19/05/2025
والله لازم نحكيو على حاجة راهي توجع وتضحك في نفس الوقت.
شفت تونس والمغرب… يا خاوتي، نفس المناخ، نفس الرياح، نفس الشمس، لكن الفرق؟ كي تصب شتا تما، الطرقات تنظّف، السيارات تولّي تبرق.
هنا في بلادنا؟ تصب شتا 5 دقايق وتلقى روحك ديرت “off road” بلا ما تخرج من المدينة. سيارتك؟ تولّي صباغة طينية ديزاين خاص 🤡.
علاه؟
• طرقات محفورة كي لابير.
• أرصفة؟ يا ريت. رمل وطين وديكور طبيعي.
• الجماعة تاع البلدية؟ ما نعرفوش وين راهم. يمكن مزالهم كيما الطرقات… في ورشة.
والغبرة؟ غبرة عندها كارت إقامة رسمية في البلاد. تدخل دارك، في سيارتك، حتى في الماكلة تلقاها تقولك “صحيت”.
وش زاد كملها؟ إحنا ولّينا نقولو “عادي”. عادي تولي بلاصة عايش فيها ما تتغسلش، ما تنظّفش، والناس تهبط الزبل من البلكون وتقولك: “ماشي أنا وحدي”.
والله غير عيب. تونس والمغرب يقدرو، وإحنا؟ قاعدين نتفرجو في الغبرة كيفاش تغلبنا.
نزيد نقولها: الجزاير تستاهل خير. وإحنا نستاهلو نعيشو كيما الناس
