيردي، كتبت عن ضرورة إشراك بورو أساسيا بدلا من يورينتي، وقد كان.

بورو لاعب بإمكانيات ممتازة، لكنه مظلوم بتواجده في توتنهام المتذبذب والذي كان يصارع لتجنب الهبوط في الموسم الماضي. لو كان في ريال مدريد أو برشلونة، لكانت الأضواء مسلطة عليه بشكل أكبر.

لو فكر برشلونة في تدعيم مركز الظهير الأيمن، فلا يوجد خيار أفضل من بيدرو بورو في ذلك المركز.

#الكوتش #كرةالقدم

20/07/2026

#الكوتش #كرةالقدم

Send a message to learn more

20/07/2026

ماذا بينك وبين الله يا فيران توريس؟

تروح تلعب في مانشستر سيتي مع بيب جوارديولا، قلنا الولد مرزق وابن حلال ... ما نبصلوش في رزقه.

ييجي بعدها برشلونة يشتريه ... قلنا ده أكيد بر الوالدين ودعوات الست الوالدة اللي ما بتخيبش أبدا.

تيجي بعد كدة تنتقل لباريس سان جيرمان بطل أوروبا آخر موسمين ... قلنا إنريكي مدرب كبير وأكيد هو شايف حاجة إحنا مش شايفينها. هو إحنا هنفهم أحسن من إنريكي؟

منتخب إسبانيا ما عندوش اسم تقيل في الهجوم من بعد عصر ديفيد فيا وتبقى ضيف دائم في قايمة المنتخب ... قلنا أدي الله وأدي حكمته وهي أرزاق بتتقسم ... إحنا مؤمنين بالله خلي بالك.

تنزل ماتش نهائي كاس العالم مكان أويارزابال وتسجل هدف الفوز التاريخي بكاس العالم ... قلنا دي دعوات الست الوالدة مفيش كلام، لأن مفيش تفسير للي بيحصل غير كدة.

لكن كل ده كوم، وتيجي تقف مع شاكيرا ده كوم تاني خالص .. دي بقى مفيش حد لاقيلها تفسير حتى الآن.

يا توريس بتعملها إزاي؟

أعطني حظ توريس وارميني في أوضة ضلمة مع باريديس وأوتاميندي.

#إسبانيا #الكوتش #كرةالقدم

#

19/07/2026

انتصرت كرة القدم ... انتصرت إسبانيا

#الكوتش #كرةالقدم