Egy Fishing

24/12/2025

12/01/2025

بسم الله الرحمن الرحيم

النهارده هنتكلم علي سمكة ممتعه جدا فالصيد
سمكة انا بعتبرها صديقة صياد الكاستنج لان فالموسم
بتاعها بامر الله لو شغال عليها صح هتاخد منها ودايما باذن الله هتروح مجبور
سمكة البراكودا




فصيلة من الأسماك الضخمة المستطيلة الشكل الفضية اللون


تغطي جسمها قشور صغيرة، كما تتميز بزعانفها الظهرية المتباعدة،


وذيلها المشقوق، وهي تعيش في جميع البحار والمياه الاستوائية

الشكل العام لبراكودا
بختلاف فصايلها بتتمتع بشكل شبه واحد

الجسم
إسطواني الشكل ويتكون من الرأس الذي يبدأ من المقدمة إلى فتحة الخياشيم

والجذع
الذي يبدأ من فتحة الخياشيم إلى فتحة الشرج، أما الذيل فيبدأ من فتحة الشرج إلزعنفة الذيلية

مخروطي الشكل مضغوط الجانبين يصل طوله حوالي ربع طول الجسم


وبه عينان والخياشيم
والفم الذي يتكون من الفك السفلي


وعادةً يكون اطول من الفك العلـوي ويحتوي على عدد من الأنياب الحادة تصل الى 18 ناب
يبرز خرطوم من الفك السفلي




الجذع
يحتوي
على زعنفتين ظهريتين منفصلتين والتباعد بينها كبير وزعنفتين صدريتين وزعنفتين
شرجيتين

وهناك
تشابه بين الزعنفة الظهرية الخلفية بالحجم مع الزعنفة الشرجية


يوجد أيضا بالجذع الخط الجانبي وهو واضح تقريباً
الذيل
والذي يبدأ من فتحة الشرج إلى نهاية الجسم وبه الزعنفة الذيلي


اماكن تواجدها

البحار الاستوائية حول الرؤوس المرجانية والشعاب المغمورة في المياه


تكثر
في غرب المحيط الأطلنطي وفي المحيط الكاريبي


وهي تعيش في مياه البحر المتوسط والجزء الشرقي من المحيط الأطلنطي


إلى جانب تواجدها في كل البحار الاستوائية


ودائما في وجود النوات


تقوم بالبحث عن ملجأ لها بالقرب من اليابسة لأنها تعتمد على النظر في صيدها

سلوكها





تعتبر من الأسماك الأقل ذكاءً والأكثر خطورة على الغواصين لأنها تهاجم اي شيء يتحرك حركة
عشوائية سريعة في الماء

سريعة الانقضاض على
الأشياء اللامعة من دون ان تحدد نوع الشيء الذي تنقض عليه


حيث تتخيلها بأنها سمكة تستحق الأكل وهي سريعة جداً في الماء


ودي بقي ميزتها بالنسبة لصياد الكاستنج انها لو موجوده ولمحت اي لور مش هتسيبه بامر
الله



غذائها


تتغذي اسماك البركودا علي معظم انواع الاسماك حتي صغار البركودا نفسهاوالعوالق والقشريات




صيدها

بما اننا في جروب بنفضل نشتغل عليها بالطعوم الصناعيه فهنتكلم عن صيدها بطريقه الكاستنج


اولا لازم نبقي عارفين الانواع الموجوده في مصر


chrysotaenia (المغازل)

qenie or Blackfin
barracuda

طبعا سمكة مختلفه عن المغازل في الشكل والحجم
بتتميز بخطوط سوداء علي جسمها



flavicauda or yellow
tail

ودي مشفتهاش غير مرة واحده واحد صديقي اخدها
قدامي لكن مشفتهاش غير المرة دي فقط دي بتبقي ديلها وزعانفها صفر

اولا
المغازل :


الطول الطبيعي ليها 20-25 سم لكن اعلي رقم مسجل لطولها 32سم


بنشتغل عليه بلور صغير من اول 5 سم لغايه 9 سم بس طبعا المقاس كل مكان صغير كان افضل

دخلت معايا علي لور لغايه 11 سم

واي معلقة طبعا


ولو اخدت منها بامر الله هتاخد كذا واحده



ثانيا
البراكودا
مبتوصلش عندنا نفس احجام الاسماك برا

بس اخدت حاجات طولها 90-85-80-75 سم


بتدخل علي لور من مقاس 7-14


الالوان المفضلة:
نيجي بقي للالوان اللي ممكن تدخل عليها
الاساسي في الالوان اللي ممكن تدخل عليها سواء مغازل او بركودا
بالترتيب بالنسبه لتجاربي الشخصية انا واصدقائي اللي بصطاد معاهم


السيلفر-الاصفر
الفسفوري -البينك-الاحمر

دول
افضل الوان وعن تجربه وده مش معناها ان الاوان التانيه مش هتدخل لا هتدخل طبعا بس
لو معاك الالوان دي ابتدي بيها وباذن الله هتدخل عليه

فالصور
هحط اكتر لور مسك معايا هو فيه الاصفر الفسفوري والفضي مقاس 9-11 بجد سافحين

اخر نقطة بقي ودي اهم حاجه حابب
اتكلم فيها الصيد بالنسبة لمعظمنا اهم واحسن هوايه واكتر شي بنطلع فيه طاقتنا
وضغوط الحياة لكن اهم شي ميكون سبب الم ومعاناه اولا واخيرا السلامة

اولا


لازم نبقي مأمنين نفسنا في المكان اللي واقفين فيه الزحلقه ناخد بلنا منها


ثانيا
السمكة اللي بنتعامل معاها اسنانها حاده جدا ومؤذية واول ما بتحس انها اتمسكت بتحس انها
اتخدعت بتعمل حركات جنونيه وخصوصا الكبير منها

ومهما
كنت صياد ومتمرس لازم تاخد حزرك

مهم
جدا تاخد بالك وانتا بتسلك اللور ويفضل يكون معاك بنز مدبب تسلك بيه اللور ويكون
معك فوطه لان بيكون علي جسمها سائل لزج هتتزحلق من ايدك

بتمني
اكون اتكلمت عن كل حاجه تخص البركودا واتمني اكون عرفت اوصل المعلومه واي استفسار
انا تحت امركم

13/12/2024

العدة مستعدة 🎣🎣🎣

10/12/2024

بسم الله الرحمن الرحيم
حابب اتكلم النهارده بسبب انتشار اسماك الجلخ
وان ليا صديق اتشك منها
طبعا بعد ما الراجل اتشك منها حاولت ادور في الصفحات العربية علي
اي شئ يفيدنا ازاي نتصرف بعد ما الراجل اتشك
مفيش طبعا اي إفادة
ابتديت ابحث باسم السمكة الانجليزي
Plotosus lineatus (بلوتوسوس لينياتوس)
طبعا كلها مقالات عامه عن السمكة
وأنها سامه
وموطنها وأحجامها
وحاجات غير اللي انا ببحث عنها
لغايه لما لقيت دراسه بحثية مفصلة عن الإصابة بشوكة السمكة دي
بس مع الاسف دراسه إسرائيل
لانها بتشاركنا نفس البحر المتوسط بعد احتلالها
اغلب شواطئ فلسطين
للاسف هناخد منها بعض النقاط اللي بتعود
علينا بالنفع والفائدة للجميع
مقدمه فالدراسه بتقول انا بدايه انتشار السمكه عندهم بداية من سنه ٢٠٠٢ ودي اول مرة يتم تسجيل وجودها فالبحر المتوسط
وبتتكلم الدراسه ان منذ افتتاح قناة السويس ده ادي لمرور ٦٠٠ نوع من الكائنات البحرية (١٠٠ نوع من الأسماك)بين البحرين ولكن الغلبة في الهجرة للبحر الأحمر
الدراسه اتعملت علي ٨٤ حاله أصيبت إصابة مباشرة من السمكة
والاعراض المشتركه والاساسيه
١-الآلم الشديد
٢-جرح ثاقب
٣-التورم والاحمرار
٤- ارتفاع ضغط الدم
٥-تسارع القلب
٦- الحمي والقئ و القشعريرة والضعف
دي كل الأعراض اللي بتحصل من شكة السمكة بمختلف أنواعها وحدتها من شخص لآخر
وذكرت كل انواع الرعايه الطبية اللي حصلت مع مختلف الحالات سواء في المستشفيات أو العيادات الخاصة
١- غمر مكان الجرح بماء ساخن
٢- إبرة مخصص للكزاز (Tetanus) تيتانوس
٣-المسكنات التي تحتوي علي الباراسيتامول أشهرها البندول الازرق
العادي وتجنب اي ادويه تحتوي علي الكافيين لانها ترفع ضغط الدم

طبعا اشواك السمكة دي بتحتوي علي نوع من أنواع السموم بروتينية (كرينتوكسينات وبلووتوتوكسين).
venom contains proteinaceous toxins (crinotoxins and plototoxin
المايه السخنه ليها تأثير كبير عليها في تخفيف حدة الالم بشكل كبير
ربنا يحفظ الجميع بأمر الله
واهم حاجه سلامتك وسلامة اللي معاك
أأمن حاجه تقص الشعر بالسلاح ودي حاجه لا تعيب الصيد مهما كانت حرفيتك فالصيد حركة السمكه وانتا بتسلكها حاجه مش مضمونه
قص السلاح سيبها برا تموت وبعد كده ارميها
إن شاء الله الكلام يوصل لكل الناس وتاخد حذرها

29/09/2024

بسم الله الرحمن الرحيم

السلام عليكم ورحمه الله وبركاته
تزامنا مع بداية موسم القاروص
وان من ضمن الطعم الصناعية اللي
بنشتغل بيها علي القاروص هي السوفتات أو الجرينجو
وهي طبعا طعمايه لاسماك كتير
بس غير مفضلة بالنسبالي مع الاسمك
ذو الاسنان الحاده
وهي طعمايه ناجحه جدا مع القاروص
ولازم نعرف ليه وايه سبب أنها ساعات
بتبقي انجح من الربلات وخصوصا
اخر ايام القاروص
في أيام القاروص بيكون فيها مبطرخ
وبيشيل البيض في فمه والناس اللي بتشتغل
بطعم طبيعي عارفه الكلام ده
السمك ساعتها ولا بيدخل علي نطاط ولا خشابي
ولا شطنارة
وبيكون ماسك الدود بأنواعه هنا بقي
بيكون افضل نوع طعم صناعي ليه هو السوفتات وهتكون هي البريمو زي ما بيقولوا
وده مش معناه انهي مش هتمسك اللور
بس احنا لازم نجتهد وناخد بالاسباب

مميزاتها السوفت بيت عموما
1-من وجه نظري رخص تمنها لو قارنها بثمن اللورز ممكن
بسبعه أو تمانيه جنيها تجيب سوفتات صيني وهتشتغل معاك
2-طعمايه جسمها مرن جدا وحركتها طبيعيه فالميه
3-طعمايه بتعرف تحركها في كل الاعماق ودي ميزة كويسه جدا
4-بتغير وزنها علي حسب الريح وتيار الميه والمكان اللي عاوز توصل ليه الطعم
عيبها الوحيد اللي انا شايفه
انها بتتقطع بسرعه سوا من الوعر أو الأسماك ذو الاسنان الحاده

اشتغل بالسوفتات ازاي وهي وزنها خفيف
الاول لازم نفهم انواع السوفتات
1-سوفت ليه رأس رصاص بسلاح جيج هيد
الجيج هيد ده ليه اوزان وبنشتغل بيه عادي زيه زي اللورز
ومن أشهر أنواعه البلاك مينو وده اغلاهم
وفي انواع شبيه ليه ارخص فالسعر وشغال تمام
2-سوفتات جهازه بسلاح ورصاصه داخليا جوا جسم السوفتايه
وده برده هيشتغل زي اللورزعادي
3-سوفتايه غير مجهزة بسلاح أو رصاصه
4-سوفتايه ليها مكان لسلاح وبيتباع معاها سلاحه أو لا

هنيجي بقي لاكتر سؤال اتسال الفترة اللي فاتت
ازاي هنشتغل بالسوفتات الخفيفة دي
في حلين للموضوع ده
1-egg cast بيضة التشويح
دي بقي هنربطها من الطرف السفلي اللي فيه مدورين عكس المتعارف عليه لا الجزء ده مسلوب وفي شغلنا هيبقي مقاومته في اللم أقل
الطرف ده هيبقي عليه الخيط اللي علي الماكينة سواء شغال ببريد أو مونو
والطرف التاني هيكون في السوفت بليدر طوله من متر ل متر ونص واقصي مقاس خيط 45 وده طبعا مناسب القاروص جدا مش هنحتاج اكتر منه
الايج كاست متوفر تقريبا ب 5مقاسات
20-40-60-80-100
طبعا هنستخدم المقاس المناسب من حيث
الكاست ويت بتاع العود وبعد المكان اللي
عاوز أوصله والريح
وهي طبعا فلوتنج و جلو
2-الحل التاني ويعتبر أكثر الحلول عندنا
وهي استخدام الرصاص
طبعا في جيج هيد مخصصه السوفتات
وممكن نستخدم الرصاص الريشه العادي وده في منه مقاسات واشكال مختلفه
طبعا الرصاصه البلحه أو الزتونه نستبعده لأن شكله هيعمل مقاومه فالميه
طريقة الشغل أن هنيجي في اخر خيط الماكينه
نحط الرصاصه وبعدها مدور وبتكون حرة
وبعدها ليدر من متر لمتر و نص واخره السوفت بتاعنا
وفي رصاص حاليا مشقوق بالطول وبيبات الخيط في قلبه وليه قطعتين بيتقفلوا علي الخيط اعلي وأسفل الرصاصه
طبعا طريقة الصيد انك بترمي بيه علي حروف الوعر وتبتدي تلم مع نتشات بسيطه وبنقدر نتحكم فالعمق بأننا بنسيب السوفت اكتر كل ما بنعوز عمق اكبر ودي عمليه تقديريه
وبتختلف علي حسب عمق المرمي
السوفتات اللي مبيكونش فيها مكان للسلاح وحنا بنعدي منها السلاح لو شغالين في أماكن وعر حامي يفضل طبعا أننا نخلي السلاح اتجاه اعلي السوفت
ولو المكان الوعر فيه من عادي او بتشتغل علي اماكن رمليه وسط وعر بنخلي السلاح اتجاه لتحت عادي
بنستخدم سنار حلقة من علي حسب مقاسات السوفتات

طبعا كل حاجه اتكلمنا عليها ليها صور في اخر البوست
واي استفسار انا تحت امركم

25/09/2024

بسم الله الرحمن الرحيم

صيد الحبار
(كليماري_سبيط)

نبذة عن الحبار

الحبار عموما كائن بحري من الرخويات أو من اللافقاريات

يتكون جسمه من ثماني ارجل وذراعان وهما اطول من باقي الأرجل

ويغاطوا بالمماصات من أجل الامساك بالفرائس

عيناه ليس لها جفون ويعتبر الحبار ملك من ملوك التخفي حيث يتكون جسمه من خلايا قادرة علي تغير لونه حسب

البيئة المحيطة

رؤيته قويه جدا

يملك مخلب بديلا للاسنان

غذائه

الحبار علي معظم الأسماك الصغيرة المناسبة بحجمه والقشريات والجمبري والكابوريا

مواسم تواجده

الحبار عموما موجود طول السنه بس من شهر ابريل الي أغسطس

بيكون متواجد في الغرق لان ده موسم التكاثر بتاعه

شهر سبتمبر لشهر مارس بيبتدي يظهر في الأثر

وساعات بيظهر في شهر أغسطس عالاثر ويفضل متواجد

لغايه نهاية أبريل بأعداد قليلة

لأنه فالوقت ده بيكون حامل للبيض

لازم كنا نبدا بشويه المعلومات دي علشان تبقي عارفين احنا بنتعامل مع ايه

نيجي بقي لطريقة الصيد والمعدات المطلوب

عود بكاست ويت مناسب طوله من 270-360

ماكينه مقاسها صغير من مقاس 3000 -5000

عليها خيط مونو مقاس 30-35

مشبك لسهولة تغير اللور

اللور بقي

هتبتدي الموسم من مقاس 2.5و 3 و3.5و4و4.5هتبتدي تتدرج فالحجم لنهاية الموسم علي حسب حجم السمكة المستهدفة

كشاف لو هتصطاد بليل

ولو امكن كمان جردل لان الحبر بتاعه صعب التنظيف وهيبهدل الايس بوكس

وبردوا لو تواجد ملقاف يكون شئ جميل

تحط فلة مناسبة قبل اللور بمتر ونص اتنين متر او علي حسب عمق المرمي

علشان تتفادي الوعر

السبيط بيبقي ماسك الارض ممكن تشيل السنون اللي في اتجاه الارض علشان تتفادي الوعر

حضرتك هتتوكل علي الله وتجهز عدتك وتختار مرمي فيه

فرشه وعر متكونش عميقة بحد أقصي 4متر

هنضرب الكشاف علي اللور نص شحنه لان زي ما قولنا أن رؤيته قويه جدا لو متواجد هيشوف نورها لكن لما النور بتاعها بقوته بتبقي خايفه

وبترفض تقرب من اللور

هتتوكل هالله وترمي وهتلم براحه حسيت بحاجه اتعلقت

هنسيب بوش سنه صغير علشان يمسك اللور كويس

تتعلق تمام هتبتدي تلم براحه خالص علشان ميحسش أنه متعلق وبيتسحب

ولو حس الاحساس ده هتلاقي ليله حبر فالمايه وطرطشه وهيبوظ المرمي ويطفش باقي السرب

السرب عموما بيتكوين من 3-4-5-6-7-8 حبارات

دايما قائد السرب هو اللي بينقض علي اللور الاول يعني لو اتمسكت اول مرة وزميلك جانبك يرمي في ساعتها هياخد لأن بقي السرب هيتبع القائد بتاعها

وطبعا الكليماري مش ثابت في مكان يتمسك منطقة تشتغلي فيها تاخد حتتين تلاته وهتلاقيها منعت تنقل وتفضل تلف فالمكان وطبعا احنا قائلين عدة خفيفة علشان تتحرك براحتك

*السبيط دايما بتاخده من عالارض

*اول ما تمسك ارفع وش العود لفوق علشان الكليماري متاخدش فرصة انها تعليقات مائه وتغرقك حبر

*لو بالنهار وشوفت سرب كليماري مترميش عليه ارمي جنبه وهو هيروح اللور

*وانت بتلم ادي نتشات لللور حركات شمال ويمين نتلمس بطريقة ثابته

*الكليماري بياكل فالايام القمريه كويس جدا وفي وجود الكشافات

*بياكل فالبحر العدل والبحر المشخشخ

*بياكل فالاحواض والبحر المفتوح مع قواعد اختيار المرامي أنه يكون فرشة وعر

*الكليماري متجول وليكون موجود عالرملة وفالوعر

*السبيط بيحب الوعر وغالبا بيمشي ازواج

*متقفلش الدراج ولم براحه

*لو اخدت سمكة وخلال ربع ساعه بعدها مأخدتش تاني انقل

*فالصيد بالنهار هنشتغل افضل باللور العضم اللي عليها عواكس

*ممكن تكسر عود فسفور وتفضيه علي اللور القماش بليل

*الاوان الفوشيه والأحمر والبرتقالي والأصفر والفسفوري يعتبروا من افضل الالوان

23/04/2024

Shout out to my newest followers! Excited to have you onboard! Moamen Mohamed, Eslam Saber, محمد بوشعراية الشلوي, هانى عراقى, Adam Edwley, سهيل الرجيبي, Hany Abd Elslam, Amr Hawary, انفال للأبواب ابحر, معتز ابو عبدالله, خالد رمضان, Hassan Mostafa, Haedara Shaban, Mohamed Fathy, حمدي.الدبابي ابومروان, Mohamed Shady, مصطفى مرسال, Khaled Samy, Ahmëð M Heğažy, Eslam Mohamed, محمد سند, عبدالروؤف فتحي, نادر محمد, مجدي دياب دياب, Ben Nasr Mohamed, Ezan Lzen, Jozef Welyam, Omar Mohamed Sayed, Hamza Hunter, الصياد العربي, Abdelrhman Yasser Hedar, Mohamed Fathy, El Kashory, محمود محمد, Ahmed Gomaa, Ahmed Shabana, Nader Al Sayed, حمدي احمد, Mohamed Samy, Mido Elkhateeb, عادل عثمان, Mahmoud Atef, Best Thought, Mostafa Mohamed Saad, Mohamed Nooman, Fares Maged, محمد عبدالحي, Ahmed Amr Atta, Khaled Rehan, Mohamed Sayed

20/04/2024

بسم الله الرحمن الرحيم

كام مرة ترتب لطلعه صيد وتيجي تحجز طعم ومتلاقيش
كام مرة تبقي عاوز تصطاد وللاسف احنا في اخر الشهر ومفلس 😂
الطعوم بقيت غاليه وانت مش عاوز تحمل نفسك مصاريف زياده في ظل الظروف الاقتصادية
الحل عندي بأمر الله
جردلك في شنطتك وسكينه المعجون في ايدك
واللي يقولك رايح فين قوله طالع علي البلوكات
هندور علي البلوكات اللي بيطولها المايه
ومغطيها الحشف نبتدي من حرف البلوك نشيل
الكشف بسكينه المعجون ونملي الجردل اللي معانا بالحشف
وهناخد الجردل ونقعد نفصص الحشف من بعضه
هتلاقي بقي دول هو ده بقي اللي احنا بندور عليه
دود الحشف وما ادراك عن دود الحشف
طعمايه محترمه جدا جدا جدا ماسكه نفسها
ومعشوقه من الدنيس وأغلب انواع السمك
هتلاقي منها لونين وانتا بتدور الاحمر وتلاقي بردوا دوده مخضرة شويه
متقلش هي نفس الدوده
بس احذر من ابو صوفه دوده ليها شوك ابيض صغير لما تلاقيها متمسكهاش لأن كل الشوك بنها هيطلع في ايدك
معاك علبة صغيرة هتلاقي هتحط فيها الدود اللي طلعته
وبقي معاك طعمايه محترمه من نفس المايه اللي هتصطاد فيها بدون اي تكلفه
وموضوع انك تجيب طعمك بنفسك ده ليه متعة جامده
وربنا يرزق الجميع

14/04/2024

بسم الله الرحمن الرحيم

هنقول شويه معلومات بسيطه عن

سمكة الفراخ أوGurnard fish

هي سمكة متواجده في بحرنا عادتنا بتوصل ل ٣٠ سم وبعض الأسماك سجلت ٥٠ سم
سمكة من اسماك القاع بتتواجد من عمق ١٠ متر ل ٣٥٠ متر تقريبا
سمكة تتميز بالوان ونتواءات علي جسدها لتتخفي ببراعها وسط الصخور
لها ثلاث اهداب علي كل جانب تنفصل من الزعانف الصدرية المميزه تستخدمها كارجل للمش علي القاع والبحث عن الديدان والقشريات المدفونه في الأراضي الرمليه والطينيه
سمكه مميزة جدا فالاكل وسمكه ليها بهجه لما تشوفها بألوانها وشكلها