OmniFoot

10/10/2025

المعنى الحقيقي لكرة القدم هو الفوز بالماتشات والالقاب ولهذا انا هنا، عارف انها مهمة صعبة لكن انا مؤمن إن أنا شغلي هو انى اكون متعود على الضغط.

لهذا أنا هنا .. ولهذا خلقت كرة القدم .. فقط من أجل الفوز.

ده كان أقوى تصريح اتقال وأكتر تصريح اتقال بثقة من ياس ثوروب في مؤتمر تقديمه داخل الجزيرة الذي انتهى منذ دقائق.

المدرب اللى ذكر منذ اسبوعين لوليد صلاح الدين في الفيديو كونفرانس اللى جمعهم سوا إنه مرن جدًا في تحديد طريقة اللعب وانه بيبدأ دايمًا بطريقة لكنه بشكل سريع بيغيرها عادي في حالة عدم تطبع اللاعبين عليها او عدم ملاءمة القماشة اللى بيملكها لطريقته فهو بلغه انه بشكل سريع بيغير طريقته من ماتش لماتش وماتشات بيلعبها دفاعي وماتشات بإندفاع فتاك.

بالربط بين الكلام ده والكلام ده فاحنا أمام رجل برجماتى لكن بصرامة ونظام بلا عشوائية أو هرجلة.

من داخل الاهلي .. تفنن الاهلي كعادة الاهلي في تقديم كل ما يليق بالأهلي.

ياس ثوروب .. ننتظر ونرى 🤌🏻

31/08/2025

محدش احسن من حد قبل التوقف الدولي 🫡

جمعية ميت عقبة الخيرية تستمر في دعم الفرق الصاعدة للدوري الممتاز كل موسم🫢

30/08/2025

مدرب أجنبي أم المدرب المصري الأنجح في تاريخ الأهلي

هل نقترب من عودة لإسم چوزيه داخل الاهلي أم نقترب من ولاية رابعة للبدري؟

27/08/2025

تذكر 🫡

لو بنتكلم على الجودة ف الجودة سهل تعويضها بجودة زيها او لو حتى معوضتهاش بجودة زيها ف تقدر تعوضها بمنظومة لعب جديدة تخفي او تقلل عيوب وفوارق الجودة

لو على التأثير فتأثير أي لاعب سهل تعويضه بلاعب مؤثر وفعال أخر حتى لو مش بنفس الخصائص او حتى مش في نفس المركز.

لكن الشئ اللي بصوت محمد هنيدي " تدرى اللى قاهرنى وحازز في نفسيتى " هو الهوية : عبد المنعم كان عنده هوية الأهلي مش بيتدعيها يعنى هو اللى لما كان بيرفع ايده ويشاور علي الشعار إنه رقم ١ تحسها وتلمسها بجد متحسهاش من أي حد قد ما تحسها منه هو راضع هوية إنه كشخص هو رقم ١ وإنه كنادي دايمًا رقم ١ هو عايش ده بينام ويصحى عليه

الاهلي مفقدش لاعب ولا فقد مدافع ولا فقد مدافع كويس ولا فقد مدافع هو الأحسن في مركزه ولا فقد مدافع بيعرف يخرج بالكورة كويس ولا ولا ولا ولا كل ده بعد شهور او سنة تقدر تجيب او تقرب منه، لكن الاهلي فقد عرق وشريان بيجرى فيه دم الاهلي الحقيقي في تشكيلته.

أهم لاعب في منظومة الاهلي مش من وقت عودته في يناير ٢٠٢٢ لا هو اهم لاعب من يوم ضربة البداية مع كولر في المنستير بتونس في ماتش الاتحاد هناك.
كان زى الجرار اللي شايل فرقة مليانة لسه نواقص كتيرة لكنه كان احسن لاعب في أي بطولة دخلها الاهلي من يوم الماتش ده اي بطولة ولو من ماتش واحد كان عبد المنعم هو اقوى شخص في ال١١

الاهلي افتقد شخصية وحضور طاغي في الملعب حضوره كان بيطغى ع الكل بما فيهم كباتن الفرقة كان بيوجه الفريق ويجمعه ويدي تعليمات ويخرج من المعارك منتصر بقلب لا يتوقف عن النبض

معتقدش ان عبد المنعم بكل قدراته هنقدر نشوفه تاني بتيشرت الاهلي لكن هتوحشنا حقيقي يا منعم هنستناك في مدرجاتنا في كل زياراتك لمصر وهنستنى نحس بوجودك جنبنا ونشوف احتفالات بالدم والقلب منك في وسطنا لانك شبهنا ومننا.

علي محمد 🎖

15/08/2025

شوط أول من أهلي ريبيرو برعاية OmniFoot ♥️

12/08/2025

في الحقيقة بلا تهويل او تقليل فالأهلي واقع في ورطة كبيرة منذ اختياره لريبيرو وذلك ليس لسوء الرجل بل الامر يتعلق بمناسبة الادوات للافكار

الامر ببساطة أشبه بإن يبقا احتياج الطبخة اللى انت ناوى تطبخها النهاردة لطماطم وانت هناك يعجبك سعر المانجا ف تقرر انك هتشترى مانجا لأن فقط عجبك سعرها

هل ريبيرو مدرب معندهوش فكرة ؟ الاجابة لا

طب الاهلي باختيار ادارته الفنية ومديره الرياضي اختار سكواد يميل للعب المباشر القوى الصريح والسريع
الاهلي اختار افراد تحتاج لمنظومة برتغالية سريعة التكيف والتأقلم وقوية الشخصية وكمان اجتماعية لشرح افكاره لكل لاعب وانه ليه هيلعب وليه هيقعد وانه لازم يعمل كذا عشان يلعب والا مش هيلعب

الراجل من الاخبار اللى حوالين معسكر الاهلي انه بيدرب ويمشي ويقول هنعمل ايه ويروح .. تواصله قليل .. كلامه قليل ..

الاهلي اجانبه مش بالسوء اللى الناس متصوراه .. عادي بل انه امر بديهي ان الاهلي بعد رحيل منعم يجيب لعيبة مدافعين بيعرفوا سيكا يلعبوا برجليهم زى مرعي وبيكهام لكن اللى مش عادي لما يبقا عندى ياسر ودارى والاتنين بروفايل واحد وداري اصغر في السن ودارى اذكى سيكا وداري اطول يعنى معاه نقطة تفوق ف اللي يلعب عليه ياسر ده مش طبيعي ومش مقبول تحت اى ظرف انا مش بقولك لاعب ياسر وداري لا انا بقولك لازم تختار داري على حساب ياسر لو الاتنين جاهزين

الاهلي محتاج يستفيد من فترة غياب امام ويحل مشكلة بن شرقي ولا تريزيجيه في الجناح ويعيد تريزيجيه لمركز ٨ ايسر وبن رمضان يبقا مركز ٨ ايمن وديانج رقم ٦ مسمار وافضل carrier للكورة في سكواد الاهلي كله والجرى بيها لمسافات

الاهلى لازم يلعب بن شرقي جناح ايسر افضل دريبيلير عند الفريق مع امام وكمان جناح انسايدر قوى وقت ما الكورة تكون مع زيزو علي اليمين هتبقي ضامن انه فيه راس حربة تانى - اللى هو بن شرقي - ورا راس الحربة الرئيسي وقت رفع الاوڤر.

الاهلي محتاج يكون صبور على جراديشار ويثبته كرأس حربة جراديشار اول ما جه عمل انطلاقة ممتازة وشويط برجله وشويط براسه بجد بيشوط الكورة براسه بجانب انه مبدع وخلاق للفرص لزمايله بكل سلاسة وبدون عجن

صبر الاهلي على جراديشار لازم يستمر كمان مع شكري لان صبرك على شكرى هيقوى من عزيمته وثقته وكمان هيخليك مرتاح وانت بتحط كريم فؤاد كظهير عصرى قوى في اليمين

تشكيل الاهلي لو اتثبت بوجود :

الشناوى

شكري .. مرعي .. داري .. كريم

تريزيجيه .. ديانج .. بن رمضان

بن شرقي .. جراديشار .. زيزو

تشكيل متنوع فيه الخمسة الاجانب بتوعك في الملعب اللى كله مذهول من غيابهم ومش كل اللعيبة ينفع تتساوى عند المدير الفنى في التدريب فيه لعيبة تدريب ولعيبة ماتشات

تشكيلة فيها اطوال تخليك بعد تدريبات تخصصية يومية ومستمرة تخليك الفرقة الافضل في الكرات الثابتة يمكن في القارة بوجود منفذ بارع للعرضيات زى زيزو واطوال عالية او منفذين بارعين للرأسيات زى دارى ومرعي وبن رمضان وبن شرقي وجراديشار

تشكيلة فيها جناحين متنوعين مش جناحين زى بعض بدلا من زيزو وتريزيجيه يبقا. بن شرقي وزيزو واحد موزع للعرضيات ماكينة حرفيًا والتانى دريبيلير وانسايدر قوى وصانع للاهداف بكل سلاسة

تشكيلة تخليك متستعجلش عودة امام وتتفاقم اصابته بل انها قد تؤتيك ثمار عظيمة تخليه راجع يفرك على مكانه

تشكيلة فيها لعيبة حريتة وفيها حريفة فيها هاديين وفيها جرايين وفراكين

الاهلي محتاج يوصل ماتش بيراميدز بالتشكيلة دى لان الماتش ده هيكون صعب .. صعب جدًا علي الاهلي لو الاهلي وصل ليه وهو مش محدد قوامه ولسه مديره فنى بيتعرف على لعيبته

بالمناسبة وضوح المدرب مع اللعيبة بعد تثبيت تشكيلته دى هيديله هدوء في تجهيز قايمة بدلاء قوية وممتازة تقلبله اى ماتش لو فريقه البدنى والمحللين ركزوا معاهم ( بيكهام وياسر ورضا والشحات وشريف وطاهر وعمر كمال ) كلهم لعيبة جوكر بيلعبوا في اكتر من مركز لو حفزتهم وخليتهم مركزين في التدريب هيريحوك في كل المراكز

عمر : بيلعب باك ووينج يمين ويسار هيريحك في اربع مراكز لو جهزته كويس وخلقتله دوافع

بيكهام : بيلعب مدافع ووسط ملعب ٦ واحيانًا باك يمين

طاهر : يفيدك كجناح ايمن او ايسر والموسم الماضي تألق في كل المراكز اللى لعب فيها لعب رأس حربة كمان

الشحات لازم تخلقله دوافع كمدرب حتى لو ليناير وتخيل ده لو حصل هيبقا معاك كارت من نار على الدكة

شريف كذلك لنفس موقف الشحات

الاهلي مش محتاج مدير فنى بس الاهلي محتاج سرعة في فهم الامور والمجريات .. الاهلي محتاج ان ملعب التتش يتملي بالضجيج والحماس والغرق في التدريبات القوية

📝: علي محمد علي

#الأهلي #ريبيرو #مصر

19/07/2025

العاطفة لا تصنع المبادئ.. درس من حامد حمدان و وسام بوعلي!

‎في الأيام الأخيرة، تابعنا جميعًا ما يثار حول اللاعب حامد حمدان، وموقفه تجاه ناديه الحالي، حيث غاب عن التدريبات، ونشر أخبارًا عن حالته الصحية والنفسية، في محاولة واضحة للضغط على إدارة ناديه بهدف إتمام انتقاله إلى نادي الزمالك.

‎الجماهير البيضاء – بحماسها المعهود – تفاعلت مع الموقف باحتفاء كبير، واعتبر الكثير منهم ما فعله اللاعب نوعًا من “التضحية” و”العشق” لقميص الزمالك. ولكن، هل حقًا هذه الأفعال دليل على الولاء؟ أم أننا فقط نرى الأمور من زاويتنا العاطفية؟

⸻

‎⚠️ الولاء الحقيقي لا يُبنى على الضغط والتمرد

‎اللاعب الذي يتمرد على ناديه اليوم، لن يتردد في التمرد على ناديك غدًا إن جاءه عرض أعلى، أو شعر بأن مصلحته الشخصية في اتجاه آخر. نفس السيناريو الذي حدث مع وسام بوعلي، الذي ضغط في وقت سابق على ناديه السويدي للانتقال إلى الأهلي، ووقتها تم تصويره كبطل في أعين جمهور الأهلي، بل حتى بعض رموز النادي امتدحوه، ولكن ما لبثت الأمور أن انقلبت، بعدما بدأ يضغط على الأهلي نفسه من أجل الانتقال إلى الدوري الأمريكي.

‎فهل كان وسام بطلاً في الحالة الأولى، وخائناً في الثانية؟
‎وهل سيكون حامد حمدان بطلاً الآن، ثم خائناً بعد موسم أو موسمين عندما تأتيه عروض خليجية أكبر فيقرر تكرار نفس “اللعبة” ولكن هذه المرة ضد الزمالك نفسه؟

⸻

‎⚽ اللاعب المحترف… مخلص فقط لنفسه

‎اللاعب في الزمن الحالي غالبًا ما يكون مخلصًا لنفسه ولحسابه البنكي. العواطف التي يتحدث بها أحيانًا ما هي إلا أوراق يلعب بها أمام الجماهير والإعلام لتحقيق أهدافه. وبالتالي، لا يجب أن ننخدع بالمظاهر أو “المواقف البطولية المؤقتة”.

⸻

‎🧠 المطلوب من الجماهير: وعي كروي أعلى

‎من حق الجماهير أن تحب ناديها وتفرح بكل من يسعى للانضمام له، ولكن من المهم أن نفهم أن طريقة انتقال اللاعب وسلوكياته مهمة مثل موهبته تمامًا. لأن نفس الطريقة التي استخدمها مع ناديه الحالي، سيستخدمها معك لاحقًا.
✍️ Sherief Eltalawy

24/06/2025

بصفتي كأهلاوى فانا مش هكلمك المرادى عن حاجة من الجاية دى ( المكاسب المادية من البطولة - مستوى فريق مخيب أو مبشر - تفاصيل بسيطة او كبيرة كانت السبب في الخروج - دقيقة او اتنين حولتك من فريق في ايدك ٧ نقط من المحموعة لفريق رابع بنقطتين ) كل اللى بين القوسين ده انا مش هتكلم فيه لسببين

١- انك من اول البطولة مش بتشوف كلام الا عن التفاصيل دى في بوستات كل الصفحات اما بغرض تفخيم مبالغ فيه - لجان الكابتن - او بغرض التقليل المبالغ فيه والسخرية من اي خبر يخص الاهلي في البطولة حتى لو صفحة عادية منزلة معاد الماتش - دى لجان أحمد سالم وجروبات الواتساب بتاعته - او لو صفحات اخبارية عادية جدًا ف من الاخر انت بكل انتماءك شبعان من الكلام ده

النهاردة انا حقيقي جاى اتكلم وكأهلاوى - بوضوح وامانة - عن الشئ الوحيد الخاص بالاهلي اللي حقيقي وصل لحد الابهار في البطولة وهو اللى في الصورة ده .. يعني ايه ٤٠ الف حضور اهلاوى امبارح و ٥٠ الف في ميامي في الافتتاح كلهم احمر

حاسس ان شركاء الوطن المرادي عن عمد فيه محاولة انهم يشغلونا بمواضيع اخرى كلها هاها عشان النقطة دى واللي هي اصلًا اللي بيحصل فيها النكش والتباهي والتفاخر لان بجد كل اللي بيجروك ليه وللتقليل منه بغرض ان لو نقطة الجماهيرية اللي ملئ العين والبصر دى مذهلة

منصات سوشيال ميديا مشتعلة بالتفاعل .. ستادات في كل الدول ببتقفل وتتملي .. رصيد الاهلي في البنك لا يتوقف بسبب الصورة دى.

علي محمد

24/06/2025

في الاهلي مهما بلغ حب ادارة النادي لناديها دائمًا ما توجد نسبة لذوى القُربي مِن مَن يرضى عنهم الكابتن ويحبهم

رغم الانجازات والسعى دومًا للافضل لكن أهلي محمود الخطيب ليس فوق الجميع

#منتهي

علي محمد

19/06/2025

"معضلة ترنت الكساندر ارنولد♟️"
كم سؤال لمحبين لعبة الشطرنج اللعبه الاقدم و الاعظم
-هل خطورة اي عنصر من عناصر اللعبه بيبقي ف العمق ولا علي اطراف رقعة الشطرنج؟
اجابتهم اكيد هتكون من العمق اكيد
طيب سوال تاني الفيل في الشطرنج بيشكل خطورة في المكان اللي بيبدا منه ولا وهو قاطع من الاطراف للعمق
الاجابة هتكون بديهيه و هي انه لما يكون قاطع بشكل قطري من الطرف للعمق
لو نقلنا التصور دا لملعب مباراة ريال مدريد هنلاقي ان ده اللي بيحاول يطبقه الونسو مع ارنولد زي لاعب الشطرنج مع الفيل
الونسو عايز ارنولد هو يبقي صانع صانع اللعب المتاخر او يبقي "Deep-lying Playmaker “ بسبب جودة الكره وهي خارجة من رجل ترينت و دا اللي بيفتقده ريال مدريد الموسم اللي فات او ريال مدريد ما بعد توني كروس
لو لاحظنا ماتش الهلال هنلاقي ارنولد طول الماتش ضامم لقلب الملعب كلاعب وسط اضافي للفريق

طيب طالما الكلام جميل و معقد كدا ليه الريال ظهر بالشكل الباهت ده و ارنولد ظهر بالحالة المزرية دي؟
-اول سبب اكيد ان اللعيبه بقالها موسم كامل بعيد كل البعد عن المواقف التكتيكية المعقده و انشلوتي الحقيقي سايب الفريق علي المحارة
- السبب التاني هي الانسجام و الوقت الراجل مرن الفريق ايام معدودة
- السبب الثالث و الرئيسي هي تطبيق ارنولد للطريقة بشكل ساذج لانه لسه متعودتش عليها لانه بيطبقها بشكل مختلف عن ما هو في ليفربول ارنولد طول الماتش ضامم العمق كلاعب وسط اضافي و ده ادي لاعبي الهلال الفرصة ف ترتيب شكل الفريق و ده مخلقش اي نوع من المباغته بالعكس اصبح نقطة ضعف خلف ارنولد "كالعادة" بس بشكل اوضح و اوسع
- ارنولد هيشكل خطورة حقيقية لما ينطلق من طرف الملعب للعمق بشكل مفاجي زي وضع الفيل في لعبة الشطرنج ولكن دا هيترتب عليه شغل و مجهود كبير من الفريق ككل لان فيل الشطرنج عشان يشكل خطورة باقي عناصر اللعبة بتفتح مسار حركة الفيل عشان ينطلق فيها
- وهنا دور فالفيردي ب انه يفتح عرض الملعب و يلعب ك خط وسط مت-طرف "half winger” عشان يدي مساحة لارنولد يتحرك ف العمق و يغطي مكان ارنولد حاجة كدا شبه دور هندرسون مع كلوب
الحقيقه الونسو قدامه شغل كبير و مجهود جبار عشان ينقل ثقافة الفرقة و يكون هيكل واضح و قوي لعودة ريال مدريد للخريطة من تاني

11/06/2025

في عالم آخر موازي .. و في لعبه اخري لا تمت لعبتنا المحليه بصلة
اهتم نادي نيوكاسل يونايتد بضم اللاعب برايان مبيومو، نجم نادي برينتفورد الإنجليزي اهتمام بدأ منذ بداية فترة الانتقالات الصيفية، حيث سعى النادي لمعرفة تفاصيل عقده و راتبه في ظل الأداء المميز الذي يقدمه اللاعب.
مبيومو أثبت نفسه بقوة في "الدوري الإنجليزي الممتاز" وقدم مستويات لافتة سجل ٢٠ هدفًا و صنع ٧ اهداف رغم أنه يلعب لفريق بحجم برينتفورد الذي لا يُعد من الأندية الكبرى في إنجلترا بجانب كونه لاعبا دوليا

لكن المفاوضات توقفت فجأة، وكان السبب الرئيسي هو الراتب الذي طلبه مبيومو. إذ كان يتقاضى 45,000 جنيه إسترليني أسبوعيًا مع برينتفورد، وطلب من نيوكاسل راتبًا مضاعفًا أربع مرات ليصل إلى 180,000 جنيه أسبوعيًا.
-راتب منطقي جدا - هذا الرقم وُصف من قبل إدارة نيوكاسل بأنه مبالغ فيه،.

هذا الأمر جعل نيوكاسل يُعيد النظر في الصفقة، ويصرف النظر عن اللاعب

وعلي الجانب الاخر يطل علينا دورينا الحبيب بصفقة انتقال اللاعب الواعد مصطفي العش "مدافع" فريق زد اللذي انهي ترتيبه ف النصف الاخير من جدول الدوري الي النادي الاهلي بصفقة قدرها ٧٥ مليون جنيه اي ما يعادل مليون و نصف دولار للاعب غير دولي سيكون ترتيبه رابع مدافعي الاهلي
وهذا يذكرنا بصفقة انتقال اللاعب الواعد زياد كمال علي سبيل الاعارة لنادي الزمالك بمبلغ ٣٠ مليون جنيه ما يعادل اكثر من نصف مليون دولار في لاعب لم يمثل منتخبه الاول وامكانياته لا تؤهله للعبور امام نادي الزمالك

وفي ظل هذا المشهد، فإن من الطبيعي أن تبدأ اندية منتصف الجدول في المبالغة أيضًا في مطالبها، طالما هناك من يدفع هذه المبالغ دون حساب، وهو ما يُظهر الحاجة الملحة لإعادة هيكلة نظام التعاقدات والإنفاق في سوق الانتقالات و العمل علي انتقاء الخماسي المحترف