Yasser adham

14/02/2026

الزمالك بيصنع المعجزات وبيحقق المستحيل .. تخيلوا ان في ظل المشاكل والأزمات والكوارث والمصايب وقضايا ايقاف القيد وهروب اللاعبين وفسخ التعاقدات وغرامات الفيفا والاصابات الكتيرة وحالة الافلاس وسحب الأرض وتأخر المستحقات المادية وبيع اللاعبين واللجوء لمدربين محليين واللعب بالناشئين ، الزمالك بيتأهل كأول مجموعته في كأس الكونفيدرالية في مجموعة صعبة مع كايزر تشيفز والمصري ، وكمان بيحتل المركز التاني في الدوري متفوقا على الأهلي وبيراميدز اللي بيملكوا الاستقرار والهدوء والفلوس الكتيرة والتعاقدات مع نجوم كبار بملايين وصرف المستحقات في ميعادها ومدربين اجانب بملايين وكمان تأهل في كأس مصر والأهلي خرج من فريق درجة تانية .. نادي الزمالك أغرب حاجة ممكن تشوفها في حياتك

10/02/2026

10/02/2026

عارف انت مسلسل "عائلة الحج متولي"، كانت غادة عبد الرازق بتلبس غوايش كدا مرصوصين في ايدها وبيعملوا احلى دوشة.. وهي كانت كل شوية تخشخش بيهم..

الغوايش دي الطلب زاد عليها قوي بعد المسلسل.. واتسمت في سوق الصاغة.. غوايش نعمة الله اسم شخصة غادة في المسلسل.. وبقت العرايس تسأل عند الجواهرجي.. عندك غوايش نعمة الله.. واتباع منها اعداد مهولة.. مصطفى محرم مؤلف المسلسل.. قالي في حوار معاه .. ان الغوايش دي دخلت كل بيت في مصر... وطبعا دي معلومة مش صحيحة.. لانهم مدخلوش بيتنا.

غادة عبد الرازق مكانتش حابة المسلسل اصلا، وقررت ترفضه، لان اختها يسرية قرت المسلسل وقالتلها لو عملتيه مش هيقوملك قومة.. دا بعيد تماما عنك.. انتي روحي اعتذريلهم بذوق... لكنها مقدرتش تعتذر لنور الشريف فعملت الدور.. والغوايش دي بتاعت أم غادة عبد الرازق.. واللي موجودة معاها لغاية دلوقتي لانها ورثت بعد أمها الله يرحمها...

بمناسبة مسلسل عائلة الحاج متولي، فمصطفى محرم قالي وقال في كذا حتة ان سوزان مبارك، طلبت من صفوت الشريف انهم يغيروا المسلسل.. لانه بيشجع على التعدد... وقال ان المجلس القومي للمرأة حارب المسلسل وناقشه في كذا ندوة، ومصطفى محرم قال انه راح يتناقش معاهم لقاهم حافظين المسلسل اكتر منه، واقترحوا عليه ان نور الشريف يطلع بيحلم ي الحلقة الأخيرة.. بس هو رفض.. وضافوا مشهد في حوار بين نور الشريف وابنه مصطفى شعبان.. بيقوله انه ندمان وانه لو رجع بيه الزمن مش هيعمل كدا..

وحسب البيان: " قدمت 7 جمعيات نسائية مصرية مذكرات إلى رئيس اتحاد الإذاعة والتلفزيون تطالبه فيه بعدم تكرار هذا المسلسل وتعديل وإضافة بعض الجمل الحوارية وحذف بعض المشاهد الأمر الذي جعل المشاهدين ينتظرون رؤية نهاية المسلسل الجديدة.. وعلى الرغم من تغير ثلاثة مشاهد وإضافة جمل حوارية على لسان بطل العمل نور الشريف والذي يعترف فيه بارتكابه خطأ عندما تزوج أكثر من مرة وإلغاء مشهد الفنان الشاب مصطفى شعبان والذي يعلن فيه عن زواجه من نورهان"، يعني حسب كلامهم ان مصطفى شعبان كان هيتجوز نورهان على بطة..

وفي المشهد اللي اتضاف في المسلسل بيقول الحاج متولي لابنه سعيد: "صدقني يا سعيد يا بني.. اللي يتجوز زوجة واحدة كويسة بتبقى بـ 100 زوجة، ولا انت رأيك ايه".

وواضح ان كلام نور الشريف اثر في مصطفى شعبان قوي، وراح عمل هو الزوجة الرابعة.. ومن ساعتها وهو حالف ما يدخل أي مسلسل غير وهو فيه 12 واحدة بيحبوه..

09/02/2026