07/06/2026
برشلونة مقتنع بموهبته... وإحنا مستعجلين ندفنه بعد كام دقيقة قدام البرازيل! تفتكر ليه 🤔
. ما زالت حملة التشكيك والتقليل والسخرية من حمزة مستمرة بشكل يخلّي أي حد يسأل: إحنا عاوزين إيه بالظبط؟
بنتكلم عن لاعب عنده 18 سنة فقط، لسه برشلونة قرر يستدعيه لمعسكر إعداد الفريق الأول، وكل اللي بيتابعوه هناك بيتكلموا عنه بإعجاب وبيشوفوا فيه مشروع لاعب كبير يقدر يفرض نفسه في أعلى مستوى كروي في العالم.
لكن عندنا؟!
مطلوب منه في الخمس دقايق اللي نزلهم قدام البرازيل إنه يجيب هاتريك ويعمل اللي معملوش نجوم كبار في سنه!
تلاقي سخرية، وتريقة، وأحكام نهائية على لاعب لسه بيبدأ أول خطوة في طريقه.
وكأننا بنتعامل مع لاعب عنده 30 سنة وخاض مئات المباريات وفشل في تحقيق أي شيء!
للأسف، بقينا محترفين في هدم اللاعبين نفسيًا قبل ما نديهم فرصة حقيقية يثبتوا نفسهم.
يا جماعة، ده لاعب عنده 18 سنة... المفروض كل اللي يشوفه مننا يكون دعم وتشجيع ومساندة، مش محاكمات وأحكام بالإعد/ام الكروي.
أما فنيًا، فاستفادة المنتخب من حمزة مرتبطة بطريقة اللعب.
لو داخل ماتش هتضغط فيه هجوميًا وهتستحوذ وتخلق فرص كتير، زي ماتش نيوزيلندا مثلًا، ساعتها تقدر تشوف قيمة اللاعب الحقيقية.
أما لو هتلعب بتكتل دفاعي وتعتمد على التحولات السريعة أغلب الوقت، فطبيعي جدًا إن تأثيره يكون محدود، لأن طبيعة المباراة أصلًا مش مناسبة لنوعية اللاعب.
حمزة محتاج وقت... محتاج صبر... ومحتاج جمهور يساعده يكبر.
لأن الموهبة اللي بنهدمها النهارده... ممكن تكون هي نفسها اللي هنندم عليها بكرة.
