28/08/2026
رسالة هامة وتنبيه لكل ولي أمر (أب وأم):
ابنك أو بنتك بقالهم سنة، سنتين، أو 3 سنين رايحين جايين على التمرين يومياً؟
هل سألت نفسك مرة: هل ابني بيتطور صح؟ ولا إحنا بنضيع وقت وفلوس؟
للأسف، الغالبية العظمى من أولياء الأمور بيقعوا في فخ "الثقة الزائدة" في المكان أو الكابتن، والمحصلة إن الطفل ممكن يفضل 10 سنين يتمرن سباحة، وبيتعلم التكنيك غلط، بسبب عدم المتابعة والإهمال.
نقاط لازم كل ولي أمر يفهمها كويس:
اختار المدرب المربي وليس "صاحب الكلام": لو ابنك صغير، دور له على مدرب متخصص، مربي أجيال بالفعل مش بالأقوال، مدرب له تاريخ وطلّع سباحين حقيقيين ومستواهم ظاهر.
التأسيس الكلاسيكي هو الأساس: التأكد من إن الطفل بيتعلم العومات الأربعة (حرة، ظهر، صدر، فراشة) وبيتقنهم بأسس صحيحة؛ لأن أي خلل في التأسيس بيهدم مستقبله الرياضي لاحقاً.
مفيش خامة وحشة.. فيه مدرب فاشل: كلمة "ابنك مش هييجي منه" دي جملة بيكررها المدرب الفاشل فقط. فيه سباح استيعابه بطيء أو محتاج أسلوب مختلف، ومع الصبر والضغط الإيجابي من مدرب فاهم هينطق ويشتغل.
الالتزام وحده لا يكفي: الكارثة إن أكتر الأطفال الملتزمين بالحضور والغياب هم أكتر ناس بيضيع حقهم وبيتعلموا غلط، والمشهد ده بيوجع قلب أي مدرب متخصص بيشوف الكوارث دي في الملاعب.
الخلاصة:
لا تترك ابنك على "الوضع الصامت". تابع تمرين ابنك، استعن برأي متخصصين من وقت للتاني لتقييم مستواه، واعرف ابنك محطوط فين ومع مين.. لأن الوقت اللي بيروح من سن الطفل ما بيرجعش تاني.
